قـەوارەیێ هەرێما كوردستانێ بەرهەمێ خەبات و قوربانییێن گـەلێ كـوردستانـێ یە
نەوزاد زادە
قەوارەیا هەرێما كوردستانێ نە ئەنجامێ ڕێككەفتنەكێ یان دیاریا هێز و لایەنەكێ دەرەكی یان پەیدابوونا ل نشكەكێ ڤە یا قووناغەكا سیاسی یە، بەلكو بەرهەمێ 100سالێن خەبات، تێكۆشان و قوربانییێن بێ سنوور یێن گەلێ كوردستانێ یە. ئەڤ قەوارە ب خوینا شەهیدان و ب خەبات و بەرخۆدانا كوردستانیان هاتیە ئاڤاكرن.
یا دیار و خۆیایە كو گەلێ كوردستانێ بۆ پاراستنا ناسنامە و بدەستڤەئینانا مافێن خۆ یێن ڕەوا، بەردەوام شۆڕش و سەرهەلدان ئەنجامدانە. شۆڕشێن ئیلۆنێ و گولان دو نموونەیێن هەرە دیارن كو تێدا گەلێ كوردستانێ ب گیان و خوینا خۆ خەبات و بەرخۆدان كر. هەر چەندە ڕژێمێن شۆڤینی و دكتاتۆری یێن ئیراقێ جۆرەها تاوان ئەنجامدانە، وەكو جینۆساید، كیمیاباران، گرتن، سێدارەدان و ئەشكەنجەدان بكارئینان بۆ شكاندنا ئیرادەیا گەلێ كوردستانێ، لێ ئەو نەگەهشتن ئارمانجێن خۆ، چونكو گەلێ كوردستانێ ب ئیرادە و باوەریەكا ب هێز بەردەوامی ب خەباتا خۆ دا.
باشترین نموونە ژی سەرهەلدانا گەلێ كوردستانیە ل بهارا ساڵا 1991 یە، كو گەلێ كوردستانێ ل هەمی باژێر و دەڤەرێن كوردستانێ راپەڕین و ڕۆپەلەكێ نوی ل دیرۆكا كوردستانێ ڤەكر. ئەنجامێ ڤێ راپەڕینێ ئاڤاكرنا قەوارەیا هەرێما كوردستانێ و دامەزراندنا پەرلەمان و حوكمەتا هەرێمێ بوو.
پشتی ڕووخانا ڕژێما بەعسێ ل سالا 2003 و نڤیسینا دەستوورا نوی یا ئیراقێ، دانپێدانا فەرمی ب هەرێما كوردستانێ هاتە كرن. ب ڤێ چەندێ، هەرێما كوردستانێ وەك قەوارەیەكێ خۆدان دەستهەلات، بوو پارچەكا سەرەكی ل سیستەما سیاسی یا نوی یا ئیراقا فیدرال.
لێ ئەوا مە دڤێت بێژین ئەوە، ب مخابنی ڤە ئەڤرۆ ل ناڤ هەرێما كوردستانێ هندەك دەنگ دژی قەوارە و دەستكەفتێن هەرێمێ دەردكەڤن، بەلێ پێدڤیە ل سەر وان هەمیان بزانن كو ئەڤ دەستكەفتیە ب ساناهی نەهاتینە بدەستڤەئینان بەلكو بەرهەمێ خوینا شەهیدان، خەبات و قوربانیدانا بێ سنوورا نەتەوەیەكێ ستەم لێكرینە، لەوما پاراستن و بهێزكرنا قەوارەیێ هەرێما كوردستانێ نە تنێ ئەركەكێ سیاسی یە، بەڵكو وەفادارییەكا دیرۆكی و نەتەوەیی بۆ وان قوربانیێن هاتینە دان ل پێناڤ ئاڤاكرنا ڤی هەرێمێ.
ل دوماهیێ، پێدڤیە هەمی كەس و لایەن بزانن كو قەوارەیا هەرێما كوردستانێ ب پیلانا لایەنەكێ سیاسی یێ ناڤخۆیی یان بەرژەوەندییێن كەسی و تایبەت ناهێتە ژناڤبرن، چونكو بنیاتێ ڤێ قەوارەیێ یێ ب هێز و موكمە و ل سەر ئیرادەیا گەلێ كوردستانێ، خوینا شەهیدان و خەباتا درێژخایەن هاتیە ئاڤاكرن. گەلێ كوردستانێ ژی ب هەموو تەخ و چین و پێكهاتەیێن خۆڤە ئامادەیە بەرەڤانیێ ل دەستكەفتییێن خۆ بكەت، چونكو ئەڤ دەستكەفتییە میراتێ نەڤیێن بۆری و ئومێدا نەڤیێن داهاتی یە.
