كێمیا نەختینەیێ ئەگەرێ سەرەكی یێ گیرۆبوونا مووچەیێن فەرمانبەرێن ئیراقێ و هەرێمێ یە
ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان ئاشكرا كر كو پاشكەفتنا مووچەی ب تنێ هەرێما كوردستانێ نەگرتییە ڤە بەلكو ژبەر كێمییا نەختینەیێ ل هەموو ئیراقێ گیرۆبوون د بەلاڤكرنا مووچەیێن دەزگەهێن فیدرال ژی دا هەیە و ئاماژە ب دەمێ خەرجكرنا مووچەیێن فەرمانبەرێن هەرێمێ دا.
ئیخلاس دلێمی، ئەنداما پەرلەمانێ ئیراقێ ژ فراكسیۆنا پارتی دیموكراتی كوردستان راگەهاند» حوكمەتا هەرێما كوردستانێ هەموو داتا و پێزانینێن پێدڤی بۆ فەرمانگەهێن دارایی یێن ئیراقێ هنارتینە».
دلێمی ئاماژە ب وێ دا كو نوكە داتایێن هەرێمێ گەهشتینە و ژ ئالیێ ژمێریاران و فەرمانگەها بودجەی ڤە پێداچوون بۆ هاتییە كرن و بڕیارە ل رۆژا ئێكشەمبیا 12/7/2026 هووربینییا دووماهیێ د لیستەیان دا بهێتە كرن.
ل گۆرەی گۆتنا ڤێ پەرلەمانتارێ ب ئەگەرەكێ مەزن د رۆژێن دووشەمبی یان سێشەمبییا ژ ڤێ حەفتیێ دەست ب خەرجكرن و بەلاڤكرنا مووچەیێن فەرمانبەرێن هەرێما كوردستانێ بهێتە كرن.
ژ ئالیێ دی ڤە ئیخلاس دلێمی دووپاتی ل سەر وێ كر كو گیرۆبوونا بەلاڤكرنا شایستەیێن دارایی كێشەكا گشتگیرە ل هەموو ئیراقێ و ب تنێ هەرێما كوردستانێ نەگرتییە ڤە و رۆهن كر كو حوكمەتا فیدرال ژی هەتا نوكە مووچەیێن هەموو دەزگەهێن خۆ بەلاڤ نەكرینە ب شێوەیەكی كو هەتاكو ئەندامێن جڤاتا نوونەرێن ئیراقێ ژی ل رۆژا پێنجشەمبی 9/7/2026 مووچەیێ خۆ وەرگرتییە، ناڤبری هۆكارێ ڤێ گیرۆبوونا گشتی بۆ دروستبوونا كێشەیا كێمییا نەختینەیێ ل هەموو ئیراقێ ڤەگەڕاند لێ پشتڕاستی دا كو رێكارێن دارایی یێن تایبەت ب هەرێما كوردستانێ ب شێوەیەكێ ئاسایی و ل گۆرەی پلانان ب رێڤە دچن.
