ل تورکیا پێویستیا کوردان ب سیاسەتەکا نوو هەیە
ئەندامەکێ بەرێ یێ پەرلەمانێ تورکیا رەخنە ل هەلوەستێ سەلاحەدین دەمیرتاش هەڤسەرۆکێ بەرێ یێ هەدەپێ گرت و راگەهاند، نابیت پارتەکا سیاسی ل پەرلەمانێ تورکیا بیت و هەروەسا پشتەڤانیێ ل توندوتیژیێ بکەت، ئەو یەک شاشیەک مەزنە، ل تورکیا نها پێویستیا کوردان ب سیاسەتەکا نوو یا هەی.
ئالتان تان ئەندامێ بەرێ یێ پەرلەمانێ تورکیا سەر ب هەدەپێ راگەهاند، نابیت پارتەکا سیاسی ل پەرلەمانی بیت، لێ د هەمان دەمی دا پشتەڤانیێ ل شەڕێ چەکداری بکەت، چونکی ب توندوتیژیێ و شەڕی پرسا کوردی ل تورکیا ناهێتە چارەسەرکرن، ئەزموونا چەندین سالێن بۆری ژی سەلماندیە ژ بەر شەڕی و توندوتیژی پرسا کوردی گەلەک ئالۆز لێ هاتیە، ژ بەر هندێ ژی هەلوەستێ سەلاحەدین دەمیرتاش هەڤسەرۆکێ بەرێ یێ هەدەپێ کو نها د زیندانێ دایە د وی دەمی دا گەلەک شاش بوو، چونکی نابیت تو وەکو پارتەکا سیاسی ل پەرلەمانێ تورکیا بی و د هەمان دەمی دا پشتەڤانیێ ل توندوتیژیێ بکەی، ئەو یەک دێ ئەنجامێن خوە یێن گەلەک خراب بۆ کوردان هەبیت.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، مخابن نها رەوشا کوردان ل تورکیا ل گۆر چەند سالێن بۆری خرابە، وی دەمی گەلەک دەلیڤە هەبوون و کوردان دشیان ب سیاسەتەکا راست گەلەک دەستکەفتیێن مەزن بدەستڤە بینن، لێ ژ ئەنجاما سیاسەتا شاش و مفا وەرنەگرتن ژ دەلیڤان نها رەوشەکا گەلەک دژوار هاتیە پێش، بێگومان دڤێت سەرکردێن هەدەپێ یێن وی دەمی ب تایبەتی ژی سەلاحەدین دەمیرتاش راستیا هەی قەبوول بکەت، چونکی وان شاشی کرن و د ئەنجام دا زیان گەهشتە خەباتا گەلێ کورد ل تورکیا، نها ژی دەستهەلات بەرهەڤ نینە سەبارەت ب مافێن کوردان چو پێنگاڤەکێ بهاڤێژیت، کا چەند دەستهەلات سەبارەت ب مافێن گەلێ کورد ل تورکیا بەرپرسیارە دڤێت بەرپرسێن هەدەپێ ژی هەست ب شاشیێن خوە بکەن.
چاڤدێرێن سیاسی ل تورکیا و باکورێ کوردستانێ وەسا دبینن، هندەک هێز د ناڤ پەکەکێ و هەروەسا د ناڤ دەولەتا تورکیا دا هەنە ناهێلن شەڕێ نها بهێتە راگرتن، ژ بەر هندێ ژی بزاڤێن بۆ چارەسەرکرنا پرسا کوردی ل تورکیا نەگەهشتینە چو ئەنجامان، چونکی هێزێن شەرخواز دخوازن ب شەڕی بەرژەوەندیێن خوە بپارێزن، ژ بەر هندێ ژی هەتا نها پرسا کوردی ل تورکیا نەهاتیە چارەسەرکرن و چو پرۆژێن ئەردۆغانی ژی نها بۆ چارەسەرکرنا پرسا کوردی ل تورکیا نینن، بەری نها ئەردۆغانی دیار کربوو وان پرسا کوردی ل تورکیا چارەسەر کرینە و نها پرسا تیرۆرێ هەیە و دڤێت ئەمریکا و وەلاتێن ئەندامێن ئێکەتیا ئۆرۆپا ژ بۆ شەڕێ ل دژی تیرۆرێ هاریکاریا تورکیا بکەن.
