ل سه‌ر ئه‌نترنێتێ ب ڤێ رێکێ جلكان بكڕه
كڕینا جلكان ب رێیا ئەنتەرنێتێ گەلەک ب ساناهیتر لێ دهێت دەمێ مرۆڤ بشێت ژ پێشوەخت ببینیت کا ئەو جلک دێ چاوا ژ بەژن و بالا وی هێن. ل ڤان دووماهییان کۆمپانیا ChatGPT تایبەتمەندییا تاقیکرنا ئەلیکترۆنی (سیمولەیشن) زێدە کرییە، کو رێ ددەتە تە وێنەیێ خۆ یێ کەسی بکاربینی بۆ چێکرنا وێنەیەکێ کو تێدا دیار بیت تە ئەو جلك یان ئێکسسواراتێن تە دڤێن بکڕی یێن پۆشین.
تایبەتمەندیێن کڕینێ د ChatGPT دا د گەل هەندەک بەرهەمێن گونجای دهێنە رێکخستن. دەمێ بژارتنا «تاقیکرنێ» بۆ بەرهەمەکی بەردەست دبیت، تۆ دشێی وێنەیەکێ خۆ یێ پاشەکەفتکری بکاربینی، یان ژی ئێکسەر وێنەیەکێ نوو بگری. پشتی هینگێ، ChatGPT وێنەیەکێ دەستکاریکری چێدکەت دا نیشان بدەت کا ئەو بەرهەم دێ چاوا ل سەر تە راوەستیت.
لێ ب تنێ بۆ وان بەرهەمان نینە یێن راستەوخۆ د ناڤ ئەنجامێن لێگەریانێ دا دیار دبن. هەروەسا تۆ دشێی وێنەیەکێ شاشەیێ (سكڕین شۆت) یان وێنەیێ بەرهەمی بار بکەی و داخوازێ ژ ChatGPT بکەی ب شێوەیەکێ ئەلیکترۆنی ل سەر تە تاقی بکەت. ئەڤ چەندە دەلیڤێ ددەتە تە ڤێ تایبەتمەندیێ بکاربینی بۆ وان وێنەیێن د دەمێ گەڕیانێن خۆ دا دبینی.
سیستەم ب شێوەیەکێ هاتییە دیزاینکرن کو شێوازێ تە بپارێزیت د دەمێ گوهۆڕینا پشکێن وێنەی دا. ئەو دشێت جلك و ئێکسسواراتان دەستکاری بکەت، زێدەباری لایەنێن دی وەک رووناهی، جورێ قوماشی و هویرکاتیێن دی یێن وێنەی. ئەڤ تایبەتمەندییە مفای ژ نووترین شیانێن ChatGPT د بەرهەمئینان و دەستکاریکرنا وێنەیان دا وەردگریت، کو ب تایبەتی هاتییە دیزاینکرن بۆ وێ چەندێ ب کارامەییەکا بلند دگەل وێنەیێن ژێدەر کار بکەت.
ژ گرنگترین تایبەتمەندیێن نوو یێن ب مفا ئەوە کو ئێدی پێدڤی ناکەت هەر جارەکا تە بڤێت تشتەکی تاقی بکەی ژ سفرێ دەستپێبکەی؛ چونکی ChatGPT دشێت وان وێنەیێن تە بکارئیناین وەک ژێدەر بۆ تاقیکرنێن پاشەڕۆژێ پاشەکەفت بکەت. ب ڤی رەنگی، تۆ دشێی هەمان وێنە بکاربینیتە ڤە هەر دەمێ تە بڤێت ببینی کا جلك یان ئێکسسواراتێن جودا دێ چەوا ل تە هێن.
