مزگينيه‌كا خۆش بۆ سالا بهێت
ئەڤرۆ نيوز:
وەزیرێ سامانێن سروشتیێ ھەرێما کوردستانێ د کڤانێ کۆنفرانسێ نەفت و غازا ھەرێما کوردستانێ دا گوتارەک پێشکێش کر و دیار کر کو بەری دووماھی ھاتنا سالا 2018 ئاریشا دابینکرنا غازێ بۆ کەرتێ کارەبایێ دێ چارەسەر کەن و گۆت: سالانە خەرجیێن کارەبێ دو ملیار دۆلارن و ب تنێ 10% بۆ حکوومەتێ دزڤریت.
ئاشتی ھەورامی، وەزیرێ سامانێن سروشتیێ حکوومەتا ھەرێما کوردستانێ خویا کر ھندی ئابوورەکێ خۆرت نەبیت حکوومەت نەشێت بۆ ھەموو کەرتان خەرجیان دابین بکەت، لەورا پێدڤیە ھەر گرنگیێ بدەنە نەفت و غازێ و گۆت: دابەزینا بھایێ نەفتێ، وەبەرئینان ل کەرتێ نەفتێ لاواز کری و گورزەکێ مەزن ل کەرتێ وەبەرئینانێ دایە، ب ئاوایەکی نھا ھەرێما کوردستانێ رۆژانە 700 ھزار بەرمیلێن نەفتێ دھنێریتە بەندەرێ جەیھانێ تورکیا و ئەم دشێین بگەھیننە ملیۆن بەرمیلان د رۆژەکێ دا، لێ ب سەدەما قەیرانا دارایی و شەڕێ داعش ئامادەکاری ھاتینە راگرتن.
ئاشتی ھەورامی ئاشکرا ژی کر کو ل گۆر ئامارا وەزارەتا سامانێن سروشتی، نھا ھەرێما کوردستانێ ئێستا شیانێن بەرھەمئینانا شەش ھزار مێگاواتێن کارەبێ ھەنە و بزاڤێ دکەن بگەھیننە نەە ھزار مێگاواتان و گۆت: ئاریشا سەرەکی یا کارەبێ ڤەگوھاستنا وێ یە، کو ھەمی ل گۆر سیستەمی کەڤنە و خەرجیێن وێ گەلەک ژ داھاتی زێدەترن.
دەربارەی بکارئینانا غازێ بۆ کارەبێ، ھەورامی گۆت: نھا 320 ملیۆن پێ یێ سێجا مە غاز ھەیە، لێ ئەم پێدڤی 300 ملیۆن پێ یێن دی یێن سێجا ھەیە بۆ کارەبێ، لێ ھەتا بەری دووماھی ھاتنا 2018 ئەم دشێین ئاریشا دابینکرنا غازێ بۆ کەرتێ کارەبێ چارەسەر بکەین، ھەروەسا دخوازین ب رێیا دروستکرنا وێستگەھێن نوو ئاستێ بەرھەمئینانا کارەبێ زێدە بکەین.
