مەترسیا نڤستنا گەشتیاران ل جهێن بەردایی
عەبدولرزاق نهێلی
یا خۆیایە كو مەبەست ژ گەشتكرنێ ئەوە گەشتیار د گۆپیتكا خزمەتگوزاریان دا؛ گەشتێن خۆ ببۆرینیت ب گشتی و ل پەی رێككەفتنا رێكخراوا گەشتوگوزارا جیهانی (unwto)؛ هەر وەلاتەكێ گەشتیار بچنێ؛ دڤێت گیان و سامانێ وی بهێتە پاراستن و رێز لێ بهێتەگرتن هەتا گەشتا وی ب دویماهی دهێت و ڤەدگەریتە جهێ ژێ هاتی،
بەلێ ل گەل هندێ ڕێكخراوا گەشتوگوزارا جیهانی تەكەزی كریە كو دڤێت ئەڤ گەشتیارە ل دویڤ هندە قانوون و رێنمایان ل وی وەلاتی بمینیت دا ب دروستی دەستهەلاتا وی وەلاتی بشێت د ئاستێ خزمەتكا وان دەركەڤیت، دویر ژ هەر ئارێشەكێ ژ گرنگترین رێنمایان ئەڤێن ل خارێنە:-
١- پێدڤیە ل جهەكێ مولەتدایی ئاكنجی ببیت وەك (هوتێل، مۆتێل، گوندێن گەشتیاری) دا بهێتە تۆماركرن ژلایێ دەزگەهێن پەیوەندیدار ڤە.
٢- نابیت گەشتیار بێی زانیاری و سەربخو گەشتێ بۆ جهێ بكەت یێ وی دڤێت، چونكو هندە جه مەترسینە ب هەر كەسەكێ بچیتێ.
٣- بۆ گەشتیاران نینە خوارن و ڤەخوارنێن ژ دەرڤە ببەنە د بنگەهێن ڤەحەواندنێ دا ئەوێن ل خالا (١) دا هاتین.
٤- گەشتیار دڤێت رێزێ ل دابونەریتێن وەلاتێ لێ دبیتە گەشتیار بگریت.
٥- ئەركە ل سەر گەشتیاری ژینگەها جهێ دچیتە بپارێزیت و نەبیتە ئەگەرێ تێكدانا جوانیا وەلاتێ لێ دبیتە گەشتیار.
٦- ب چ رەنگان بۆ گەشتیارا نینە بچن سیاسەتێ بكەت ل جهێن گەشتیاری.
ئەڤە زێدەبارێ ڤان خالا هەر وەلاتەكی یاسا و ڕێنماێن خۆ یێن تایبەت ل كەرتێ گەشتوگوزارێ هەنە بۆ هندێ ب ڕێخستی و سەدەم د ئاستێ خزمەتا گەشتیاران دەركەڤن.
بۆچی نابیت گەشتیار ب شەڤ ل جهێن بەردایی بمینن ئانكو بنڤن؟:-
ا- مەترسیە ل سەر گیان و سامانێ وی، دبیت ژلاێێ هندەك كەسێن تێكدەر بهێنە ئێشاندن.
ب- مەترسییە ل سەر گیانێ وان ژبەر كیانەوەرێن دڕندە و مار و دۆیپشكان.
ج- پەیدابوونا بۆیەرێن كرێت یێن رەوشتی ل ناڤا گەشتیاران دا.
د- نەبوونا زانیاریان ل سەر گەشتیاریێ بۆ جهێن پەیوەندیدار.
هـ- پەیدابوونا دیمەنێن كرێت ب گشتی.
كارتێكرنا نڤستنا گەشتیاران ل جهێن بەردای ل سەر كەرتێ گەشتوگوزارێ چنە:-
١- لاوازیا كارێ بنگەهێن ڤەحەواندنێ وەك (هۆتێل، مۆتێل، گوندێن گەشتیاری.
2- كێمبوونا كارێ خوارنگەه و كافێیان و. .
٣- لاوازیا بازاركرن و بازارگەریا گەشتیاری، چونكو هەر تشتی ل گەل خۆ دبەن.
٤- كارتێكرنێ ل كۆمپانی و بریكارێن گەشتوگوزاریێ دكەن.
٥- رێژەیا بێكاریێ زێدە دكەن، ژبەر نەچوونا بنگەهێن گەشتیاری بۆ ڤەحەواندن و خوارن و ڤەخوارنان.
٦-كارتێكرنا ئابوورێ گەشتوگوزارێ ب گشتی.
٧- تێكدانا ژینگەها جهێ دچنێ.
٨- كارێ سازیێن پەیوەندیار بزحمەت دكەت لسەر داتاێن دروست ێن گەشتیاران .
ب گشتی دبینم ئەڤ بابەتە ێێ گرنگە پێدڤیە ڕێگری بهێتەكرن، گەشتیار ل جهێن بەردایی بنڤین، چونكو ب هەمی پیڤەران دیاردەكا كرێت و نەشارستانییە و دیمەنێن كرێت نیشا هەڤوەلاتی و جیهانا ژدەرڤە ددەن و ب گاڤەكا مەزن دزانم ئەڤ چەندا مە گۆتی بهێتە بنبڕكرن، دا جوانیا وەلاتێ مە باشتر بهێتە نیشادان بۆ جیهانی.
