مەزلـووم عـەبدی و شـاندەکـێ سـووریێ دێ پێکڤە سـەرەدانا تورکـیا کـەن
رۆژنامەڤانەکا ناڤدار یا تورکیا دیار دکەت شاندەکێ رێڤەبەریا خوەسەر ل گەل شاندەکێ سووریێ دێ پێکڤە سەرەدانا تورکیا کەن و ل گەل بەرپرسێن تورکیا کۆم بن و د بەرنامەیی دایە شاندێ سووریێ سەرەدانا عەبدوللا ئۆجەلانی ژی بکەت.
عەمبەرین زەمان رۆژنامەڤانا ناڤدار یا تورکیا دیار کر، وێ زانیاری هەنە کو دەمەکە هەڤدیتن د ناڤبەرا بەرپرسێن رێڤەبەریا خوەسەر و وەزارەتا دەرڤە یا تورکیا دا هەنە و نها ئامادەکاری بۆ سەرەدانا شاندەکێ هەڤپشک یێ رێڤەبەریا خوەسەر و شامێ بۆ تورکیا دهێتە کرن و گۆت: (ل گۆر زانیاریان شاندێ رۆژئاڤایێ کوردستانێ ئانکو رێڤەبەریا خوەسەر ژ مەزلوم عەبدی و ئیلهام ئەحمەد پێک دهێت و د شاندێ سووریێ دا ژی وەزیرێ دەرڤە و بەرپرسێن دی هەنە و شاند دێ ل گەل بەرپرسێن تورکیا کۆمبن و هەروەسا تشتێ من زانیە دێ شاندێ ناڤهاتی سەرەدانا ئۆجەلانی ژی کەت).
ناڤهاتیێ ئەو یەک ژی دیار کر، قووناغا ئاشتیێ یا ل تورکیا و پرۆسیسا نها ل سووریێ و رۆژئاڤایێ کوردستانێ پێکڤە گرێداینە، ئاشکرایە کو ئۆجەلانی رۆلەک بەرچاڤ د رێککەفتنا د ناڤبەرا شامێ و هەسەدێ دا گێرایە و دیارە تورکیا ژ رەوشا نها یا سووریێ رازیە و ژ بەر ڤێ یەکێ ژی د سەرەدانا شاندێ سووریێ و رێڤەبەریا خوەسەر یا بۆ تورکیا دا دێ بەحسێ گەلەک تشتان هێتە کرن و بێگومان ئەو یەک هەم ژ بۆ بەردەوامیا قووناغا ئاشتیێ و هەم ژی ژ بۆ چارەسەرکرنا پرسێن هەی د ناڤبەرا هەسەدێ و شامێ دا گەلەک یا گرنگە.
عەمبەرین زەمان ئەو یەک ژی دیار کر، بەرپرسێن تورکیا دخوازن قووناغا ئاشتیێ ل تورکیا بەردەوام بیت و هەروەسا ئەو دخوازن کورد ل سووریێ ژی ببنە پشکەک ژ دەستهەلاتێ و داخوازا جودابوونێ نەکەن و چو هەرێمێن جودا ژی دروست نەکەن، دیارە تشتێ هەتا نها ل سووریێ روو دایە ب دلێ تورکیا یە و ژ بەر ڤێ یەکێ ژی سەرەدانا مەزلوم عەبدی یا بۆ تورکیا و هەڤدیتنا وی یا ل گەل ئۆجەلانی دشێت ببیتە دەستپێکەکا گەلەک گرنگ بۆ پاشەرۆژا کوردان ل سووریێ.
ناڤهاتیێ ئەو یەک ژی دیار کر، نها چو ئاریشەیێن وەسا مەزن د ناڤبەرا هەر دو جڤاتێن کوردی یێن رۆژئاڤایێ کوردستانێ دا نینن و هەر دو جڤات ژی کار دکەن دا ب رێکێن سیاسی پرسێن هەی ل گەل شامێ چارەسەر بکەن و تورکیا ژی هەتا نها چو ئاستەنگی دروست نەکرینە و گۆت: (بەرێز مەسعود بارزانی رۆلەک سەرەکی و گرنگ بۆ ئێکەتیا ناڤمالیا کوردان ل سووریێ گێرا و شیا کاریگەریەکا گەلەک مەزن ل سەر هەلوەستێ شامێ ژی دروست بکەت، بەرپرسێن شامێ ژی نها ل دژی مافێن گەلێ کورد ل سووریێ نینن).
