مەزنە کۆمپانیێن ئورۆپی وهكو پیلێن دومینێ ب رێز دكهڤن
بهرههڤكرن: نیوار
گەلەک ژ شارەزایێن ئابووری دپرسن: «ئەرێ چ مایە بۆ ئورۆپییان کو چێبکەن؟» پشتی کو چینێ د هەمی بواران دا پێشداچوونەکا مەزن ب دەستڤە ئینایی و شیایە بازارێن جیهانێ ب گشتی و یێن ئورۆپا ب تایبەتی کۆنترۆل بکەت.
کەفتنا کۆمپانیێن مەزن:
ئابوورییا ئورۆپا ئەڤڕۆ د ناڤ کابووسەکێ دا دژیت؛ کومپانیێن وێ وەکی پارچێن دۆمینێ ل بەرامبەر ڕکابەرییا چینێ دکەڤن. بۆ نموونە، ل فەرەنسا کومپانییا «براندت» کو د بوارێ ئامیرێن ناڤمالێ دا دێرین بوو، ئیفلاسبوونا خۆ ڕاگەهاند. هەروەسا کومپانییا «نۆرسڤۆلت» کو سیمبولا پیشەسازییا پاتریان بوو ل ئورۆپا، تووشی هەمان قەدەر بوو.
ئامارێن دلتەزین:
تنێ د سالا ٢٠٢٤ێ دا، نێزیکی ٢٤ هزار کومپانییان ل ئەلمانیا ئیفلاسبوونا خۆ ڕاگەهاندییە. ل سەر ئاستێ هەمی ئورۆپایێ ژی، نێزیکی ٢٠٠ هزار کومپانی یان ئیفلاس بووینە یان ژ بازاران بەرزە بووینە، ئەڤە ژی بلندترین ڕێژەیە د دەهـ سالێن بووری دا.
پیشەسازییا ترومبێلان د مەترسیێ دا دایە:
پیشەسازییا ترومبێلان، کو شانازییا ئورۆپا بوو، نوکە د ناڤ قەیرانەکا دژوار دا دایە. ئەگەرێ سەرەکی ژی نەشیانا ڕکابەرییا کومپانیێن چینی یە، یێن کو بەرهەمێن ب کوالیتێتەکا نێزیک و ب بهایەکێ گەلەک ئەرزانتر پێشکێش دکەن. نوکە چین دو ل سەر سێیا (٢/٣) مەکینە و ترومبێلێن کارەبایی ل جیهانێ کۆنترۆل دکەت.
کونترۆلکرنا بوارێن ستراتیژی:
تنێ پیشەسازییا ترومبێلان نینە، بەلکو «ئەژدەهایێ چینی» زێدەتر ژ ٨٠٪ ژ بەرهەمێ جیهانی یێ تابلۆیێن وزەیا ڕۆژێ (Solar Panels) د دەستێن خۆ دا گرتینە. حەتا بوارێ فاشن و جلوبەرگان ژی، کو ئورۆپا ب وێ دهاتە ناسین، نوکە کەفتییە بن کارتێکرنا بەرهەمێن ئەرزان یێن چینی.
ئەنجامێن جڤاکی و ئابووری:
ئەڤ ڕەوشە بوویە ئەگەرێ بلندبوونا ڕێژەیا بێکاریێ ل ئورۆپا، ب تایبەتی ل ئەلمانیا و فرەنسا، و پەیدابوونا قەیرانەکا مەزن یا قەرزان. ڕۆژنامەیا «نیویۆرک تایمز» ئەڤێ ڕەوشێ ب «تسونامییا چینی» ناڤ دکەت کو بازارێن جیهانێ نوقوم دکەت.
ئەڤڕۆ ئورۆپی ل بەرامبەر پرسیارەکا چارەنڤسسازن: د پاشەڕۆژێ دا دێ چ بەرهەم هەبن کو ئورۆپا ب تنێ بشێت چێبکەت و ڕکابەرییا چینێ پێ بکەت؟
