مەسرور بارزانی داخوازا بنەجهكرنا شایستەیێن دارایی یێن پێشمەرگەی د بودجەیا ئیراقێ دا دكەت
سەرۆكێ حوكمەتا هەرێما كوردستانێ، وەزارەتا دارایی و شاندێ دانوستاندكارێ هەرێمێ ڕاسپاردن كو كار بۆ بنەجهكرنا شایستەیێن دارایی یێن هێزێن پێشمەرگەی د چارچۆڤەیێ خەرجییێن سەروەری یێن بودجەیا ئیراقێ دا بكەن.
فەرمانگەها میدیا و پێزانینان ل حوكمەتا هەرێما كوردستانێ بەلاڤ كر: ب مەرەما دەستەبەركرنا ماف و شایستەیێن دارایی یێن هێزێن پێشمەرگەیێ كوردستانێ، مەسرور بارزانی، سەرۆكێ حوكمەتا هەرێما كوردستانێ، د فەرمانەكا حكومی دا، وەزارەتا دارایی و ئابۆری و شاندێ بلندێ دانوستاندكارێ هەرێما كوردستانێ ڕاسپاردن، داكو كار بكەن بۆ بنەجهكركرنا خەرجییێن پێشمەرگەی د چارچۆڤەیێ خەرجییێن سەروەری یێن بودجەیا فیدرال دا.
ل گۆرەی نڤیسارەكا فەرمی یا سەرۆكاتییا جڤاتا وەزیرێن هەرێما كوردستانێ ب هەژمارا 12649 و ل ڕێكەفتێ 6 چریا ئێكێ 2026، دوپاتی ل وێ چەندێ هاتییە كرن كو هەرێما كوردستانێ ب ڕێكا پشكا خوە ل بودجەیا فیدرال پشكداریێ د دابینكرنا خەرجییێن سەروەری دا دكەت و ئەڤە خەرجییێن پێشمەرگەی ژی بخوەڤە دگریت.
د نڤیسارێ دا هاتییە دیاركرن، پێدڤییە د دانوستاندنێن بودجەیا فیدرال دا بۆ سالا 2027، كار بهێتە كرن بۆ دابینكرنا مووچە، دەرمالە و هەموو شایستەیێن دارایی یێن پێشمەرگەی ب پێڤەرێ وەكهەڤ وەك هەڤتاكێن وان ل حوكمەتا فیدرال دا. هەروەسا ئەڤ بڕیارە پڕۆژە، ڕاهێنان و پڕچەككرنێ ژی بخوەڤە دگریت.
د پشكەكا دی یا نڤیسارێ دا دوپاتی ل سەر هەماهەنگییا تمامی ل گەل فراكسیۆنێن كوردستانی ل بەغدایێ هاتییە كرن، ب مەرەما داكۆكیكرنێ ل سەر ڤێ داخوازێ د قووناغێن ئامادەكرن و پەسەندكرنا بودجەیا سالا 2027 دا.
