نێزیكێ شه‌ش هزار گه‌شتیاران سەرا هاڤینگەهێن شێلادزێ داینە
ئەڤرۆ نیوز، نەوزاد هلوری:
دهه‌رسێ روژێن جه‌ژنا ره‌مه‌زانێ دا هژماره‌كا زور یا گه‌شتیارێن ناڤه‌راست و باشوورێ عیراقێ و پارێزگه‌هێن دن یێن هه‌رێما كوردستانێ سه‌را جهێن گه‌شتوگۆزارێن ناحیا شێلادزێ دایه ب تایبه‌تى هاڤینگه‌ها ڤین و رووبارێ شین.
هەوار رێکانی، خودانێ هاڤینگەهێ بو ئەڤرۆ نیوز گوت: (نێزیکێ چوار سالایە هاڤینگەها ڤین ل شێلادزێ هاتیە دروستکرن، ئەڤ سالە بو ئێکەمجار پشتی کو نوژەنکرن لسەر هاڤینگەهێ هاتینەکرن، هژماره‌كا زێده‌تر یا گه‌شتیار و خه‌لكێ كوردستانێ قه‌ستا هاڤینگه‌ها ڤین كریه).
زێدەتر گوت: (دهەرسێ روژێن جەژنا رەمەزانێ دا نێزیکێ چوار هزار گەشتیاران سەرا هاڤینگەها ڤین کریە، پرانیا وان ژی ب رێیا کومپانیێن گەشتیاری بوون ل ناڤەراستا عیراقێ، ئەوێن دن ژی گەشتیارێن هەموو پارێزگەهـ و باژێرێن هەرێما کووردستانێ بوون).
ناڤبری دیارکر ژی کو وان ئەڤ سالە گورانکار لسەر هەموو هاڤینگەهێ دا کرینە و زێدەتر گۆت: (ئەڤ سالە کەپرێن گەشتیاری، بازار، کافیتریا، جهێن ڤەحەویانێ، مانەڤا گەشتیاران بو گەنجان، دیسان جونکاری ل هاڤینگەهێ دروستکرینە).
ژبلى سه‌را هاڤینگه‌ها ڤین دهه‌مان ده‌م دا گه‌شتیاران قه‌ستا رووبارێ شین و زێ مه‌زن و هاڤینگه‌هێن ده‌ڤه‌را زێبارێ ژى ل سنوورێ ناحیا شێلادزێ كرینه، كو كوما گشتى یا هه‌شتیاران بو پترى شه‌ش هزار گه‌شتیاران دهێنه هژمارتن.
