نێچیرڤان بارزانی و مەزلووم عەبدی رەوشا كوردان ل سووریێ گەنگەشە دكەن
ل رۆژا سێشەمبی 16/6/2026، نێچیرڤان بارزانی، سەرۆكێ هەرێما كوردستانێ، ل گەل مەزلووم عەبدی، فەرماندەیێ گشتی یێ هێزێن سووریا دیموكرات (هەسەدە) كۆمبوو.
سەرۆكاتییا هەرێما كوردستانێ د بەیاننامەیەكێ دا بەلاڤكر»د كۆمبوونێ دا، دوماهی پێشهاتێن سیاسی و ئەمنی یێن سووریێ و دەڤەرێ، رەوشا كوردان و پێكهاتەیاان ل وی وەلاتی، بزاڤێن چارەسەركرنا كێشەیان، تێكگەهشتنا د ناڤبەرا ئالیێن كوردی دا و هەماهەنگی و هاریكارییا ل گەل دیمەشقێ هاتنە گەنگەشەكرن».
سەرۆكاتییا هەرێما كوردستانێ دیاركر ژی»هەردو ئالییان دوپاتی ل سەر گرنگییا بەردەوامییا دیالۆگێ، پاراستنا ئارامیێ و دابینكرنا ئاشتیێ ل دەڤەرێ كرن. هەروەسا بەرهنگاربوونا مەترسیێن تیرۆرێ و گەشەپێدانا هەماهەنگیێ ژ بۆ پاراستنا ئارامیێ، تەوەرەكێ دی یێ كۆمبوونێ بوو».
