هاریكاری ئەركە یان دلۆڤانیە؟
سیلاڤ بازێركی
پەیڤا دلۆڤانی گەلەك گرنگترە ژ پەیڤا هاریكاری، چنكو هەكە كەسەك یێ دلۆڤان بیت، چ پێ نەڤێت دێ ژ خوڕای هاریكاریێ ژی كەت، لێ هەكە هاریكاری ئەرك بیت و وی كەسی دلۆڤانی نەبیت دبیت ئەو كەسە بێژیت (ما بۆچی ئەز؟) دناڤ كۆمەكا گەنجان دا ڕاپرسییەك هاتەكرن هەكە كەسەك ل جهەكێ گشتی د ناڤ كۆمەكا خەلكی دا پێدڤی ب هاریكاریێ بیت و هەكە كەسەك ل جهەكی پێدڤی ب هاریكاریێ بیت كۆ بتنێ كەسەك ل وی جهی بیت دێ ل كیژ جهی زووتر هاریكاری هەبیت؟ پترییا كەسان گۆت: ل وی جهێ كەسەك بتنێ لێ و دڕاستییێ دا ژی د ناڤ كۆمەكا كەسان دا كەس زوو ب زوو خوە بەرپرسیار نابینیت هەر ئێك دێ بێژیت (ما بۆچی ئەز؟) بتنێ ئەو كەسە دێ دناڤ كومەكا كەسان دا دیار بیت ئەوێ دلۆڤانی و وژدانا وی ل ئاستەكێ بەرز دابن، لێ ل جهەكێ بتنێ كۆ بتنێ ئێك كەس یێ لێ هەی هاریكاریێ بكەت هەكە دلۆڤانی و وژدانا وی د ئاستەكێ بەرز ژی دا نەبن چونكی ئەو بتنێ یێ ل جهێ هاریكاریێ دێ هاریكاریێ وەكی ئەركەك ل سەر ملێن خوە بینیت و ژ نەچاری دێ هاریكاریێ كەت، لێ هاریكارییەكا بێ دلۆڤانی ژلایێ یاسایێ ڤە هاریكاری نە ئەركە و چ سزا بۆ نەكرنا هاریكاریێ نینن لێ ژلایێ جڤاكی و مرۆڤایەتی ڤە هاریكاری ئەركە وەكی هاریكاریكرنا برای دگەل برای، هەروەسا د ئاینێ مە یێ پیرووزێ ئیسلامێ دا ئیمام موسلمی ژ پێغەمبەرێ مە (موحەممەد) سلاڤ لێ بن ڤەگوهاستیە دەمێ دبێژیت: خودێ هاریكارێ بەندە یێ خوە یە هندی ئەو بەندە هاریكارێ برایێ خوە بیت، لەوما هەكە هەتا ئەڤرۆكە ژی وژدان و دلۆڤانیا تە كار نە كربیت ژ ئەڤرۆ و وێڤە هەولبدە هەست ب وژدان و دلۆڤانیێ بكەی د ناڤ ناخێ خوە دا، داكو هەست ب ئارامییا دەروونی بكەی دناڤ وێ كۆما كەسان دا دەمێ هەموو دبێژن (ما بوچی ئەز؟) تۆ بێژە(ما بوچی ئەز نە؟) هەكە تۆ بوویە خودان وژدان و دلۆڤانی دێ هەست ب بەرپرسیارەتیێ ژی كەی.
