هـاریكاری ئـەركـە یـان دلـۆڤـانییە؟
سـیلاڤ بـازێركـی
پەیڤا دلۆڤانی گەلەك گرنگترە ژ پەیڤا هاریكاری، چنكو ئەگەر كەسەك یێ دلۆڤان بیت چپێنەڤێت دێ ژ خوڕای هاریكاریێ ژی كەت لێ ئەگەر هاریكاری ئەرك بیت و وی كەسی دلۆڤانی نەبیت دبیت ئەو كەسە بێژیت «ما بۆچی ئەز» د ناڤ كۆمەكا گەنجان دا ڕاپرسییەك هاتەكرن ئەگەر كەسەك ل جهەكێ گشتی د ناڤ كۆمەكا خەلكی دا پێدڤی ب هاریكاریێ بیت و ئەگەر كەسەك ل جهەكی پێدڤی ب هاریكاریێ بیت كو بتنێ كەسەك ل وی جهی بیت دێ ل كیش جهی زووتر هاریكاری هەبیت پترییا كەسان گۆت ل وی جهێ كەسەك بتنێ لێ و د ڕاستییێ دا ژی د ناڤ كۆمەكا كەسان دا كەس زووی ب زووی خوە بەرپرسیار نابینیت هەر ئێك دێ بێژیت «ما بۆچی ئەز» بتنێ ئەو كەسە دێ د ناڤ كۆمەكا كەسان دا دیار بیت، ئەوێ دلۆڤانی و وژدانا وی ل ئاستەكێ بەرز دابن، لێ ل جهەكێ بتنێ كو بتنێ ئێك كەس یێ لێ هەیی، هاریكاریێ بكەت ئەگەر دلۆڤانی و وژدانا وی د ئاستەكێ بەرز ژی دا نەبن، چنكی ئەو بتنێ یێ ل جهێ هاریكاریێ دێ هاریكاریێ وەكی ئەركەك ل سەر ملێن خوە بینیت و ژ نەچاری دێ هاریكاریێ كەت، لێ هاریكارییەكا بێ دلۆڤانی! ژ لایێ قانوونێ ڤە هاریكاری نە ئەركە و چ سزا بۆ نەكرنا هاریكاریێ نینن لێ ژلایێ جڤاكی و مرۆڤایەتی ڤە هاریكاری ئەركە وەكی هاریكاریكرنا برای دگەل برای هەروەسا د ئاینێ مەیێ پیرۆزێ ئیسلامێ دا ئیمام موسلمی ژ پێغەمبەرێ مە (موحەممەد) ـ سلاڤ لێبن ـ ڤەگوهاستیە دەمێ دبێژیت:»خودێ هاریكارێ بەندەیێ خوە یە هندی ئەو بەندە هاریكارێ برایێ خوە بیت «لەوما ئەگەر هەتا ئەڤرۆكە ژی وژدان و دلۆڤانیا تە كار نە كربیت ژ ئەڤرۆ و وێڤە هەول بدە هەست ب وژدان و دلۆڤانیێ بكەی د ناڤ ناخێ خوە دا، داكو هەست ب ئارامییا دەروونی بكەی د ناڤ وێ كۆما كەسان دا دەمێ هەمی دبێژن «ما بۆچی ئەز» تو بێژە» ما بۆچی ئەز نە؟» ئەگەر تۆ بوویە خۆدان وژدان و دلۆڤانی دێ هەست ب بەرپرسیارەتیێ ژی كەی.
