هه‌تا كه‌نگی نڤیسكار و هونه‌رمه‌ندێن مه دێ ژ هەژاری مرن؟
عه‌بدولخالق سولتان
د ڤان رۆژان دا هه‌ڤالێ مه یێ خۆشتڤی و رحسڤك هونه‌رمه‌ند «عبدالسلام سلێمان» وه‌غه‌را داویێ كر و خه‌م و كۆڤانه‌كا مه‌زن ڤە، باژارێ دهۆكێ هه‌می ڤه‌گرت. ژبه‌ركو ئه‌ڤی هونه‌رمه‌ندی وه‌كی گه‌له‌ك ره‌وشه‌نبیر و نڤیسكارێن دی یێن ڤی باژاری، رۆژێن ژیانا خۆ كتكته قوربانی بزاڤا ره‌وشه‌نبیری و هونه‌ری یا باژێری كرینه. له‌ورا خه‌لكێ دهۆكێ هه‌میان هه‌ست ب نه‌خۆشیا باركرنا وی كرن.
ره‌حمه‌تی ژی وه‌كی گه‌له‌ك ره‌وشه‌نبیرێن دی یێن ده‌ڤه‌را به‌هدینان ب كۆمه‌كا كول و كوڤانان باركر! ژبه‌ركو خۆدان نه‌فسه‌كا خۆراگربوو، نه دڤیا خۆ ل به‌رانبەر وان نه‌خۆشی و ئاسته‌نگێن ژیانا وی ته‌نگ و نه‌خۆشكری بچه‌مینیت. وی به‌روڤاژی گه‌له‌ك كه‌سێن نهۆ ل سه‌ر ته‌خا ره‌وشه‌نبیر و نڤیسه‌ران دهێنه هژمارتن، ده‌ستێ خۆ ل به‌ر كه‌سێ درێژ نه‌كر. سه‌ره‌رای كو كاودانێن ژیانا وی یێن ساخلەمی و ئابۆری د ره‌وشه‌كا گه‌له‌ك سه‌خت و دژوار دا دبۆرین! نوكه ژی گه‌له‌ك نڤیسكار و هونه‌رمه‌ند هه‌نه، ره‌وشا وان یا ده‌روونی و ئابۆری مینا یا ره‌حمه‌تی عەبدولسەلامینه، به‌لێ ژ خۆناگرن خۆ ره‌زیل و مه‌لیل بێ روی و چاڤ بكه‌ن و ل به‌ر ده‌رێ به‌رپرس و كه‌سانێن ده‌وله‌مه‌ندان رابوه‌ستن، داكو هاریكاریان بده‌نێ.
پرسیار ل ڤێرێ ئه‌وه، هه‌تا كه‌نگی ته‌خا نڤیسكار و هونه‌رمه‌دان د ناڤ جڤاكێ دا دێ یا چه‌میای و ڤه‌چغاندی بیت؟ و هه‌رده‌م دڤێـت نڤیسكار یان هونه‌رمه‌ند خۆ وه‌كۆ لێبۆكوكێ بكه‌ت، دا بشێت ره‌زامه‌ندیا ده‌وله‌مه‌نده‌‌كی یان به‌رپرسه‌كی وه‌ربگریت بۆ دابینكرنا ده‌بارا ژیانا خۆ؟ بۆچی دڤێت ئه‌ڤ ته‌خه د ناڤ جڤاكێ دا وه‌سا یا شكه‌ستی و بێ زاخ و هژهژۆك بیت؟ و هه‌رده‌م پێدڤی ب خێر و زكات و هاریكاریان بیت؟
به‌ری ئه‌م به‌رسڤا ئه‌ڤان پرسان بده‌ین، فه‌ره چه‌نده‌كێ ل سه‌ر رۆلێ ئه‌ڤێ ته‌خێ بئاخڤین، ئه‌گه‌ر ئه‌ڤ ته‌خه د ناڤ جڤاكێ دا لاوازبوو یان هاته پشتگوهاڤێتن و ژبیركرن. دێ ره‌وشا جڤاكێ یا چا‌وا بیت؟
گومان تێدا نینه ئه‌ڤ كه‌سنه د هه‌ر جهه‌كی دا مه‌شخه‌لا جوانیێ و داهێنانێ و نویكرنێ هه‌لدگرن. هه‌ر ئه‌ون بزاڤێن هزری دلڤینن و گۆمێن مه‌ند دشلقینن و جڤاكی ژ خه‌وا گران هشیار دكه‌ن و مه‌ترسیان ددانه ل به‌رچاڤێن جڤاكی و ده‌ستهه‌لاتێ.
دیسا ره‌وشه‌نبیرن ب هزرێن خۆ یێن پیشه‌نگ و ئاینده‌بر پیڤاژۆیا گه‌ل و ملله‌تان به‌ر ب پێشڤه دبن و هه‌ستێ جوانیێ و مرۆڤاتیێ ب په‌یڤ و رسته و لڤین و مۆزیك و كه‌ڤالێن خۆ به‌رچاڤ دكه‌ن. ئه‌ڤجا ب نه‌بوونا وان یان لاوازكرنا وان دێ جڤاك د ناڤ شكه‌فته‌كا تاری و سار دا مینن. به‌رچاڤكرن و ئازراندنا جیهانا هه‌ستان تا راده‌یه‌كێ مه‌زن یا گرێدای هه‌بوونا ئه‌ڤان كه‌سانه، و كار و كریارێن وان دبنه پارچه‌یه‌كا مه‌زن ژ جیهان و كولتوور و ناسنامه و هه‌بوونا هه‌ر ملله‌ته‌كی. له‌ورا فه‌ره بهایێ ئه‌ڤێ ته‌خه‌یا نازك ل به‌رچاڤ بهێته وه‌رگرتن و مێژوویێ سه‌لماندیه كو هه‌می ده‌ستهه‌لات و شاه و قه‌یسه‌رێن و میرێن جیهانێ رێزه‌كا تایبه‌ت دایه ئه‌ڤێ ته‌خێ و ب نه‌رماتی ره‌فتار د گه‌ل دا كریه، ژبه‌ر رۆلێ وان یێ گرنك و مه‌ترسیدار د ناڤ جڤاكێ دا.
فه‌ره ئه‌ڤ ته‌خه د ئاسته‌كێ ژیارێ یێ باش دا بژیت. نا بێژین بلا هه‌می ده‌وله‌مه‌ند و زه‌نگین و خۆدان ڤله و تاوه‌ر بن. به‌لكو دڤێت ئه‌وان بنه‌مایێن ژیانه‌كا سه‌ربه‌ست و سه‌رفه‌راز هه‌بن. خانیه‌ك و ترومبێله‌ك و مووچه‌یه‌ك، دا هەوجه‌ی كه‌سكێ دی نه‌بیت. نه‌ك بهایێ كرینا ده‌رمانان نه‌بیت كو پێ چاره‌سه‌ریا خۆ یان زارۆكه‌كێ خۆ بكه‌ت!
د ئه‌ڤان هه‌یامان دا كۆمه‌كا نڤیسكار و هونه‌رمه‌ندێن ده‌ڤه‌را مه وه‌غه‌ركرن و پشتی مرنا وان باژار هه‌می ب چوونا وان كاریگه‌ر و نه‌خۆش دبیت. به‌لێ جهێ داخێ یه كو د ده‌مێ مرنا وان دا دیار دبیت، كو ئه‌وان ژبه‌ر چه‌ندین گرفتێن ئابۆری و ده‌روونی و هه‌ژاریێ ژیانا خۆ ژ ده‌ست دایه! و یا ژ ئه‌ڤێ دلئێشتر ئه‌وه خێزانه‌كا هه‌ژار و ده‌ست كورت ل پشت خۆ دهێلن!
له‌ورا دێ بێژین ئه‌ڤ كه‌سانێن هه‌نێ پێدڤیه هێژ یێن ساخ د ژیانا وان دا رێز لێ بهێته‌گرتن. نه‌ك تنێ ده‌مێ وه‌غه‌ر دكه‌ن وێنه‌یێن وان د په‌یجێن سۆشیال میدیایێ به‌لاڤكه‌ن و كۆمبوونان ل سه‌ر گۆرێن وان بكه‌ن و پاش وه‌كی هه‌ر كه‌سه‌كێ دی بهێنه ژبیركرن! رێزگرتنا وان ژی نه د وێ چه‌ندێ دایه فێستیڤاله‌ك یان ئاهه‌نگه‌ك بۆ ئه‌نجامده‌ن. به‌لكو دڤێت ژیاره‌كا باش بۆ بهێته دابینكرن، كو پێدڤی نه‌بیت وه‌كی خوازخوازۆكان ل به‌رده‌گه‌هێن به‌رپرسان یان د په‌یجێن سۆشیال میدیایێ دا ستویێ خۆ خوار بكه‌ت و داخوازا هاریكاریێ بكه‌ت دا چاڤێن خۆ یان گولچیسكێن خۆ چاره‌سه‌ر بكه‌ت.
