هۆشداریێ ددەتە بەرپرسێن ئیرانێ
ئەبولقاسم جەرارە ئەندامێ پەرلەمانێ ئیرانێ دیار کر، ئەمریکا دڤێت دەرتەنگا هۆرمزێ ژ دەستێ ئیرانێ دەرخینیت و پاشی ژی وەکو کارتەکا بهێز ل دژی ئیرانێ بۆ دانوستاندنان بکار بینیت، ژ بەر ڤێ یەکێ ژی نابیت بەرپرسێن ئیرانێ رێ بدەن تشتەک وەسا روو بدەت.
ناڤهاتی ئەو یەک ژی دیار کر، د رەوشا نها دا نابیت ب چو رەنگەکێ ل گەل ئەمریکا دانوستاندن بهێنە کرن، یێن بەحسێ دانوستاندنان ژی دکەن دڤێت بهێنە سزا دان، چونکی د رەوشا نها دا دانوستاندنێن ل گەل ئەمریکا چو ئەنجامێن خوە نابن و ئەمریکا دڤێت ل ژێر ناڤێ دانوستاندنان ئیران خوە رادەست بکەت.
ئەو یەک د دەمەکێ دایە کو بەری نها محەمەد باقر قالیباف سەرۆکێ پەرلەمانێ ئیرانێ دیار کربوو، هندەک هێز ل ئیرانێ دخوازن شەڕ بەردەوام بیت و وان دڤێت ئیران ب تەمامی وێران بیت و کەسێن وەسا مەترسیدارن و دڤێت دانوستاندنێن ل گەل ئەمریکا بەردەوام بن.
