هێمن هەورامی: چو بەهانە بۆ كارا نەكرنا پەرلەمانێ كوردستانێ نەماینە
هێمن هەورامی ل پیرمام ب جودا ل گەل قونسلێ گشتی یێ ژاپۆنێ و شیرەتكارا سیاسی یا هێزێن ئەلمانیایێ ل ئیراقێ و هەرێما كوردستانێ كۆمبوو و پرسا كاراكرنا پەرلەمانێ كوردستانێ گەنگەشە كر.
هێمن هەورامی، ئەندامێ مەكتەبا سیاسی یا پارتی دیموكراتی كوردستان ل سەر هەژمارا خۆ یا فەرمی یا فەیسبووكی بەلاڤ كر، دگەل هیتۆشی ئیشیزوكا، قونسلێ گشتی یێ ژاپۆنێ و تۆمۆهیرۆ ماتسوشیما، بەرپرسێ كارێن سیاسی یێ بالیۆزخانەیا ژاپۆنێ ل ئیراقێ كۆمبوویە. هەروەسا د دیدارەكا دی دا، پێشوازی ل لویسیا، شیرەتكارا سیاسی یا هێزێن ئەلمانیایێ ل ئیراقێ و هەرێما كوردستانێ كر.
هێمن هەورامی گۆت: گەنگەشە ل دۆر دووماهی پێشهاتێن سیاسی یێن ناڤخۆ یێن هەرێما كوردستانێ هاتە كرن و ئاماژە ب وێ دا، پشتی 20 مەهان ژ ئەنجامدانا هەلبژارتنێن پەرلەمانێ كوردستانێ، پارتی وەك هێزا ئێكێ یا سەركەفتی، هەمی بزاڤێن خۆ ب رێیا كۆمبوونێن دووقۆلی و فرەقۆلی و پەیامان ب كار ئیناینە دا كو رێككەفتن بهێتە كرن و پەرلەمان كارا ببیت و ئەركێن خۆ یێن دەستووری و یاسایی بحهبینیت.
ناڤبری گۆت ژی: «نوكە چو بەهانەیەكا سیاسی، یاسایی و نیشتمانی بۆ كارا نەبوونا پەرلەمانی نەماینە، لەورا هەموو ئالیێن سیاسی یێن خودان كورسی د پەرلەمانی دا، ل بەرامبەر بەرپرسیارەتییەكا دیرۆكی دانە بۆ كاراكرنا پەرلەمانی و پاراستنا قەوارەیا هەرێما كوردستانێ».
د ڤی چوارچوڤەی دا، هێمن هەورامی بەرهەڤییا تەڤایا پارتی دیموكراتی كوردستان بۆ پشكداریكرنێ د روونشتنێن پەرلەمانێ كوردستانێ دا دیار كر و راگەهاند: «هەكە هەر ئالییەكێ دی ب رێككەفتنەكێ یان ب هەر رێكارەكێ خۆ ب خودانێ زۆرینەیێ یان وەكهەڤییا كورسیێن پارتی دزانیت، بلا بهێتە د ناڤ پەرلەمانەكێ كارا دا و ل وێرێ درێژەیێ ب گەنگەشەیێن سیاسی بدەین».
هەروەسا ئاماژە ب وێ دا كو هەر خۆدزینەك ژ ڤی پرسی، ب رامانا پشتگوه هاڤێتنا دەنگێ دەنگدەران و ب بارمتەگرتنا پەرلەمانێ كوردستانێ دهێت.
