هەتا نها چ ڕێككەفتن د ناڤبەرا هەولێرێ و بەغدایێ دا ل دۆر دابینكرنا بەڕەڤانییا ئەسمانی نەهاتینە كرن
شیرەتكارێ لەشكەری یێ سەرۆكوەزیرێن ئیراقێ ڕاگەهاند، سەرەڕای داخوازێن هەرێما كوردستانێ بۆ دابینكرنا سیستەمێ دژە مووشەك و بەڕەڤانییا ئەسمانی، لێ ژ بەر مەرجێن بەغدایێ، هەتا نها چ ڕێككەفتن د ناڤبەرا هەولێرێ و بەغدایێ دا ل ڤی بواری نەهاتییە ئەنجامدان.
لیوا عەبدولخالق تەلعەت، شیرەتكارێ لەشكەری یێ سەرۆكوەزیرێن ئیراقێ، ئاماژە ب وێ دا كو د دەمێ خوە دا داخواز ژ ئەمریكا هاتبوو كرن سیستەمێ دژە مووشەك بۆ هەرێما كوردستانێ دابین بكەت، لێ ب ل بەرچاڤ وەرگرتنا ڕێككەفتنا بەری نها یا د ناڤبەرا واشنتۆن و بەغدایێ دا كو ڕێ نەددا بێ ڕازیبوونا فیدرالی چەكێ پێشكەفتی بدەنە هەرێما كوردستانێ، ئەڤ پرسە هاتە پاشئێخستن بۆ دەمێ ڤەكێشانا هەڤپەیمانان، د دەمەكی دا نها ڕەوش هاتییە
گوهۆڕین و هەرێما كوردستانێ هێشتا پێدڤی ب وی سیستەمی هەیە.
ل دۆر ئەگەرێ نەگەهشتنێ ب ڕێككەفتنێ، ڕۆهن كر كو حوكمەتا فیدرالی بتنێ ب مەرجێن تایبەت ڕازیبوونێ ددەت، لەوما نها دانوستاندن ب هەلاویستی ماینە.
