هەرێما كوردستانێ داخوازا بجهئینانا رێككەفتنا شنگالێ و پشتەڤانییا پتر یا ئاوارەیان دكەت
رێبەر ئەحمەد، وەزیرێ ناڤخۆ یێ هەرێما كوردستانێ، د پەیڤەكێ دا ب هەلكەفتا رۆژا جیهانییا پەنابەران ئاماژە ب وێ چەندێ كر كو د ڤی رۆژی دا، تنێ وەك هەژمار ل ئاوارەیان نانێڕن، بەلكۆ رێزێ ل گیانێ مرۆڤی و ئازایەتییا وان ملیۆن كەسان دگرن یێن ژ بەر ستەم و تیرۆرێ مالێن خۆ بجهـ هێلاین.
ناڤبری راگەهاند: «ب درێژاهییا چەندین سالان، هەرێما كوردستانێ بوویە پەناگەهەكا جوگرافی یا ئارام و جهەكێ شكۆمەند بۆ هەموو وان كەسێن یێن ژ ستەمێ رەڤین».
وەزیرێ ناڤخۆ ئاشكرا كر، هەرێما كوردستانێ پتر ژ دو ملیۆن و 500 هزار ئاوارە و پەنابەر حەواندبوون، ئەڤ كارە د بن سەرپەرشتییا مەسرور بارزانی، سەرۆكێ حوكمەتا هەرێما كوردستانێ و نێچیرڤان بارزانی، سەرۆكێ هەرێما كوردستانێ دا هاتییە ئەنجامدان، یێن كو هەموو دەزگەه و شیانێن خۆ تەرخانكرین دا چ پەنابەرەك بێ هیڤی نەبیت.
رێبەر ئەحمەد باس ل وێ چەندێ ژی كر، هەرێما كوردستانێ سەرەڕای هەموو ئاستەنگان، نها نێزیكی ملیۆن ئاوارەیان د حەوینیت، ئەڤە د دەمەكێ دایە كو هەڤكارییا نێڤدەولەتی كێم بوویە، لەورا گڤاشتنەكا مەزن كەفتییە سەر كەرتێن پەروەردەیێ و ساخلەمیێ.
هەروەسا ئاماژە ب وێ چەندێ كر كو ژ سالا 2023 ڤە سیستەمەكێ تۆماركرنا هەمەلایەنە بۆ ئاوارەیان ب كار دئینن كو ل دووڤ ستانداردێن نێڤدەولەتی یە، گۆت ژی: حوكمەتا هەرێما كوردستانێ هەموو ب ساناهیئێخستنا كاران بۆ ئاوارەیان كرینە ژ بۆ ب لەز گەهشتن ب پێدڤیێن سەرەكی، د هەمان دەم دا رۆلێ «دەزگەهێ خێرخوازی یێ بارزانی» د هەڤكاریكرنا ئاوارەیان د ناڤ كەمپان دا، بلند هەلسەنگاند.
رێبەر ئەحمەد داخواز ژ حوكمەتا نوو یا ئیراقێ كر كو پێگیری سۆزێن خۆ بیت و بودجەیا پێدڤی بۆ چارەسەركرنا ئاریشەیێن ئاوارەیان تەرخان بكەت. هەروەسا داخواز ژ جڤاكێ نێڤدەولەتی و نەتەوەیێن ئێكگرتی كر كو ئاستێ هەڤكاریێن خو كێم نەكەن، بەلكۆ وەبەرهێنانێ د بهێزكرنا شیانێن بەرگرییا ئاوارەیان دا بكەن، ژ بەر كو ئەركێ مرۆڤایەتی دڤێت هەڤپشك بیت و تنێ ل سەر ملێن جڤاكێ حواندنێ دكەت نەبیت.
د پشكەكا دی یا ئاخڤتنا خو دا، وەزیرێ ناڤخۆ سەرنج ئێخستە سەر كارەساتا شنگالێ و راگەهاند: «پشتی چەندین سالان ل سەر جینوسایدا ئێزدییان، هێشتا رێككەفتنا شنگالێ نەهاتیە بجهئینان». دوپاتی ل وێ چەندێ ژی كر كو دڤێت ئاوارە ب رێزڤە ڤەگەرن بۆ سەر مال و حالێن خۆ و بۆ ڤێ مەرەمێ ژی دڤێت ئاسایش و ئاڤەدانكرن بۆ دەڤەرێن وان دابین ببیت.
رێبەر ئەحمەد دوپات كر كو دەرگەهێن هەرێما كوردستانێ د ڤەكری دمینن بۆ هەموو وان یێن ل دووڤ ئارامی و سەلامەتیێ دگەڕهن و حوكمەتا هەرێمێ د سەر ڤی پەیامێ مرۆڤایەتی یا خو دا دێ بەردەوام دبیت.
