هەژمارەكا پێشنیاران بۆ بیڤەلەرزان هاتینە دیار كرن
ئەڤرۆ، زنار تۆڤی:
شیرەتكارێ سەرۆكاتیا جڤاتا وەزیرێن هەرێما كوردستانێ بۆ رۆژناما ئەڤرۆ دیار كر، هەژمارەكا پێشنیاران بۆ پاراستنا پڕۆژێن هەرێما كوردستانێ ژ بیڤەلەرزان هاتینە كرن.
د. بێوار خنسی، شیرەتكارێ سەرۆكاتیا جڤاتا وەزیرێن هەرێما كوردستانێ خویا كر، بیڤەلەرزان كارتێكرن ل سەر ژین و ژیارا خەلكی هەیە و شێوازێ چێكرنا ئاڤاهیان ژی دێ هێتە گوهۆڕین و گۆت: «هەرێما كوردستانێ ژی كەفتیە د كەمەرەكا بیڤەلەرزان دا كو چییایێن زاگرۆس و توروس و دەریا عەقەبە و لوبنان دكەڤنە دناڤا وێ كەمەرێ دا».
گۆتژی: «بیڤەلەرز روودانەكا سرۆشتییە و كەس نەشێت راگریت، بەلێ دڤێت ئەم ژی خوە بەرهەڤ بكەین، داكو كێمترین زیانان بدەین، دڤێت دووڤچوونەك بۆ بابەتێ بیڤەلەرزان هەبیت و تۆرەكا راستا بیڤەلەرزان ل هەموو كوردستانێ بهێتە دانان و یا پێكڤە گرێدایی بیت، رۆژانە هەموو ئەو لەرزینێن چێدبن بهێنە تۆمار كرن، ژ پێخەمەت بزانین ئەو لەرزینە پتر ل كیرێ پەیدا دبن و بزاڤێ بكەین خۆ ژ وان جهان دوور بێخین».
د. بێوار خنسی ئاشكرا كر، بیڤەلەرز ئێكسەر پەیدا نابن، بەری هینگێ هندەك نیشان هەنە، گرێدای ب ئەردیڤە، وەكو: پلێن گەرماتیێ و كارەبایی و مەگناتیسی، دیسا بەری بیڤەلەرز روو بدەن، هندەك جاران مفا ژ لڤینێن گیانەوەران دهێتە وەرگرتن، چونكی بەری بیڤەلەرز روو بدەت ئەو هەست پێ دكەن و مرۆڤ دشێت مفای ژ وان تشتان وەربگریت.
