وەرزێ کوشتنا کولیلکان
دەیکا دالیایێ
ل بهارێ
هەناسەیێن سێوی غاردانێ دکەن
گڕنژینێ لسەر لێڤێن عەوران دکوزرینن
گیا، گول دگەردەنا ئەڤی وەرزی دا
دبنە شۆرەش و ئێک و دو دخۆن و
گازندا ژبێ دلۆڤانییا ئەسمانی دکەن
بەلاتینک تێر خوناڤا گولێن کەهی ناڤەخۆن…
ئەنفال دڤی وەرزی دا
دبیتە سەمفۆنییەکا بێ دەنگ و
کراسێ خوە یێ گولگولی
ژبەر خۆ دکەت و
کراسەکێ رەش وتەڕ ژ ڕۆندکان
دکەتە بەر خۆ…
……..
رەندا منێ
دەنگێ تە زێمارەکە
د گوهێن مندا ناهێتە دەر
ئاوریێن چاڤێن تە
خەونەکا تەمەت چیایە
دێمێ تە
کۆڤان وحەسرەت ژێ دبارن
پەیڤ دگەورییا تەدا
قاچاخ دبن
پرچا تە یا زەڤییا گەنمی
خۆ لبەر تاڤیێن هارێن بهارێ ناگریت
کا بێژە من پەرییا شەڤێ
د دلێ تەدا، د هزرێن تەدا
دبەرپەڕێ مێژوویێ دا
تو بوویە قوربانییا چەندێ
دڤی شەڕی دا؟
