وەزیرێ پەروەردەیێ: ل ڕۆژێن بهێن ژڤانێ دەستپێكرنا سالا نوو یا خواندنێ دێ هێتە دیاركرن
وەزیرێ پەروەردەیێ یێ حوكمەتا هەرێما كوردستانێ ئاشكرا كر، هەموو بەرهەڤیەك ژ بۆی دەستپێكرنا سالا نوو یا خواندنێ هاتینە كرن و دبێژیت: ل رۆژێن بهێن دێ جڤاتا وەزارەتێ كۆم بیت و بڕیارێ ل دۆر دەستپێكا سالا نوو یا خواندنێ دەت.
ئالان حەمە سەعید، وەزیرێ پەروەردەیێ بۆ رۆژناما ئەڤرۆ دیاركر، بەرهەڤی بۆ دەستپێكرنا سالا نوو یا خواندنێ هاتینە كرن و لسەر ئاستێ رێڤەبەریێن گشتی یێن پەروەردەیان بەرهەڤی دهێنە كرن و گۆت: «ل رۆژێن بهێن كۆمبوونا جڤاتا وەزارەتا پەروەردەیێ دێ هێتە كرن و تێدا دەستپێكرنا سالا نوو یا خواندنێ هێتە دیاركرن، پرۆسێسا بەرهەڤیان بۆ دەستپێكرنا سالا خواندنێ یا بەردەوامە، ژ دابینكرنا پرتووكان و رێكخستنا میلاكێ قوتابخانەیان، هەروەسا راهێنان ب مامۆستایان و گوهۆڕینا پرۆگرامێن خواندنێ».
ئالان حەمە سەعید گۆت ژی: «د كۆمبوونا جڤاتا وەزارەتێ دا، دێ خشتەیێ سالا نوو یا خواندنێ ب تەمامی هێتە دیاركرن، هەر تشتەك د شیان دابیت بۆ پێشڤەبرنا كەرتێ پەروەردەیێ و پرۆسێسا خواندنێ دێ هێتە ئەنجامدان، هەر ژ دامەزراندنا مامۆستایان و گوهۆڕینا پرۆگرامێن خواندنێ هەتا دووماهیێ، راهێنان ب مامۆستایان ژی دهێتە كرن، ژ بۆی بلندكرنا ئاستێ وان یێ زانستی و بەرهەڤكرن بۆ سالا نوو یا خواندنێ».
