پارێزگەهبوونا شنگال بوویە حوبر سەر كاغەزێ
ئەڤرۆ، سالار دۆسكی:
قایمقامێ قەزا شنگال ئاشكراكر كو هەتا نوكە بتنێ 10% ژ خەلكێ شنگالێ ڤەگەریاینە سەر جهێن خوە و پارێزگه‌هبوونا شنگالێ ژی بوویە حوبر سەر كاغەزێ.
مەحما خەلیل، قايمقامێ قەزا شنگال بۆ ئەڤرۆنيوز گۆت”هێشتا خەلك نەزڤریە سەر مولك و مالێ خوە ژ بەر ململانێ یا سیاسی و ئەڤ دورپێچا ل سەر خەلكێ دەڤەرێ هەی و هاتنا حەشدا شەعبی بۆ دەڤەرێ ومانا پەكەكێ ل شنگالێ خەلك باوەرناكەت تەناهی ل دەڤەرێ دروست ببیت و ناچنە سەر جهێن خوە، حوكمەتا عیراقێ ژی چو پلان بۆ ئاڤەدانكرنا شنگالێ نەهاڤێتنیە و هەتا بۆ شەهید و گورێن ب كۆم و ئاوارێن شنگالێ ژی چو نەهاتیەكرن ژلایێ حوكمەتا عیراقێ ڤە”.
قایمقامێ قەزا شنگالێ ئەو ژی گۆت: هەتا نوكە 10% خەلكێ شنگالێ ڤەگەریایە سەر جهێن خوە و خەلكی ئێدی باوەری نینە بزڤریت.
محما خەلیل دياركر هەتا نوكە لایەنگرێن سەر ب پەكەكێ ڤە ل شنگالێ ماینە، ب ده‌هان كۆمبوون مە ل گەل سەرۆك كۆمار، سەرۆكێ پەرلەمانی، سەرۆكێ حوكمەتێ ئەنجامداینە، هەموو رژدیێ ل سەر ئاڤەدانكرنا شنگالێ و شەرعەیەتا شنگالێ بهێتە پاراستن دكەن، بەلێ هەتا نوكە حوكمەتا بەغدا چو نەكریە و دبەرژوەندیا وێ دایە چو بۆ شنگالێ نەهێتەكرن.
مه‌حماى ئەو ژی خواست ل گۆرەی دەستوری ئاشتی و ئارامی ل شنگالێ بهێتە دروستكرن دا خەلك ژی ڤەگەریتە سەر مولك و مالێ خوە و ژیان ل شنگال ئاسایی بیتە ڤە.
ل دۆر پارێزگەهبوونا شنگالێ ژی، ناڤبری دیاركر كو هەتا نوكە بتنێ حوبرێ سەر كاغەزێ يه.
