پارێزەرێ یانەیا دهۆك: هەر جارەكا دهۆك هاتیە سزادان تانەدانا بڕیارێ سەرگرتییە
د داخویانییەكێ دا زنار زوبێر پارێزەرێ یانەیا دهۆك یا وەرزشی دیاركر هەردەمێ سزایەكا دژی یانەیێ، یان كادرێ تیمێ و جەماوەرێ ژلایێ فدراسیۆنا فوتبۆلا ئیراقێ هاتبیە دەركرن، وەكو پارێزەرێ یانەیێ مە ب بەلگە كار ل سەر تانەدانێ كرییە و شیایینە بڕیارێ ب هەلوەشینین یان كێم بكەین.
زێدەتر ناڤهاتی بۆ رۆژنامەیا ئەڤرۆ گۆت: پێنەڤێت وەكو ئەركێ مە یێ پارێزەریێ ل یانەیێ دۆڤچوونا لایەنێ یاسایی و بڕیارێن دژی یانەیێ دهێنە دان بكەین، د ماوەیێ سێ سالێن بۆری دا چار بڕیار دژی یانەیێ هاتبوونە دەركرن ژلایێ فدراسیۆنا فوتبۆلا ئیراقێ، هەكە بڕیار دژی یاریزانی یان ڕاهێنەری هاتبا مە ب بەلگە و داتا تێهەلچوونا بڕیارێ دكر بۆ تانەدانا وێ بڕیارێ، هەروەسان هەكە دژی جەماوەری بڕیارەك دەركربا ب بەلگەیێن یاسایی و دادگەهێ بۆ لژنەیا ڕێكاریێ ل فدراسیۆنا فوتبۆلا ئیراقێ دهاتە بەرهەڤكرن، ئەو كەسێ توندوتیژی دناڤا یاریگەهێ دكەت نوونەراتییا زێدەتری 23 هزار ژ جەماوەرێ یانەیێ ناكەت و چو گونەها خوە نینە بۆ سزادانا گشتی.
ژلایەكێ دووڤە زنار زوبیر گۆت: بڕیارا ڤێ دووماهیێ یا كێمكرنا سزایێن جەماوەری ژ شەش یارییان بۆ سێ یارییان هەر ل سەر ڕاسپاردا كارگێرییا یانەیێ مە هەر بەلگەكێ پێدڤی ژ دادگەهێ و جهێن پەیوەندیدار كۆمڤەكرین ب تانەدانا وێ بڕیاری شیاین ڤێ سزایی كێم بكەین، بۆ زانین هەر تێكهەلچوونەكا بڕیارەكێ بۆ مەرەما تانەدانێ ب سانەهی نینە لێ ڕژدییا مە و كۆمكرنا بەلگەیێن پێدڤی شیاینە تا ڕادەیەكێ باش سزایان سڤكبكەین لێ یا گرنگ ئەوە جەماوەرێ مە ئاگەهداربیت بۆ هەر توندوتیژیەكێ و سەرخوەبن ددەمێ یارییان دا، شاشیێن دادڤانان و لڤینێن تیما بەرانبەر دژی وان بیتە ئەگەرێ خالێن نەرێنی ل سەر وان و سزایێن گران بهێنە دانان، هەردەم جەماوەرێ مە خودان ڕەوشتەكێ پاك و بلندە و وەفادارە بۆ یانەیا خوە.
