پشتی 12 سالان، چارەنڤیسێ پتر ژ 2500 ئێزدییان هێشتا نەدیارە و ئیراق خۆ ب خودانا ڤێ بادەکێ نابینیت
بەرپرسێ نڤیسینگەها رزگاركرنا رەڤاندیان ل هەرێما كوردستانێ دوپاتی ل سەر بەردەوامبوونا بزاڤان بۆ رزگاركرنا رەڤاندیێن ئێزدی ئەوێن ماین دكەت.
حسێن قائیدی، بەرپرسێ نڤیسینگەها رزگاركرنا رەڤاندیێن دەستێ داعش -كو نڤیسینگەها وی سەر ب نڤیسینگەها تایبەت یا سەرۆكێ هەرێما كوردستانێ ڤەیە گۆت ژی» ب راسپاردە و رێنماییێن راستەوخۆ یێن نێچیرڤان بارزانی، پڕۆسەیا گەڕیان و ڕزگاركرنا كوردێن ئێزدیێن رەڤاندی یا بەردەوامە و دوپات كر كو «هەتا ئێك رەڤاندی مابیت، ئەم د بزاڤێن خوە دا بەردەوام دبین».
حسێن قائیدی ئامارێن نوو یێن رەڤاندیان بەرچاڤكرن و راگەهاند» ژ دەستپێكا جینۆسایدێ دژی كوردێن ئێزدی ل سالا 2014ێ ، نڤیسینگەها وان شییا ناڤێن شەش هزار و 417 رەڤاندییان تومار بكەت كو د ناڤ وان دا ژن، زارۆك و زەلام هەبوون، ئاماژە ب وێ ژی دا»ژ وێ دەمێ تا نوكە، ئەم شییاینە سێ هزار و 595 كەسان ژ دەستێ داعش رزگار بكەین و ڤەگەڕینینە ناڤ خێزانێن وان».
بەرپرسێ نڤیسینگەها رزگاركرنا رەڤاندیان هۆشداری دا كو پشتی 12 سالان، هێشتا پتر ژ دو هزار و 500 ئێزدی بێسەروشووونن و چارەنڤیسێ وان نەدیارە. رەخنە ل حوكمەتا فیدرال یا ئیراقێ ژی گرت كو «وەك پێدڤی خۆ ب خودانا ڤێ دۆسیێ نەزانییە» و گۆت، هەتا نوكە ئیراق نەبوویە ئەندامێ رێككەفتننامەیا رۆما دا بشێت ل سەر ئاستێ نێڤدەولەتی كار ل سەر ڤی كەیسێ بكەت، هەروەسا چەندین گۆرێن ب كۆم ل باشوورێ شنگالێ هەنە كو هەتا نوكە نەهاتینە هەلدان.
ل دۆر رەوشا مرۆڤایەتی یا ئاوارەیان، قائیدی ئاماژە ب وێ دا كو پشتی سالا 2018، زۆرترین رێككەفتننامەیێن نێڤدەولەتی و رێكخراوێن نەحكومی هەرێما كوردستانێ بجهـ هێلاینە ژ بەر كو وەسا ددیتن رەوش هاتییە ئاساییكرن، بەلێ گۆت: «خەلكەكێ مەزن هێشتا ل بن خیڤەتان دا نە و 12 سالە خیڤەتێن وان نەهاتینە گۆهۆڕین. ئەو د هاڤینان دا ل بەر گەرمێ و د زڤستانێ دا ل بەر سەرمایێ دنالینن و پێدڤی ب هاریكارییا بەردەوامن».
ل پشكەكا دی یا ئاخڤتنێن خوە دا، حسێن قائیدی باسێ بزاڤێن یاسایی كر بۆ نیاسینا جینۆسایدێ ل ئاستێ جیهانی و راگەهاند، ب هەڤكارییا رێكخراوا «یونیتاد» و وەزارەتا ناڤخۆیا هەرێما كوردستانێ، هزاران بەلگەنامەیێن ڤیدیۆیی و نڤێسار ب شێوەیێ دیجیتالی و ل گۆر ستانداردێن نێڤدەولەتی هاتینە ئامادەكرن، گۆت ژی «ئارمانجا مە ئەوە تاوانبار بهێنە سزادان، قەرەبوویا زیانلێكەفتییان بهێتە كرن و گەرەنتییەكا نێڤدەولەتی هەبیت داكو ئەڤ كارەساتە جارەكا دی دوبارە نەبیت».
ل 3 تەباخا 2014ێ، رێكخراوا داعش یا تیرۆرستی هێرش كرە سەر قەزایا شنگالێ و دەوروبەران، كو د ئەنجام دا هزاران كوردێن ئێزدی هاتنە كۆمكوژكرن و هزارێن دی ژی هاتنە رەڤاندن.
