پشکدارەکێ کۆمارا کوردستان بۆ ئەڤرۆ: کۆمار د ناڤ دلێ سیستەمەکێ پاشایەتی دا ھاتە راگەھاندن
ئەڤرۆ نیوز:
د دیدارەکێ دا بۆ رۆژناما ئەڤرۆ کو ھۆشەنگ تاجر ئەنجامدایە، ئێک ژ پشکداربوویێن کۆمارا کوردستان ل باژارێ مھابادێ و سیاسەتمەدارێ دێرین یێ رۆژھەلاتێ کوردستانێ و کادیرێ بەرنیاس یێ پارتیا دیموکرات یا کوردستانێ دیار دکەت کو دەمێ کۆمارا کوردستان ھاتە راگەھاندن جڤاکێ کورد د رەوشەکێ گەلەک خراب دا بوو و ئاستێ زانستی و تێگەھشتنا گەلێ مە گەلەک کێم بوو و ل ئالیێ دی سوفیەتا بەرێ و دەولەتا ئازەربەیجانێ ژی گەفێن مەزن ل پێشەوازی قازی محەمەد دکرن و وان دڤیا کۆمارا کوردستان نەھێتە راگەھاندن دا کورد سەر ب کۆمارا ئازەربەیجانێ بن.
جەلیل گادانی سیاسەتمەدارێ دێرین یێ رۆژھەلاتێ کوردستانێ و ئێک ژ پشکداربوویێن کۆمارا کوردستان ل مھابادێ بۆ رۆژناما ئەڤرۆ راگەھاند کو دەمێ ئەم بەحسێ راگەھاندنا کۆمارا کوردستانێ دکەین دڤێت بەری ھەر تشتەکێ باش بزانین کو وی دەمی رەوشێ جڤاکێ کوردی گەلەک خراب بوو، خەلک خواندەڤان نەبوون و ئاگەھداری پێشڤەچوونێن ل جیھانێ نەبوون و ل ئالیێ دی کوردستان د بیاڤێ سیاسی و ئابووری ژی د رەوشەکێ گەلەک خراب دا بوو و گەفێن بەردەوام یێن رژێما شاھی یا ئیرانێ ل سەر کوردان ھەبوون و سوفیەتا بەرێ کو وەک پشتەڤانێ کۆمارێ دھاتە نیاسین د راستی دا وان ژی نەدڤیا کو کۆمارا کوردستان بھێتە راگەھاندن و گۆت: (وی دەمی پێشەوا قازی محەمەد چەندین جاران سەرەدانا بەرپرسێن سوفیەت و ئازەربەیجانێ کرن و وان ب رەنگەکێ ئاشکرا بۆ قازی محەمەدی دیار کرن کو نابیت ھوون کۆمارەکێ رابگەھینن، بەلکو ھوون دشێن وەک کورد گرێدای کۆمارا ئازەربەیجانێ بن، لێ قازی محەمەد ئەو یەک قەبوول نەکر و بەردەوام بزاڤ کرن دا کو بشێت وێ یەکێ بۆ وان بسەلمینیت کو کوردان ژی ئەو ئیرادە ھەیە کو بشێن خوە برێڤە ببەن).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو راگەھاندنا کۆمارا کوردستان د ناڤ دلێ سیستەمێ شاھی یێ ئیرانێ مرۆڤ دشێت وەک شۆرەشەکا گەلەک مەزن ل قەلەم بدەت، چونکو سیستەمێ ئیرانێ بخوە سیستەمەکێ گەلەک پاشکەڤتی بوو و ل سەر بنەمایێ زۆرداریێ ھاتبوو ئاڤا کرن، لێ راگەھاندنا کۆمارا کوردستان د ناڤ دلێ سیستەمەکێ وەسا نیشانا ئیرادا گەلێ کوردستانێ بوو و گۆت: (ب راگەھاندنا کۆمارێ کوردان نیشا ھەموو جیھانێ دا کو ئەو دشێن ل گۆر جیھانا سەردەم بژین و سیاسەتێ بکەن و وێ دەمێ د ماوەیەکێ کێم دا ژی لەشکرێ کوردستانێ ھاتە ئاڤاکرن و ھێزا پێشمەرگە بۆ پاراستنا کۆمارێ ھاتە ئاڤاکرن کو ئەوە ژی براستی پێشکەڤتنەکا ئێکجار مەزن بوو).
سیاسەتمەدارێ دێرین یێ رۆژھەلاتێ کوردستانێ د بەردەوامیا ئاخڤتنا خوە دا ئەو یەک ژی دیار کر کو د ماوەیێ ١١ مەھان کو دەمەکێ گەلەک کێم بوو، لێ دیسان زمانێ کوردی ل کۆمارێ بوو زمانێ فەرمی و د گەلەک بیاڤێن فەرمی و یێن ژیانێ دا ھاتە بکارئینان و ل گۆر دەلیڤێن وی دەمی رۆژنامە ھاتە دەرخستن و ئەڤە ژی بۆ پێشڤەچوونا ھزرا نەتەوی یا کوردی پێنگاڤەکا گەلەک گرنگ بوویە، چونکو رۆلێ زمانی د گەشەکرنا ھزرا نەتەوی دا بەرچاڤە و گۆت: (ئێک ژ خالێن دی یێن کۆمارا کوردستانێ کو نیشا ددەت یا ھەموو خەلکێ کوردستانێ بوو، پشکداریا گەلەک کەسایەتیێن ناڤدار یێن پارچێن دی یێن کوردستانێ بوو، ب پشکداریا وان کەسان و ھۆزێن کوردی ل پارچێن دی یێن کوردستانێ بۆ جارا یەکێ کوردان وێ دەمێ ئێکەتیا خوە یا نەتەوی راگەھاندن و ئەو پێنگاڤا کو وی دەمی ب سەرۆکاتیا پێشەوا قازی محەمەد ھاتیە ئاڤێتن بناغەکا گەلەک مەزن و ب ھێز بۆ قۆناغێن دی یێن شۆرەشا کوردستانێ دروست کر و ھەتا ئەڤرۆکە ژی ئەم بەرھەمێ وێ یەکێ باش دبینین).
د دووماھیا ئاخڤتنا خوە دا جەلیل گادانی ئەو یەک ژی دیار کر کو پێشەوا قازی محەمەد یا ژ دەستێ وی ھات وی دەمی کر و جانێ خوە ژی گوری ئاخا پیرۆز یا کوردستانێ کر و کۆمارا کوردستانێ و بەرھەمێن وێ جھێ خوە د ناڤ دلێ ھەر کوردەکێ دا دروست کریە و ئەڤرۆکە ژی ھەموو کورد شانازیێ ب کۆمارا کوردستانێ و خەباتا پێشەوا قازی محەمەدی دکەن و گۆت: (دڤێت ئەڤرۆکە ھەموو ھێز و پارتێن کوردستانی ل سەر وێ بنەمایێ جارەکا دی ئێکەتیا خوە دروست بکەن و پێکڤە جارەکا دی ئارمانجا کۆمارێ زندی بکەن، ھەکە نھا مە نەشیا ئەم ھەموو کوردستانێ ژی ئاڤا بکەین دڤێت ئەم ل پارچێ نھا یێ ئازادکری ل وەلاتێ خوە جارەکا دی ب راگەھاندنا کۆمارا کوردستانێ ئیرادا گەلێ خوە نیشا ھەموو جیھانێ بدەین دا بۆ ھەر کەسەکێ ئاشکرا بیت کو کورد دشێن ھەردەم پێشەنگیا خەباتەکا دیموکراتیک و مودێرن ل دەڤەرێ بکەن).
