پەیڤدارێ پارتی: مە پێدڤی ب ئێكڕێزییا ناڤخۆیی هەیە بۆ رووبڕووبوونا گوهۆڕینێن دەڤەرێ
مەحموود محەممەد، پەیڤدارێ پارتی دیموكراتی كوردستان د كۆنگرەیەكێ رۆژنامەڤانی دا راگەهاند: «پشتی هەلبژارتنان و ب دەستپێشخەرییا سەرۆك بارزانی، مە سەرەدانا ئالیێن كوردستانی كریە داكو دووماهیێ ب رەوشا قەیرانا هەرێما كوردستانێ بینین».
پەیڤدارێ پارتی هەروەسا ئەو دەنگۆ رەتكرن كو دبێژن پارتی بەرهەڤ نینە بۆ كۆمبوونێ و گۆت: «ئەو ئاخڤتنێن د دەزگەهێن راگەهاندنێ دا دهێنە كرن راست نینن، ئەم بەرهەڤین و چو تشتەكێ ڤەشارتی ژی نینە، پێدڤییە ئەم كۆم ببین و دەلیڤەیەكا گونجای بۆ دووماهیئینانا وان ئاریشەیێن هەین چێكەین».
سەبارەت ب كۆمبوونا داهاتی یا د ناڤبەرا پارتی و ئێكەتی دا گۆت: «ئەم د پەیوەندی و دانوستاندنان دانە بۆ پەیداكرنا دەلیڤەیەكا گونجای».
مەحموود محەممەد ئەو ژی دیار كر: «ئەم دخوازیین بەرهەڤییەكا باش بۆ كۆمبوونان بكەین داكو بەرهەمێ وان هەبیت».
د پشكەكە دی یا ئاخڤتنێن خۆ دا، مەحموود محەممەد رۆناهی ئێخستە سەر رەوشا دەڤەرێ و گرنگییا ئێكڕێزییا ئالییان و راگەهاند: «دەڤەرێ كۆمەكا روودان و گوهۆڕینێن گەلەك مەزن ب خۆڤە دیتییە، داكو ئەم بشێین بەرگەهێ وان ئاستەنگان بگرین و هەرێما كوردستانێ تووشی ئاریشەیان نەبیت، پێدڤی ب ئێكڕێزییەكا گرنگ هەیە د ناڤخۆ دا».
