چو رێککەفتن د ناڤبەرا ئیرانێ و ئەمریکا دا سەر ناگرن
چاڤدێرەکێ سیاسی یێ کورد دیار دکەت د رەوشا نها دا ئیران و ئەمریکا هەر رێککەفتنەکێ ژی بکەن دێ دەم کورت بیت و ژ مەهەکێ دەرباز نابیت، چونکی ژ بەر گەلەک فاکتەران رێککەفتنێن بهێنە کرن دێ ژی تووشی شکەستنێ بن و ئیران ڤێ یەکێ باش دزانیت.
چیا عەلیار چاڤدێرێ سیاسی یێ خەلکێ رۆژهەلاتێ کوردستانێ کو نها ل ئۆرۆپا دژیت دیار کر، ژ بەر هندەک ئەگەران ئەمریکا دڤێت د رەوشا نها دا ئالۆزیێن هەی بۆ دەمەکێ بدەتە راگرتن، یا نها ل گەل ئیرانێ دهێتە کرن ژی بۆ ڤێ یەکێ یە، چو رێککەفتنێن سەرکەفتی د ناڤبەرا ئیرانێ و ئەمریکا دا ناهێنە کرن، چونکی بابەت تنێ بەرژەوەندیێن ئەمریکا نینن، د رەوشا نها یا ئالۆز ل دەڤەرێ دا ئەمریکا نەچارە بەرژەوەندیێن وەلاتێن عەرەبی و ئسرائیلێ ژی بدەتە بەرچاڤ و ئەمریکا نەشێت بێی رازیبوونا ئسرائیلێ و وەلاتێن عەرەبی چو رێککەفتنان ل گەل ئیرانێ ئیمزا بکەت.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، ئەمریکا باش دزانیت هەر رێککەفتنەکێ ژی ل گەل ئیرانێ بکەت ئیران دێ هەر بەردەوامیێ دەتە بەرنامەیێ خوە یێ ئەتۆمی و هەروەسا ئیرانێ سەلماندیە کو ئەو دەستان ژ بەرنامەیێ ئەتۆمی و موشەکی بەرنادەت، ئانکۆ ب کورتی ئیران نها یاریێ ب دەمی دکەت و دڤێت دەمی بۆ بەرژەوەندیێن خوە بکار بینیت و ل ئالیێ دی ترامپی ژی دڤێت رەوشا هەی یا ئالۆز هندەکێ ئارام بیت و ژ بەر ڤێ یەکێ ژی هەر دو ئالی ب رەنگەکێ تەکتیکی و دەم کورت سەرەدەریێ ل گەل بابەتێ رێککەفتنێ دکەن.
چاڤدێرێ سیاسی د پشکەکا دی یا ئاخڤتنا خوە دا ئەو یەک ژی نەڤەشارت کو، بەرپرسێن ئیرانێ هەر ژ نها ڤە دبێژن هەر رێککەفتنەک بهێتە کرن ژی دێ بۆ ڤێ یەکێ بیت دا ئەو بشێن خوە بۆ شەڕەکێ مەزن بەرهەڤ بکەن، ئسرائیل ژی باش دزانیت هەر رێککەفتنەک بهێتە کرن دێ دەلیڤەکا دی بۆ ئیرانێ هێتە پێش دا ئیران بەردەوامیێ دەتە بەرنامەیێ خوە یێ ئەتۆمی و موشەکی و وەلاتێن عەرەبی ژی نها پتر ژ هەر دەمەکێ ژ بهێزبوونا ئیرانێ دترسن و ژ بەر ڤان هەموو ئەگەران ژی گەلەک یا ب زەحمەتە ترامپ بشێت رێککەفتنەکا دەمدرێژ و سەرکەفتی ل گەل ئیرانێ ئیمزا بکەت.
چیا عەلیار د دووماهیا ئاخڤتنا خوە دا ئەو یەک ژی نەڤەشارت کو زوو یان ژی درەنگ دێ هەر رژێما نها یا ئیرانێ هێتە گوهۆڕین، لێ دیارە ژ بەر هندەک ئەگەران جارێ شێوەیێ سەرەدەریێ ل گەل ئیرانێ هاتیە گوهۆڕین، لێ ئەو یەک رامانا هندێ نادەت دێ ئەمریکا رێککەفتنەکێ بکەت کو ببیتە ئەگەرێ بهێزبوونا رژێما نها یا ئیرانێ و گۆت: (بەرپرسێن ئیرانێ ژی دزانن کو ترامپ جهێ باوەریێ نینە و هەر گاڤێ تشتەکێ دبێژیت، ژ بەر ڤان ئەگەران ژی هەر رێککەفتنەک د ناڤبەرا ئیرانێ و ئەمریکا دا بهێتە کرن ژی یا سەرکەفتی نابیت).
