چو هێزەک نەشێت ئاستەنگان ل هەمبەر ئازادیا کوردان دروست بکەت
سیاسەتمەدارەکێ ناڤدار یێ کورد ل تورکیا دیار دکەت دڤێت هێزێن کوردی پێکڤە کار بکەن و نها پتر ژ هەر دەمەکێ پێدڤیا کوردان ب ئێکگرتنێ هەیە و کورد وەکو خەلک بهێزن و کەس نەشێت ئاستەنگان ل هەمبەر ئازادیا کوردان دروست بکەت.
ئەحمەد تورک سیاسەتمەدارێ ناڤدارێ کورد ل تورکیا دیار کر، نها قووناغا ئاشتیێ ل تورکیا بەردەوام دکەت، لێ کورد دلگرانن کو هەتا نها ب کریاری چو نەهاتیە کرن و دیارە دەستهەلاتا نها ژی ل گۆر بەرژەوەندیێن خوە سەرەدەریێ ل گەل قووناغا ئاشتیێ دکەت و ب کریاری ژ بۆ چارەسەرکرنا پرسا کوردی چو نەهاتیە کرن، بابەت تنێ نەمانا چەکی و ب دووماهی هاتنا شەڕی نینە و گۆت: (هەر رۆژ بەرپرسێن تورکیا بەحسێ پرسا کوردی دکەن، دبێژن دڤێت پرسا کوردی بهێتە چارەسەرکرن، لێ مخابن هەتا نها ب کریاری چو نەهاتیە کرن، قووناغا ئاشتیێ ژی گەلەک سست برێڤە دچیت و ب کریاری چو نەهاتیە کرن، یا راست کورد دلگرانن کو دیسان ئاستەنگی دروست ببن).
ناڤهاتی ئەو یک ژی دیار کر، گوهۆڕینێن گەلەک مەزن ل دەڤەرێ دروست بووینە و نها کورد بهێزن، چو هێزەک ئێدی نەشێت ئاستەنگان ل هەمبەر ئازادیا کوردان دروست بکەت، گرنگە هەموو هێز و ئالیێن سیاسی یێن کوردی ژی هەست ب بەرپرسیاریا خوە یا دیرۆکی بکەن، براستی ژی ئێکەتیا ناڤمالیا کوردان گەلەک گرنگە، دڤێت پارتێن سیاسی یێن کوردستانی پشتەڤانیا هەڤدو بکەن و دەست ژ دژبەریا هەڤدو بەردەن، ئەو یەک گەلەک گرنگە و گۆت: (ئەم هەردەم دبێژین دڤێت ب رێیا دستوورەکێ نوو کورد ل تورکیا بگەهنە هەموو مافێن خوە، نابیت ئێدی وەکو وەلاتیێن پلە دو یان ژی پلە سێ سەرەدەری ل گەل کوردان بهێتە کرن، کورد ئێدی تشتەک وەسا قەبوول ناکەن، هەکە کۆمارا تورکیا ببیتە کۆمارەک دیموکرات دڤێت کورد ژی وەکو تورکان بگەهنە هەموو مافێن خوە و ئێدی چو جوداهی د ناڤبەرا کوردان و تورکان دا نەهێتە کرن).
سیاسەتمەدارێ ناڤدار یێ کورد ئەو یەک ژی دیار کر، ئێدی ل تورکیا گەلەک تشت هاتینە گوهۆڕین و نها چو هێزەک ل تورکیا بێی پشتەڤانیا کوردان نەشێت بهێتە سەر دەستهەلاتێ، ئانکۆ ئێدی کورد بووینە هێزەک مەزن و کاریگەر ل تورکیا، هەکە پرسا کوردی بهێتە چارەسەرکرن دێ هەموو پرسێن دی یێن تورکیا ژی هێنە چارەسەرکرن و وی دەمی دێ تورکیا بیتە وەلاتەک بهێز و کورد و هەموو نەتەوەیێن دی ل تورکیا دێ شێن پێکڤە ب رەنگەکێ ئازاد بژین و گۆت: (پێدڤیە دستوورێ نها یێ تورکیا بهێتە گوهۆڕین و د دستوورێ نوو دا هەموو مافێن گەلێ کورد بهێنە گەرەنتیکرن، چونکی دستوورێ نها بوویە ئاستەنگ ل هەمبەر پێشڤەچوونا تورکیا).
