چەکدارێن بیانی بووینە مەترسیەکا مەزن بۆ سووریێ
ناڤەندا چاڤدێریا مافێن مرۆڤی یا سووریێ د راپۆرتەکێ دا ئاماژە ب ڤێ یەکێ کریە کو گرۆپێن چەکدارێن بیانی یێن ل سووریێ نها بووینە مەترسی بۆ دەستهەلاتا ئەحمەد شەرعی، چونکی گرۆپێن چەکدار وەسا دبینن وان گەلەک قوربانی بۆ سووریێ داینە و دڤێت نها وەکو وەلاتیێن سووریێ ئەو بگەهنە هەموو مافێن خوە و داخوازا پلە و پۆستان ژ شامێ دکەن، لێ ژ بەر گەفێن ئەمریکا و هندەک وەلاتێن دی ئەحمەد شەرع بەرهەڤ نینە چو داخوازیێن وان گرۆپان قەبوول بکەت.
هەمان ناڤەندێ ئەو یەک ژی دیار کریە گرۆپەک ژ چەکدارێن ئۆزبەک کو ل چەند ناڤەندێن سەربازی ل حەمایێ بجه بووینە بەری سێ رۆژان داخواز ژ ئەحمەد شەرعی کرینە کو داخوازیێن وان قەبوول بکەت و نابیت چو فشار ژی ل وان بهێتە کرن و دڤێت حوکمەتا سووریێ مافێ وەلاتیبوونێ ژی بدەتە وان کەسان، ئەو یەک ژی نها بوویە ئاریشەیەکا گەلەک مەزن بۆ دەستهەلاتا ئەحمەد شەرعی.
