چ تشتەك نەشێت ببیتە رێگر بەرانبەر ئیرادەیا ئافرەتێ
دلڤین رەشید
خانما دەستڕەنگین (ستایشێ ئەسەدی) د دیدارەكێ دا بۆ رۆژنامەیا ئەڤرۆ گۆت: ئەز خەلكا باژێرێ هەمەدانێ مە، ئەڤە نێزیكی دەه سالانە كارێ دەستی یێ چێكرنا ئێكسسواراتێ ئافرەتان دكەم، وەكو ژنەكا دەسترەنگین ڤان جۆرێن جوانكاریان ژ بەران دورست دكەم، ب تایبەت ژی بەرێن رەنگا و رەنگ، ژبەر حەزا من یا تایبەت بۆ ڤان جۆرە بەران من ئەڤ كارە كریە بۆ جوانكرنا كارێ خۆ زێر و زیڤ دناڤ ئێكسسواراتێ ئافرەتان دا بكار دئینام مینا (رستك و گوستیل و بازنگ) و گەلەك تشتێن دی.
ناڤهاتیێ گۆت : گەلەكا گرنگە ئافرەت خودانا كارێ خۆ یێ تایبەت بیت، چونكو ئەڤ چەندە هاریكارە بۆ بەرفرەهكرنا هزر و بیرێن مرۆڤی و دبیتە خودانا داهاتیەكێ خۆ یێ و دشێت پتر پشت راست بیت د ژیانا خۆ دا و هاریكار و پشتەڤان بیت بۆ خێزان و جڤاكێ خۆ ژی.
