ڕێژەیا پێكهاتییێن دهۆك و زاخۆ گەهشتینە قووناغێن باش
قەیس وەیس:
ل گەل گەرماتییا یاریێن مۆندیالا جیهانی 2026ێ و مژیلبوونا جەماوەرێ وەرزشی ل جیهانێ ب روودانێن وێ، یانەیێن وەرزشی ل كوردستانێ و ئیراقێ شەڕەكێ نهێنێ و ڕاگەهاندنا گرێبەستێن یاریزانان دكەن خوە بەرهەڤكرن بۆ وەرزێ نوو یێ خولا ستێرێن ئیراقێ، یانەیێن دهۆك، زاخۆ، هەولێ و نەورۆز سیمایەكێ نوو د ناڤا پێكهاتیێ تیمێن خوە دا كرینە بەری دەستپێكرنا وەرزێ نوو ئەوا بڕیارە هەڤڕكیێن وێ ل 14ێ تەباخا بهێت دەستپێبكەت، دگەل نڤێسینا ڤی بابەتی دووماهی زانیاری بڤی شێوەیی نە.
پێكهاتیێ دهۆكێ بەر ب كۆپیتكێ
بزاڤێن یانەیا دهۆك بەردەوامن ژبۆ بهێزكرنا ڕێزێن تیما خوە یا فوتبۆلێ بۆ وەرزێ نوو یێ خولا ستێرێن ئیراقێ ب سەركێشیا ڕاهێنەرێ خوە یێ ئیرانی یەحیا گۆلمحەمەد ئەوێ یانە و جەماوەرێ دهۆكێ هیڤیێن مەزن پێڤە گرێدایین، دووماهی گرێبەستێن دهۆكێ بڤی شێوەیی بوون، ئینانا گۆلپارێزێ گەنج كومێل سەعەد ژ یانەیا هەولێرێ، هادی سالح ژ یانەیا زاخۆ و نووكرنا گرێبەستا ئەحمەد عەلی، دووماهی گرێبەست یێ سوری مەحموود ئەلمۆاس بوو، ژلایەكێ دووڤە پێشتر هاتبوو ڕاگەهاندن گرێبەست دگەل هەر ئێك ژ ڕێوان ئەمین، یونس حەمۆد، یێ مەغربی ڕزا ماجی، موهەنەد جەعاس، یێ بەرازیلی ڕیكارد سانتۆس ئیمزاكرینە و نووكرنا گرێبەستا هەر ئێك ژ سەفا هادی و گۆلپارێز ئەحمەد بەشاری.
بتنێ دەم مایە بۆ ڕاگەهاندنێ
لدووڤ ژێدەرێن باوەرپێكری هەتا نوكە دانۆساندن دگەل چەند یاریزانان گەهشتینە قووناغێن دووماهیێ بتنێ دەم مایە بۆ ڕاگەهاندنێ و هندەك ژی هێشتا دبەردەوامبن، ئەوژی شەریف عەبد كازم، سێ یاریزانێن گەنج یێن هەلبژارتیێ لاوێن ئیراقێ، یێ بەرازیلی ئیگۆرد هێنریك.
ڕاهێنەرێ زاخۆ فەرەنسی یە
یێ فرەنسی لورانت بانێت دێ ب فەرمی سەرپەرستییا تیما فوتبۆلا زاخۆ كەت، لورانت ئێک ژ ڕاهێنەرێن خودان سەربوڕە پێشتر ل گەل یانەیێن مۆناکو یا فرەنسی و زەفەرە یا ئیمارتی بوویە، دووماهی یانە ل سالا 2021ێ ل گەل یانەیا کوێت یا کوێتی بوو ئەڤچەندە هات پشتی یێ تونسی ماهر كەنزانی داخوازا لێبۆرینێ كری و دەست ژكاركێشایی ژبەر ئەگەرێن تایبەت لدووڤ ڕاگەهاندنا زاخۆ.
ڕێژەیا پیشەكاران زێدەكر
یانەیا زاخۆ بەردەوامە ل سەر ڤەگوهاستنا یاریزانان بۆ ناڤ ڕێزێن تیما خوە و هەتا نوكە ڕێژەیا پیشەكاران گەهاندیە پێنچ یاریزان و بڤی شێوەیی، یێ نێجیری ئالیۆ ئادەم، یێ بەرازیلی ئۆرینهۆ، یێ بەرازیلی جۆزێڤ ماوریسیۆ، یێ غانی مۆسێس ئابی و یێ باشۆرێ ئەفریقیا سیڤۆ ئمبۆلی، هەروەسان ئەو یاریزانێن پێشتر گرێبەست ئیمزاكری و نووكری هەر ئێك ژ ئەمجەد عتوان، شڤان حاجی، گۆلپارێز عیماد عیسا، شێركۆ كەریم، محەمەد عەلی عەبۆد، گۆلپارێز هۆگر عەلی و گرێبەست ل گەل هارۆن ئەحمەد، ئەسیر سالح، موقتەدا حەسەن ئیمزاكرینە.
