ژبۆ ئێكگرتنا بریارا سیاسى و ب هێز د حوكمهتا نوو دا ههر پارتى یهكهمه
رێژین نهێلى
وهكى یا دیار كو ل گهل دهربازبوونا وان ههشت كابینهیێن حوكمهتا ههرێما كوردستانێ تێدا دهربازبووى، چهندین گرفتێن سیاسى و دارایى دروست بوون، ئهڤجا چ ب وان فشاران بیت یێن حوكمهتا بهغدا د ئێخستنه سهر حوكمهتا ههرێما كوردستانێ یان ژى وهلاتێن دهوروبهربن، لێ كهسایهتى و شارهزایا رهفتاركرن دگهل بارودۆخان دا و دپلۆماسیهتا نێچیرڤان بارزانى، سهرۆكێ حوكمهتا ههرێما كوردستانێ وه دكر كو ههر پێنگاڤهك و بریارهكا لایهنێن تێكدهر سنۆر بۆ ههبن و بهردهوام ب سیاسهت و دانوستاندنێن خوه یێن دپلۆماسیانه رهوش ئارام كریه و بهر ب باشیێ گوهارتیه، سهرهراى هندێ ژى كو حزبان, پارتى یهكهمه، دشیا ل گهل هندهك حزبێن بچووك حوكمهت پێكئینابایه، لێ ژبهر بهرچاڤ وهرگرتن و گرنگیا بابهتێن نیشتیمانى و نهتهوهى و نهدابهشبوونا ههرێمێ، پارتى یا داكۆكیێ ل سهر حوكمهتهكا ئێكگرتى دكهت كو ب دابمهزرینیت و ئهو حوكمهته ل گۆرهیى خواست جڤاك و ئاستێ قووناغا سهردهم دابیت و بشێت ههڤركیا پیلان و نهخشهیێن نهحهزێن مللهتێ كورد بكهت. ژ لایهكێ ژى راسته كو ئهڤه قووناغهكا ههستیاره بهردهم پێكئینانا كابینهیا نههێ یا حوكمهتا ههرێما كوردستانى، لێ دیسا ژى زۆر ژ رێیا ب زهحمهتى هاتیه دهربازكرن، لهورا ژى پێتڤیه دبهردهوامیا كابینهیێن حوكمهتێ داهزر د وان گهف و ئالۆزى و دژایهتیا وان بهێتهكرن یێن بهرى نوكه كهفتینه د رێیا حوكمهتێ دا، و ههموو لایهنێن پشكدار د پێكئینانا كابینهیا نوو دا ب بهرپرسیارانه و نیشتیمانپهروهرانه بریارێ بۆ حوكمهتهكا بهێز بدهن.
حهتا نوكه كابینا نههێ یا حوكمهتا ههرێما كوردستانێ نههاتیه پێكئینان، وهكى دیار كو چهندین كۆمبوون ژى هاتینهكرن، بهلێ هێشتا هندهك حزبان خوه ئێكلا نهكریه بۆ بریاردان كا ئهرێ دێ ب چ شێواز و میكانیزم و سهنگ پشكدارى پێكئینانا كابینهیا نههێ كهن، ئهڤجا دامهزراندنا حوكمهتهكا نیشتیمانى یا ب هێز كو شیان و بهرپرسیارهتیا رووبرووبوونا ههر گهفهكا ناڤخوهیى و دهرهكى ههبیت ئهڤه یا گرنگه بۆ مللهتى و چارهنڤسێ خهلكى، چونكو بۆ ڤێ كابینهیێ ژى چاڤێ خهلكى زۆر ل سهره، و ب ئۆمێدهكا مهزن ل هیڤیا كابینهیا نههێ نه، وهكى ئهم دزانین ههرێما كوردستانێ زۆر قووناغێن سهخت و دژوار دهرباز كرینه، بۆ هندێ كو بگههنه ئۆمێدێن خوه د ناڤ كوردستانێ دا، چونكو ل دهمێ ههلبژارتنا خهلكێ مه زۆر ب باوهرى ڤه دهنگى ددهنه هندهك كهسان كو دبنه نوونهرێن وان د بریاردان ل سهر باشتربوونا رهوشا ههرێما كوردستانێ و خهلكێ وى، ژ بهر هندێ ژى زۆر گیرۆبوونا نه پێكئینانا حوكمهتێ، ژبلى كارتێكرن ل سهر حزبان دێ كارتێكرنێ ل سهر هیڤى و باوهریا خهلكى ژى كهتن، ههر چهنده پێكئینانا حوكمهتێ یا گرێداییه ب گهلهك بابهت و پرسێن دى، د ناڤبهرا لایهنان دا ب تایبهت پرسا كهركووكى، ژبهر هندێ ژى دانوستاندنێن بهرفرههـ پێدڤێن، ژ بهر هندێ ژى دانوستاندن و فشاركرن ل سهر ئێكودو د ڤى دهمى دا تشتهكێ ئاسای یه، چونكو ههر لایهنهك ب دهرفهت دزانیت باشترین پشك د ڤێ كابینێ دا وهربگریت، لێ نابیت ئهڤه ژى ل سهر حسێبا پارتى بۆ ئێكرێزى و تهباییێ بهێتهكرن، ئهڤجا لازمه پتر بارودۆخێ سیاسى و جڤاكى بهرچاڤ بهێته وهرگرتن بۆ هندێ حوكمهتهكا بهێز بهێته پێكئینان، چونكو ههبوونا ههر ناسنامهیهكا نهتهوهیى و نیشتیمانى یا گرێدایه ب حوكمهتهكا بهێز ڤه د چارچووڤێ بنهمایێن قانوونى دا، كو تێدا یاسا سهروهر و بهرقراربیت ل سهر ههموو لایهكێ و تاكهكێ جڤاكى ب بێى جوداهى.
