کوردێن رۆژئاڤایێ کوردستانێ سیاسەتا شامێ رەت دکەن
ل هەمبەر سیاسەتا شامێ کوردێن رۆژئاڤایێ کوردستانێ ل کۆبانێ و حەسەکێ و چەندین باژێرێن دی خوەنیشادان کرن و دیار کرن ل گۆر رێککەفتنا هاتیە کرن زمانێ کوردی زمانێ فەرمی یە ل سووریێ و دڤێت شام رێزێ ل ئیرادەیا کوردان بگریت.
بەرپرسەکێ رێڤەبەریا خوەسەر یا رۆژئاڤایێ کوردستانێ دیار کر، بابەتێ زمانێ کوردی بۆ وان هێلا سۆرە و ل گۆر رێککەفتنا کو ل گەل شامێ ژی هاتیە کرن ل دەڤەرێن کوردی دێ زمانێ کوردی بیتە زمانێ فەرمی و ژ بەر ڤێ یەکێ ژی راکرنا ناڤێ کورد ل سەر سازیێن دەولەتێ ل رۆژئاڤایێ کوردستانێ ب چو رەنگەکێ ناهێتە قەبوول کرن و خوەنیشادانێن ل کۆبانێ و حەسەکێ و چەندین باژێرێن دی ژی هاتنە کرن نیشا ددەن کو گەلێ کورد ل سووریێ ب چو رەنگەکێ قەبوول ناکەت مافێن وان بهێتە بنپێکرن.
ل ئالیێ دی چەند رۆژن ل باژێرێن کۆبانێ، حەسەکێ و چەندین باژێرێن دی یێن رۆژئاڤایێ کوردستانێ خەلک ل دژی سیاسەتا خراب یا شامێ ل هەمبەر زمانێ کوردی خوەنیشادانان دکەن و داخواز دکەن وەکو زمانێ فەرمی سەرەدەری ل گەل زمانێ کوردی ل سووریێ بهێتە کرن، چونکی چەندین سالن زارۆیێن وان ل قۆتابخانەیان ب زمانێ کوردی دخوونن و نها ژی دڤێت هەموو باوەرنامە ژ ئالیێ شامێ ڤە ب فەرمی بهێنە قەبوول کرن و هەروەسا دڤێت شام ب چو رەنگەکێ ژی د بەلگەنامەیێن فەرمی دا ناڤێن دەڤەرێن کوردی ب عەرەبی نەنڤیسیت، چونکی د بەلگەنامەیان دا ناڤێ کۆبانێ وەکو عەین عەرەب هاتیە نڤیسین و ئەو یەک ب چو رەنگەکێ ناهێتە قەبوول کرن، کورد ل سووریێ ب چو رەنگەکێ قەبوول ناکەن سەرەدەریا کو د سەردەمێ رژێما بەعس دا هەبوو دیسان هەمان سەرەدەری بهێتە کرن و دڤێت دەستهەلاتا نوو یا شامێ ل گۆر رێککەفتنا کو ل گەل هەسەدێ کریە سەرەدەریێ بکەت و رێزێ ل ماف و داخوازیێن گەلێ کورد بگریت، چونکی کورد زۆرداریا شامێ ب چو رەنگەکێ قەبوول ناکەن.
د خوەنیشادانێن ل باژێرێ کۆبانێ دا ب هزاران وەلاتیێن کورد پشکدار بوون و دیار کرن، د شەرێ رزگاریا کۆبانێ دا ب هزاران گەنجێن کورد جانێ خوە قوربانی ئاخا کوردستانێ کرن و کۆبانێ کوردستانە و ب چو رەنگەکێ ئەو رێ نادەن د بەلگەنامەیێن فەرمی یێن دەولەتا سووریێ دا ب جهێ کۆبانێ بهێتە نڤیسین عەین عەرەب، کۆبانێ کوردستانە و پڕانیا ئاکنجیێن کۆبانێ ژی کوردن و ژ بەر ڤێ یەکێ ژی دڤێت شام دەست ژ سیاسەتا شاش یا دەستهەلاتا بەرێ ل هەمبەر گەلێ کورد بەردەت، هەکە بەرپرسێن شامێ دخوازن پرسێن هەی ب تەمامی چارەسەر بن دڤێت کوردان وەکو شریکێ دەستهەلاتێ قەبوول بکەن و دەست ژ سیاسەتا شاش ل هەمبەر گەلێ کورد بەردەن.
