کورد ڤەدگەڕنە مالێن خوە و رەوشا عەفرینێ ئاسایی بوویە
پارێزگارێ حەسەکێ دیار دکەت ڤێ حەفتیێ دێ زێدەتر ژ هزار خێزانێن دی یێن کورد ڤەگەرنە ڤە عەفرینێ و هەروەسا نێزیکی دو هزار خێزانێن کورد ژی ڤەگەرینە رەققە و رەوشا عەفرینێ ئاسایی بوویە و وەلاتیێن کورد دشێن بێی ترس ڤەگەرنە ڤە مالێن خوە.
پارێزگارێ حەسەکێ دیار کر ل گۆر رێککەفتنا کو ل گەل شامێ هاتیە کرن کار بۆ ڤەگەرا وەلاتیێن کورد بۆ مالێن وان دهێتە کرن و ڤێ حەفتیێ ١٦٠٠ خێزانێن کورد کو بەری نها ژ بەر شەڕی ئاوارە ببوون دێ ڤەگەرنە ڤە مالێن خوە ل عەفرینێ، هەروەسا د چەند رۆژێن بۆری ژی ١٨٠٠ خێزانێن کورد ڤەگەرینە ڤە مالێن خوە ل رەققە و گۆت: (ل گۆر رێککەفتنا کو ل گەل شامێ هاتیە کرن دڤێت هەموو ئاوارە ڤەگەرنە ڤە مالێن خوە و هەتا نها رێژەیەک گەلەک باش ژ وەلاتیێن کورد یێن عەفرینێ ڤەگەرینە ڤە مالێن خوە و کار بۆ ڤەگەرینا هەموو وەلاتیێن دی ژی دهێتە کرن).
نورەددین ئەحمەد ئەو یەک ژی دیار کر، رێککەفتنا هەسەدێ و شامێ رێ بۆ گەلەک تشتان خوەش کریە و کاریگەریا وێ رێککەفتنێ ل سەر دەڤەرێن کوردی و دەڤەرێن دی ژی دیارە، ب تایبەتی ژی وەلاتیێن کورد یێن رەققە شیان ب رەنگەکێ باش ڤەگەرنە ڤە مالێن خوە، ئەو یەک ژی گەلەک باشە و د سەرەدانا خوە یا ڤێ دووماهیێ دا مە داخواز ژ پارێزگارێ رەققە کربوو کو یا پێدڤی بۆ ڤەگەرینا وەلاتیێن کورد بهێتە کرن دا وەسا ئێدی چو ئاوارە نەمینن و گۆت: (بەرێز پارێزگارێ رەققە ژی سۆز دا کو یا پێدڤی بهێتە کرن، چونکی وان ژی دڤێت رەوشا سووریێ ئاسایی بیت و هەموو وەلاتیێن سووریێ بشێن ب رەنگەکێ ئازادنە ڤەگەرنە ڤە مالێن خوە و ئەو یەک بێگومان د بەرژەوەندیا هەموو ئالیەکێ دایە).
ناڤهاتی د پشکەکا دی یا ئاخڤتنا خوە دا سەبارەت ب رەوشا عەفرینێ ژی دیار کر، بەری نها ژی چەند هزار خێزانێن کورد یێن عەفرینێ ڤەگەرینە مالێن خوە، نها رەوشا عەفرینێ ئاسایی یە و کار دهێتە کرن کو هەموو وەلاتیێن عەفرینێ یێن کو بەری نها ئاوارە ببوون، ب رەنگەکێ ئازادانە ڤەگەرنە ڤە مالێن خوە، نها چو مەترسی نینن و هەر کەسێ بڤێت دشێت ڤەگەریت و بەرهەڤیێن باش ژی هاتینە کرن.
پارێزگارێ حەسەکێ د دووماهیا ئاخڤتنا خوە دا ئاماژە ب ڤێ یەکێ ژی کر کو، ئەم داخواز ژ هەموو وەلاتیێن کورد یێن عەفرینێ و دەڤەرێن دی دکەین کو ڤەگەرنە ڤە مالێن خوە، چونکی وەسا دێ مەترسی ژی ل سەر کوردان ب دووماهی هێن و گرنگە کورد خوەدان ل دەڤەرێن خوە دەرکەڤن و نها ژی چو مەترسی نەماینە و رەوشا عەفرینێ و دەڤەرێن دی یێن کوردی ژی ئاسایی بووینە.
