گۆتارەكا بێ بنەما و شانۆگەرییەكا دۆڕاندی
شەمال ئاكرەیی
ئەگەر ئەم ژ كوژییەكێ سیاسی و دیرۆكی ڤە ل ئاخڤتنێن ئێڤارا ٢٤ حوزەیرانا ٢٠٢٦ یێن شاسوار عەبدولواحیدێ سەرۆكێ حزبا نەوەی نوێ بنێڕین، دێ بۆ مە دیاربیت كو ئەو هزرێن گەنی یێن وی گۆتین نە ب تنێ جهێ گومانێ و ڕەخنێنە، بەلكو د ئاستێ جەماوەری و بەها و نیشتمانی ژی دا، دچنە د خانەیا وان – گۆتنێن بێ مەعنا و نەواقیعی – كو دیرۆكا سیاسی یا كوردستانێ ب درێژاهییا پێڤاژوویا خۆ، چەندین نموونەیێن ب ڤی ڕەنگی ب خۆڤە دیتینە و دەرئەنجام هەمی وەك دلۆپێن ئاڤێ ل سەر كەڤرێ خۆڕاگر و ب هێزێ نیشتمانی، ژ بەر هەتاڤا راستیێ، زوها و هشك بووینە.
ب دیتنا من یا كەسۆكی، دڤێت ئیرادەیا جەماوەرێ كوردستانێ، ب هەمی لایەن و حزب و ئایدۆلۆجیا ڤە، ب چەپەرەكێ موكوم یێ نیشتمانی ل هەمبەر پەیڤێن ئەڤی پۆپۆلیستی راوەستن، چونكی چاوا وێرەكیێ ددەتە خۆ و بەحسی نەمان و هەلوەشاندنا هەرێما كوردستانی دكەت! هەرێما كوردستانێ كو ب خەبات و خوینا هزاران شەهیدان و قوربانیدانێن مەزن و ب رۆندكێن دایك و خووشكان ئاڤابووی! لەوڕا پێدڤییە جەماوەرێ كوردستانێ ب هەمی پێكهاتەیێن خۆڤە، ب خۆنیشادانێن بەرفرەه یێن نەرازیبوون و ماندەلكرن و و ریسواكرنێ راببن و سكالایان بۆ داواكارێ گشتی بلند بكەن و داخوازا دادگەهكرنا ڤی سنێلەیێ سیاسەتێ بكەن.
دیسا داخوازكرنا پۆستێ سەرۆك وەزیرێن هەرێما كوردستانێ بۆ هەڤپەیمانییەكێ كو نەخشەیێ وێ د زیندانێ دا هاتییە كێشان، ب دیتنا من، نە یا واقیعییە و گەلەك یا دوورە ژ بنەمایێن دیموكراتی و هەلبژارتنان و نەزانینە ب ئەلفوبایێن دەولەتداریێ و سڤكاتیكرنە ب هشیارییا سیاسی و ئیرادەیا گەلێ كوردستانێ. حوكمڕانی و رێڤەبرنا وەلاتی رێزگرتنە ژ دیموكراسیەتێ و قانوونێ، نەك دابەشكرنا پۆستانە ل سەر مێزەیێن زیندانێ و نیفاق و دوروییاتییا سیاسی. ئەوێ ڤێ داخوازێ ل بن چەترا بەرژەوەندیێن تەنگ دكەت، رەنگە نەزانیت یان باش دزانیت و خۆ ل گێلیێ ددەت كو پارتی دیموكراتی كوردستان هێزا جەماوەری یا ئیكێ یا بێهڤەڕكە و خۆدان پڕۆژەیەكێ نیشتیمانی و نەتەوەییە و سەركێشییا ئەزموونەكا سەركەفتی یا حوكمڕانیێ ل هەرێما كوردستانێ كرییە، لەوڕا ژی خۆدان رێژەیا بلندترە ژ كورسیێن پەرلەمانی.
خەلكێ مە باش دزانیت كو كاروانێ ئاڤەدانكرنێ ب دەنگەدەنگێ ڤاڕێ و نەشاز مینا دەنگێ شاسوارەكی ناراوەستیت و كا چاوا د گۆتنا ناڤدار دا هاتییە كو «كاروان دبووریت و ….»، ئەڤ هەرێما كو ب خوین، خەبات، دەنگێ مللەتی و ب هەلبژارتنێن شەرعی و دیموكراتی دروستبووی، ب هەوار و گازیێن ڤان جۆرە دەنگان ناهێتە راگرتن و هەژاندن. دڤێت ئەڤ دەنگێن نامۆ كو خۆ د ناڤ كەڤشكێ هزرا خۆ یا تەنگ دا زیندان كری باش بزانن كو هەرێما كوردستانێ دێ مینیت سەربلند ل سەر سەرێ هەر كەسەكێ بزاڤێ بكەت ژ خۆ قەهرەمانەكێ وەهمی ب سیناریۆیێن چێكری دروست بكەت، لەوڕا ئەڤ كەسێن پۆپۆلیست، د چاڤێن جڤاكێ كوردی دا پتر جهێ پێكەنین و پێتڕانكیێ نە نەك كو ببنە بابەتەكێ ژ هەژی هندی بیت، مرۆڤ هزرا خۆ تێدا بكەت.
ئەڤ جۆرێ ئاخڤتنێن سەركۆكێ نەوەی نوێ كرین چ تشتەك نینە ژ بلی بلقێن هەوای و پێلێن ئاڤێ یێن خۆ ب كەڤرێن ب هێز یێن هەرێما كوردستانێ ددەن و دبنە كەف! هەرێما كوردستانێ پشتگرێدان ب سازیێن خۆ و ئیرادەیا گەلێ مە، دێ ب هێز و موكومییا خۆ یا بەردەوام بیت، ل دەمەكێ كو ئەو كەسێن حەز دكەن مەزناهییەكا درەو ل سەر پەقیشكێن گۆتنان ئاڤا بكەن، ل هەنبەر هشیارییا مللەتێ كوردستانێ و حوكمێ دیرۆكێ، ل نێزیك دێ خۆ بینن شەرمزار و روی رەش.
تێبێنی: ئەڤ بابەتە دەربڕینێ ژ دیتنا من یا كەسۆكی دكەت.
