یاریزانێن كوردستانی بەر ب یانەیێن ناڤەڕاست و باشۆرێ ئیراقێ دچن
قەیس وەیس
د بەردەوامییا پێنگاڤێن یانەیێن پشكدار د خولا ستێرێن ئیراقێ یا فوتبۆلێ بۆ وەرزێ نوو 2026-2027، بزاڤێن ئینانا یاریزانان و بەرهەڤكرنا تیمێن خوە د بەردەوامن، ئەوا بڕیارە هەڤڕكیێن خولێ دێ ل 14ێ تەباخا بهێت ب پشكدارییا 20 یانەیان دەستپێبكەت، یانەیێن كوردستانی ب شێوەیەكێ نهێنی دانۆستاندنان دگەل چەند یاریزانان دكەن ژبۆ پاراستنا ناڤ و لڤینێن وان.
ژڤانێ ڤەگوهاستنا یاریزانان هاتە دیاركرن
فدراسیۆنا فوتبۆلا ئیراقێ ب فەرمی دەرگەهێ ڤەگوهاستنا یاریزانان یێن هاڤینێ بۆ وەرزێ نوو دیاركر ئەوا بڕیارە ل 20ێ ڤێ مەهێ دەستپێبكەت، بەردەوام بیت هەتا 31ێ تەباخا بهێت، ژلایەكێ دووڤە دەرگەهێ ڤەگوهاستنێن زڤستانێ دێ ل دویێ كانوون دویێ هەتا 30ێ هەمان مەهـ یا سالا بهێت ڤەكری بیت.
دهۆك ب هووربینی دۆڤچوونێ دكەت
یانەیا دهۆك ربەردەوامە ل سەر دانوستاندنان دگەل كۆمەكا یاریزانێن خودان شیان بۆ ناڤ ڕێزێن تیمێ، هەتا نوكە پەیوەندی ب كۆمەكا یاریزانان كرینە و چەندین یاریزان ڕازیكرینە، چاڤەڕێ نە د رۆژێن بهێت دا ب شێوەیەكێ فەرمی بهێنە ئێكلاكرن و ڕاگەهاندن، لدووڤ دەنگۆباسێن بەلاڤبوویی كو دهۆكێ پەیوەندی دگەل یاریزانێن خوارێ دیاركری كرینە ئەو ژی شەریف عەبد كازم و هیرشبەرێ سوری مەحمۆد ئەلمواس ژ یانەیا شورتە، یاریزانێ بەرازیلی ڕایكار سانتۆس ی ژ ئەنوار یا سعۆدیێ، ڕێوان ئەمین كوڕێ باژێرێ سێمێلێ ژ یانەیا شورتە بۆ دهۆكێ، دگەل سێ یاریزانێن گەنج یێن هەلبژارتیێ لاوێن ئیراقێ هەروەسان یێ بەرازیلی ئیگۆرد هێنریك و یونس حەمۆد هێرشبەرێ یانەیا ئەلكەرخ، ژلایەكێ دووڤە چوونا هەر ئێك ژ سەعەد ناتق و محەمەد داوود گرێبەستا مینا ئیمزاكرینە، ژلایەكێ دووڤە ڕاهێنەرێ تیمێ یێ ئیرانی یەحیا گۆلمحەمەد چار یاریزانێن ئیرانی پێشكێشی كارگێریێ كرینە ژبۆ دانۆستاندنێ و ئیمزاكرنا گرێبەستێ.
زاخۆ یا خوە نوودكەت
ژلایێ خوەڤە یانەیا زاخۆ دێ ئەڤرۆ د پرێسكۆنفرانسەكی دا ڕاهێنەرێ خوە یێ تونسی ماهر كەنزانی دگەل كادرێ وی ڕاگەهینیت و دانانا بەرنامەیەكێ تایبەت بۆ بەرهەڤیێن وەرزێ نوو یا خولێ، لدووڤ ژێدەرێن تایبەت بۆ ئەڤرۆ دیاركرن كو مانا هەر ئێك ژ سیداد حاجی، عیماد عیسان، جوزیف، حەمید حاجی، شڤان جەمیل و ئوسامە ڕەشید پشتراستكرینە، لێ ئەڤرۆ هەتا سوبەهی دێ بابەتێ مانا ئەمجەد عەتۆان، شێركۆ كەریم، ئالیۆ ئادەم هێتە دیاركرن، ژلایەكێ دووڤە چوونا ڕاهێنەرێ جەستەیی هەرژدەنگ بابەكر، گۆلپارێز عەلی كازم، ئاسۆ رۆستەم، یوسف ئەلئالۆس و ماوریسیۆیی ژی هاتە پشتراستكرن، بڕیارە ل دەستپێكا مەها بهێت تیما زاخۆ دەست ب یەكەم یەكەیا خوە یا ڕاهێنانێ بكەت.
باسم قاسمی زەورا هەلبژارد
د پێنگاڤەكا نە چاڤەڕێ كریدا باسم قاسم گڕێبەستا یانەیا زەورا یا بەغدایی ئیمزاكر و یانەیا خوە هەولێر پشتگوهـ هاڤێژت و ئەو داخوازییا ژێ هاتیە كرن بۆ نووكرنا گرێبەستێ پووتە پێنەكر، درووهنكرنا یانەیا هەولێرێ ئەگەرێن ڤێ چەندێ بۆ نە بەرسڤدانا باسم قاسم ب ئوفەرا نووكرنێ، ژلایێ خوەڤە ڕاهێنەرێ ناڤهاتی یانەیا هەولێر ب ئەگەرێ ڤێ چەندێ دیارییە و گوتییە سی رۆژ بوون جاڤەڕێ هەولێرێ بوو دووماهیی نەچاربووم گرێبەستا زەورا ئیمزابكەم.
محەمەد سەعدی چوو یانەیا ئەلغەراف
ژلایەكێ دووڤە ستێرێ پارێزگەهێ محەمەد سەعید یاریزانێ پێشتر یێ یانەیا دهۆك ب فەرمی گرێبەستا یانەیا ئەلغراف ئیمزاكر بۆ وەرزێ نوو یا خولێ، د هێتە چاڤەڕێ كرن دبیت رۆژێن بهێت دا كوڕێ باژێرێ شێخان ئەحمەد زێرۆ گرێبەستا هەمان یانە ئیمزابكەت، بۆ زانین ل حەفتییا بۆری ژی یانەیا ئەلغراف ب فەرمی ئەندامێ پێشتر یێ یانەیا زاخۆ تاها عەبدولحەكیم وەكو بریكارێ ئینانا یاریزانان بۆ ناڤ ڕێزێن تیما خوە دەستنیشان كربوو.
پشكدارییا تیمێن ئاستێن جودا نەچارییە
فدراسیۆنا فوتبۆلا ئیراقێ بڕیاردا هەر یانەیەكا پشكدار د خولا ستێرێن ئیراقێ دا دڤێت ب پێنج تیمێن دی ژی پشكداریێ بكەت بشێوەیێ نەچاری كو پێكهاتینە ژ تیما یاریزانێن وێ ل بن21 سالی یا دویێ(ردیف) تیما لبن 19 سالی، تیما یاریزانێن ل بن 17 سالی، تیما یاریزانێن ل بن 16 سالی، تیما یاریزانێن وێ ل بن 14 سالی، لێ هاتیە دیاركرن بۆ تێمێن ل بن19 سالی و 16 سالی یانە دشێن پشكداریێ بكەن یان نە.
چار یانە دێ پاشڤەچنە پلا نایاب
ژلایەكێ دووڤە فدراسیۆنا فوتبۆلا ئیراقێ بڕیار دا بۆ وەرزێ نوو یێ خولێ ئەو هەر چار یانەیێن ل ڕێزا 17 هەتا 20ێ بهێن پشتی ب دووماهی هاتنا خولێ دێ پاشڤە چنە پلا نایاب، د بەرانبەردا هەردو یانەیێن د خولا پلا نایاب یێن وەرزێ بهێت دەستڤە بینن دێ سەركەڤتنە خولا ستێرێن ئیراقێ، دهەمان دەمدا یارییا پاشكۆ هاتە هەلوەشاندن.
