یاسایا بەحسێ کوردان تێدا نەهێتە کرن چو گرنگی نابیت
ئەندامەکێ پەرلەمانێ تورکیا دیار دکەت هێشتا بەرپرسێن تورکیا دبێژن قووناغا تورکیا بێ تیرۆر و یاسایا کو بریارە بهێتە پەرلەمانی ژی تێدا بەحسێ کوردان نەهاتیە کرن و بێگومان یاسایەک وەسا بۆ کوردان چو گرنگیا خوە نابیت.
سینان چیفت یورەک ئەندامێ پەرلەمانێ تورکیا دیار کر، هەتا نها ژی ئەردۆغان و بەرپرسێن دی یێن تورکیا دبێژن قووناغا تورکیا بێ تیرۆر، نها بەحسێ یاسایا ئاشتیێ دکەن و بریارە پرۆژە یاسا پشتی کو رادەستی ئەردۆغانی بهێتە کرن بهێتە پەرلەمانی ژی، لێ تشتێ هەتا نها دیارە د یاسایێ دا بەحسێ کوردان نەهاتیە کرن و گۆت: (سەد سالن ل تورکیا ب جهێ پرسا کوردی هەردەم دبێژن تیرۆر، نها ژی دبێژن قووناغا تورکیا بێ تیرۆر، ئەو یەک ژی جهێ دلگرانیێ یە، هەکە ب قانوونی کار بۆ چارەسەرکرنا پرسا کوردی ل تورکیا نەهێتە کرن و کورد نەگەهنە مافێن خوە وی دەمی کەس نەشێت بەحسێ ئاشتیێ و چارەسەریێ بکەت، رەوشا نها چو گرنگیا خوە بۆ کوردان نینە).
ناڤهاتی د بەردەوامیا ئاخڤتنا خوە دا ئەو یەک ژی دیار کر، کوردان ب هزاران شەهید بۆ ئازادیێ و بدەستڤەئینانا مافێن خوە داینە، لێ هەتا نها بەحسێ مافێن کوردان نەهاتیە کرن، بابەتێ پرسا کوردی تشتەک جودایە، بابەت تیرۆر و شەڕ نینە و گۆت: (پرسا کوردی پرسا هەری مەزن و سەرەکی یا تورکیا یە، لێ مخابن هەتا نها ژی بەحسێ پرسا کوردی و چاوانیا چارەسەرکرنا وێ نەهاتیە کرن، کورد گەلەک دلگرانن، هەکە دەستهەلاتا نها بزاڤا ڤێ یەکێ بکەت پرۆژەیەکێ ل ژێر ناڤێ نەهێلانا تیرۆرێ ل پەرلەمانی دەرباز بکەت ئەو یەک چو پرسەکێ چارەسەر ناکەت، چونکی کورد داخوازا مافێن خوە یێن رەوا دکەن و هەتا کورد نەگەهنە مافێن خوە ئالۆزیێن هەی ژی دێ بەردەوام بن).
ئەندامێ پەرلەمانێ تورکیا سەبارەت ب چاوانیا بەردەوامیا قووناغا ئاشتیێ ژی دیار کر، هەتا نها ب کریاری چو نەهاتیە کرن، هەر رۆژ دبێژن قووناغا تورکیا بێ تیرۆر، کەس بەحسێ مافێن کوردان ناکەت، یاسایەک وەسا ژی هەکە بهێتە پەرلەمانی چو بهایێ خوە نابیت و گۆت: (هێشتا ژی ب هزاران گرتیێن سیاسی ل زیندانان دانە، ژ بۆ ئازادیا وان چو نەهاتیە کرن و گەلەک ئاستەنگێن دی ژی ل هەمبەر چارەسەرکرنا پرسا کوردی هەنە و دەستهەلات هەر بەحسێ پرسا کوردی ناکەت، ئەو یەک ژی بێگومان دێ بیتە ئەگەر کورد دلگران بن).
سینانی د دووماهیا ئاخڤتنا خوە دا ئەو یەک ژی نەڤەشارت کو ئارمانجا قووناغا نها دڤێت زەلال بیت، پێدڤیە ئەردۆغان و بەرپرسێن دی ب رەنگەکێ ئاشکرا بۆ خەلکی بێژین کا وان دڤێت چ بکەن، هەکە دیسان بزاڤا خاپاندنا کوردان بهێتە کرن ئەو یەک دێ تورکیا بەر ب چارەنڤیسەکێ نەدیار ڤە بەت.
