یانه‌یا زاخۆ: سکالا ئێکلا نه‌بوویه و رژدین مافێ خوه وه‌ربگرین
عەلی حاجی:
د داخویانیەکێ دا سکرتێرێ یانه‌یا زاخۆ یا وەرزشی بۆ رۆژنامه‌یا ئەڤرۆ دیار کر سکالا وان ل سەر فیدراسیۆنا فوتبۆلا ئیراقێ د ڤان نێزیکان دا ناهێتە ئێکلا کرن لێ هەمی تشت ب باشی رێڤە دچن.
زێدەتر هشیار شەهباز گۆت : بابەتێ سکالا مە ل سەر فیدراسیۆنا فوتبۆلا ئیراقێ هەتا نوکە ب باشی رێڤە دچیت و ئه‌وان ژی بەرسڤا نامەیا دادگەها کاس نەدایە، ئەوا ل سەر مە پێدڤی هاتیە ئەنجامدان بتنێ ماینە ل هیڤییا بریارا دادگەها کاس، لدویف پێشبینیێن مە دبیت بریارا ئێکلاکەر ل هەیڤا شەش یا ئەڤ سالە دا بهێتە دان و ئەم پشت راستین ژی بریار دێ د بەرژەوەندیا یانه‌یا زاخۆ دا بیت، پێشتر ژی دو جاران سەرۆکێ فیدراسیۆنا ئیراقێ مە ل سەر سکالا خوە ئاگەهدار کربوو و وی ژی دوپاتی ل هندێ کربوو کو هەر بریارە بهێتە دان دێ پابەندیێ پێ کەن، ب ڕێیا پارێزەرێ خوە یێ مسری ئەم بەردەوام ژی دۆڤچوونا ڤی بابەتی دکەین هەتا کو دگەهینە بریارەکا ئێکلاکەر، ب ڤەگەراندنا وان سێ خالان دێ جهێ مە د رێزبەندیا دەستپێکا خولێ دا گەلەک ب هێزتر بیت.
لدور بابەتێ هاریکارێ راهێنەری ژی هشیار شەهباز گۆت: ئەم دگەل موهەند عەدنان دەرجالی بەردەوام د پەیوەندیا دانه لێ هەتا ڕادەیەکێ مەزن هاتنا وی ب زەحمەتە ژبەر چەند ئەگەرەکێن تایبەت ب وی ڤە، ژلایه‌كێ دیڤه پەیوەندی دگەل دوهاریکارێن دیتر ئێک ئیراقی یە و یێ د ژی بیانی یە لێ هەر ئارمانجا مە یا ئێکێ موهەنەد عەدنان دەرجالە هەر دەما وی شیا کێشەیێن تایبەت ب خوەڤە چارەسەر بکەت د وی دەمی دا دێ هەڤبەستێ دگەل دا گرێدەین.
