چه‌ندين پرۆژه ل قه‌زا ئاكرێ دقۆناغێن بجهئینانێ دانه
ئه‌ڤرۆنيوز:
ئه‌ڤرۆ دوشه‌مبى 8/1/2018 ئوسمان یونس جێگرێ پارێزگه‌رێ دهۆكێ سه‌ره‌دانا قه‌زا ئاكرێ كر ول گه‌ل مازن محه‌مه‌د سه‌عید قایمقامێ ئاكرێ سه‌ره‌دانا پرۆژێ سایلۆیا ئاكرێ ل ناحیا گرده‌سین دا و سه‌حكره قۆناغێن كاری كو ل سه‌ر رووبه‌رێ 15600م2 دهێته چێكرن و ژ 4 په‌نكه‌را ئانكو كارێن گه‌نمی پێك دهێت و شیان هه‌نه زێده‌تر ژ 12 هزار ته‌نێن گه‌نمی و جه‌هی هه‌لگریت و كاركێریا پارێزگه‌ها دهۆكێ كۆژمێ زێده‌تر ژ 810 ملیۆن دیناران بۆ ته‌رخانكریه و ژ دو قۆناغان پێك دهێت، قۆناغا گه‌هاندنا رێ و كاره‌بێ و قۆناغا دویێ چێكرنا سایلۆیێ و تا نوكه رێژا زێده‌تر ژ 90% هاتیه بجهئینان.
ددوڤدا جێگرێ پارێزگه‌رێ دهۆكێ و شاندێ دگه‌لدا سه‌ره‌دانا پرۆژێ رێيێن ناڤخوه‌یی ل تاخێن ئومه‌ر خوشا و شیڤه كرێ كر و سه‌حكره كاری دپرۆژه‌ی دا كو ژلایێ باژێرڤانیا ئاكرێ ب شێوه‌كێ راسته‌وخوه دهێته بجهئینان و كارگێریا پارێزگه‌هێ كۆژمێ 840 ملیۆن دیناران بۆ ته‌رخانكریه و درێژاهیا جادا 2150 م و ب فره‌هیا 20 م و تانوكه رێژا لا75% هاتیه بجهئینان. پاشی سه‌ره‌دانا پرۆژێ رێيا هژماره‌كا گوندێن كوركا و هه‌شتكا ل سنورێ ئاكرێ كرن كو دقۆناغا قێركرنێ دانه و ئه‌ڤ رێ دێ مفای گه‌هیننه زێده‌تر ژ 30 گوندان و پێك دهێت ژ ڤه‌كرنا رێ و تێكه‌له‌كرنێ و قێركرنێ و رێژا 75% هاتیه بجهئینان و كۆژمێ 322 ملیۆن دیناران ژلایێ پارێزگه‌ها دهۆكێ ڤه بۆهاتینه ته‌رخانكرن.
دداخۆیانیه‌كێ دا ، مازن محه‌مه‌د سه‌عید قایمقامێ ئاكرێ دیار كر كو ئه‌ڤ پرۆژه گه‌له‌ك دگرنگن بۆ قه‌زا ئاكرێ تایبه‌ت سایلۆ بۆ عمباركرنا ده‌خلودانێ ده‌ڤه‌رێ كو سالانه دبۆ ئاریشه بۆ جوتیارێن سنورێ ئاكرێ، هه‌روه‌سا هه‌ردو رێ بۆ تاخێن ئاكرێ و گوندێن ده‌ڤه‌رێ گه‌له‌ك دگرنگن و هاتنوچونا وان دێ گه‌له‌ك ب ساناهی تر لێهێت، چونكی رێ ده‌مارێت ژیانێ نه وچێكرنا رێيا ئانكو خوه‌شكرنا ژیانا وه‌لاتیان و ب ساناهی هاتنوچونا وانه و هاندانه بۆ ئاڤاكرنا گوندان و كه‌دا جوتیاریێ .
