كورد په‌رتالێن بازارى نه (عه‌فرین) نموونه (دو)
نه‌زیر چه‌مباهیڤى
ئه‌وا ل كه‌ركووكێ و ده‌ڤه‌رێن دى رووداى خه‌مه‌كا گران بى و دبیت مه گریا خوه ب كه‌سه‌ر و كۆڤان كربیت بۆ ژ ده‌ستدانا پارچه‌كا لاشێ ئاخا خوه یا نه‌ته‌وى ژ لایه‌كى ڤه و ژ لایێ دى ڤه بێ ئۆمێدیا خه‌ونێن خوه، ژ به‌ر نه ئێكرێزیا ناڤمالیا كوردى و شه‌رمزاریا ب سه‌ر هه‌رێمێ دا هاتى, دبیت هه‌تا نها ژى ئه‌م ب سه‌ر خوه‌ڤه نه‌هاتبن و پتر یێن كه‌فتین ل بن گه‌فان, ئه‌ڤرۆ ده‌رده‌كێ دى یێ زێده دبیت ل سه‌ر ده‌ردێن ئازادیخوازان و هه‌ست نه‌ته‌وه‌یان ئه‌و ژى هه‌لوه‌شاندن و نه‌هێلانا هه‌ستێ نه‌ته‌وایه‌تى یه, مال وێرانكرنا پارچه‌كا دى ژ لاشێ كوردستانێ یه, ئه‌و ژى هه‌رێم یان كانتۆنا عه‌فرینه و خه‌ونه‌كا دى یا دبیته ئاشۆپه ده‌رد و ژان, عه‌فرین ده‌ڤه‌ره‌كا ئاسێ یه و ده‌شت و چیایى یه, ژ لایێ ئابوورى ڤه ناڤداره ب زه‌یتۆنان, تێر دارستان و ئاڤى یه, یا ناڤداره ب ناڤێن ئافه‌رین, ئاڤا رووین, گرێ كوردان, به‌لێ موخابن ژ عه‌ره‌بكرنا رژێما به‌عس قورتال نه‌بوویه و هاتى یه ڤه‌قه‌تاندن ژ ده‌ڤه‌رێن دیتر یێن كوردى, تایبه‌ت مه‌نبچ و ئه‌عزاز عه‌ره‌بكرنا كوردان زێده‌هاتى یه كرن و رێژا عه‌ره‌ب و توركمانان زێده‌تر بوویه, نها ده‌ستهه‌لاتا توركیا كوریا خوه یا باداى ل ژێر بهانه ب مانا ده‌ستهه‌لاتا كوردى ل عه‌فرینێ مه‌ترسى یه ل سه‌ر ئاسایشا نه‌ته‌وى یا توركیا و دڤێت ب حوكمێ زۆرى داگیر كه‌ت و راده‌ستى هه‌ڤالێن خوه له‌شكرێ ئازاد و مه‌تالا فورات بكه‌ت, تنێ مه‌ره‌ما توركیا یا نهێنى ئه‌وه دزانت عه‌فرین ده‌رگه‌هێ گه‌هشتنا ده‌ریایێ یه بۆ كوردێن باشۆر و رۆژئاڤا پشتى ل 2016 شیایى عه‌فرینێ ڤه‌قه‌تینت ژ كۆبان و قامشلۆ, پشتى مه‌ترسیا خوه دیتى ل سه‌ر دامه‌زراندنا هێزا سنۆرى ژ لایێ ئه‌مریكا ڤه ل رۆژئاڤایێ كوردستانێ, ئه‌ز باوه‌رم عه‌فرینێ وه‌كى مه‌نبچێ گرنگیا خوه یا ستراتیجى نینه بۆ هێزێن پاراستنا گه‌ل و سووریا دیمۆكرات, ئه‌گه‌ر توركیا و هه‌ڤالبه‌ندێن وێ هێرش بكه‌نه سه‌ر عه‌فرینێ ئه‌و ژى ب فیتكا رۆسیا و هێزێن رۆسى خوه ژ ئه‌وێ ده‌ڤه‌رێ ڤه‌كێشن دبیت هێزێن كوردى به‌رخودانه‌كا رۆخسار بكن و بۆ خه‌لكى و كوردان دیار بكن یا د شیانان دا كرن و پاشان دێ خوه ڤه‌كێشن ژبه‌ركو ته‌رازویا شه‌رى نه د به‌رژه‌وه‌ندیا وان دا یه, عه‌فرین ژى دێ بیته خویشكا كه‌ركووك و ده‌ڤه‌رێن دیتر, دبیت ژى توركیا و هه‌ڤالێن خوه نه چنه دناڤا باژێرى دا و تنێ دورپێچ بكن, نها ئه‌و ده‌ڤه‌ره نه د فه‌رهه‌نگا ئه‌مریكا دایه و نه‌ڤێت په‌یوه‌ندیێن خو ژ هه‌ڤالبه‌ندا خو یا كه‌ڤن تركیا قوت بكت, یا ل چاره‌سه‌ریه‌كا یه‌كسانى دگه‌ریت و توركیا و ئه‌مریكا دبیت رێكه‌فتى بن لسه‌ر ئه‌ڤێ مژارێ و عه‌فرین قوربانیا به‌رژه‌وه‌ندا بت, ئه‌گه‌ر توركیا پشتى عه‌فرینێ وه‌كى عیراقێ غرور بو, پێنگاڤا هێرشێ ئینا سه‌ر ده‌ڤه‌رێن دى یێن كوردى وه‌كو مه‌نبچ, ئه‌ز باوه‌رم دێ شه‌رێ مان و نه‌مانێ ئێته‌كرن و دبیت وه‌كى ل باشۆر (پردێ و زمار) گورزێن مه‌زن ب توركیا و هه‌ڤالبه‌ندێن وێ بكه‌ڤن و ئه‌مریكا ژى بێ ده‌نگ نه‌بیت, ل دووڤ ده‌نگوباسان گه‌له‌ك شاره‌زا و بسپۆر دبێژن كورد یا خوه نزانن و كلیلا چاره‌سه‌ریا ئاریشێن كوردێن رۆژئاڤا یا د ده‌ستێن رۆسیا و سووریا دا و نه د ده‌ستێ ئه‌مریكا دانه, دبیت ئه‌مریكا كوردان بخاپینیت نێزیك و نه دوور كا چاوا كوردێن باشۆر ئاریشا وان ل به‌غدا دڤێت چاره‌سه‌ر ببیت ب هه‌مان شێوه كوردێن رۆژئاڤا ژى ل دیمه‌شقێ چاره‌سه‌ر دبیت, شاره‌زا دبێژن ئه‌ڤ حرحرا ئه‌ردوغان نها دكت ل سه‌ر شاشێن ته‌له‌فزیۆنا ب له‌شكركێشیێ گه‌له‌ك مه‌زنتره ژ ئه‌وا ل ئه‌ردى رووبده‌ت و ئه‌ردوغان یێ ریكلاما حزبا خوه دكت بۆ هه‌لبژارتنێن 2019ێ, عه‌فرین نها یا د ده‌ستێن یاریكه‌ران دا و دبت رۆسیا چاڤ ل توركیا بنه‌قینت و پاشان وه‌كى حه‌له‌بێ ژ ده‌ستده‌ربێخت و راده‌ستى ده‌ستهه‌لاتا سووریا بكت و ناڤێ توركیا و هه‌ڤالێن وێ ژى ل ئه‌وێ ده‌ڤه‌رێ نه‌مینت, پاشێ سووریا ژ كه‌ربێن توركیا دا هه‌مى باكۆرێ سووریێ ژ رۆژهه‌لات هه‌تا رۆژئاڤا بگه‌هینته ئێك پێكڤه گرێدت ل ژێر ده‌ستهه‌لاتا كوردى بن ب ناڤێ فیدرالیه‌تا سووریا ئێكگرتى و كوردان رازى بكت ب مانا (به‌شار ئه‌لئه‌سه‌د) ل سه‌ر ده‌ستهه‌لاتێ و پشكدارى و هاریكاریا رژێمێ یا ئابووریا هه‌ڤپشك ل گه‌ل كوردان بكت، ئه‌و ژى ل پشت په‌ردان ئه‌گه‌ر هاتبیته مۆركرن له‌وا هه‌تا نها چ گه‌فێن مه‌زن ژلایێ ئه‌مریكا و رۆسیا ل سه‌ر توركیا نینن و تنێ راگه‌هاندنه‌كا لاوازه و هه‌مى لایه‌نێن په‌یوه‌ندى ب ئاریشا سووریا ڤه هه‌ین دزانن له‌شكرێ ئازاد و مه‌تالێ فورات ژ به‌رمایێن داعش و به‌ره‌ى نوسره‌نه و نها توركیا پشته‌ڤان و هاریكاره, ده‌ستهه‌لاتا ئه‌ردوغان ژى چ باوه‌رى بۆ هه‌ڤالێن خوه نه‌هێلان, بۆ نه‌ته‌وا كورد ژى دیاركر كو ئه‌و رازى نابت چ جاران كورد ببن خودان ده‌ستهه‌لاته‌كا خوه‌سه‌ر و د ئه‌وێ باوه‌ریێ دامه ئه‌ڤا ل باشۆر ژى رووداى هه‌ر توركیا ئه‌گه‌ر بى و سیاسه‌تا نها یا توركیا یا وێ تووشى كێشه‌كا مه‌زن دكت به‌رامبه‌رى نه‌ته‌وه‌كا پتر ژ 50 ملیۆنان و جیهان ژى ل سه‌ر ئاگه‌هداره, به‌لێ ئه‌گه‌ر ده‌ستهه‌لاتا توركیا سیاسه‌تا خوه گوهۆریبا و ب حه‌كیمانه ره‌فتار ل گه‌ل كوردان ل هه‌ر چه‌ند پارچان كربا، ئه‌ز باوه‌رم دا پتر مفاى بینت و باوه‌ریا كوردان بده‌ستڤه‌ئینت نها و پاشه‌رۆژێ, ئه‌ڤجا دێ كه‌نگێ كورد زانن ریهـ دبن بۆست دوژمن نابن دۆست؟!….
