عادل تيله‌رى به‌رنياس ب “عادل کەلەپۆر” وەغەرکر
ئەڤرۆ نیوز ، نەوزاد ھلۆری:
شەڤا بوری عادل تێلەری ناسیار ب عادل کەلەپۆر وەغەرا دووماهیێ کر، رێڤەبەریا گشتيا رەوشەنبیری و ھونەری یا دھۆکێ ژی وەغەرکرنا وی ب خوسارەتیەکا مەزن بۆ کەلەپۆر و فولکلورێ کوردی دبینیت.
ئاواز عەبدوللا نھێلی بەرپرسێ راگەهاندنا رێڤەبەریا گشتی یا ھونەری و رەوشەنبیریا دھۆکێ بۆ ئەڤرۆ نیوز گۆت: (شەڤا بوری کەلتوور و کەلەپۆرنیاس عادل تێلەری ناسیار ب عادل کەلەپۆر وەغەرا دووماهيێ کر و وەغەکرنا وی زیانەکا زۆرا مەزن ب فولکلۆرێ بادینان و پارێزگەھا دھۆک گەھاند).
زێدەتر گۆت: (عادل تێلەری چەندین سالە خزمەتەکا باش یا کەلتۆرێ کوردی دکەت و د مالا خوه دا ھزاران پارچەیێن فولکلۆرێ کوردی پاراستینە و موزەخانەکا تایبەت ژی چێکریە، رێڤەبەریا رەوشەنبیری و ھونەری یا پارێزگەھا دھوکێ گرێبەستەک ل گەل ناڤبری ئەنجام دابوو بۆ پاراستنا کەلەپۆر و فولکلۆرێ وی و ئەو ب خوە ژی کربوو سەرپەرشتێ پاراستنا وان).
