عه‌بادى مه‌رجێن رێككه‌فتنێ ل گه‌ل هه‌رێمێ ب زه‌حمه‌تتر دكه‌ت
ئه‌ڤرۆنيوز:
نڤيسينگه‌ها راگه‌هاندنێ يا سه‌رۆك وه‌زيرێن عيراقێ راگه‌هاند كو به‌غدا دانپێدانێ ب وان گرێبه‌ستێن په‌ترۆلى ناكه‌ت، ئه‌وێن دناڤبه‌را هه‌رێما كوردستانێ وكۆمپانيێن په‌ترۆلى هاتينه ئيمزاكرن وشايستێن دارايى يێن وێ چه‌ندێ نا مه‌زێخيت.
سه‌عه‌د حه‌ديسى، په‌يڤدارێ نڤيسينگه‌ها راگه‌هاندنێ يا سه‌رۆك وه‌زيرێن عيراقێ، راگه‌هاند كو حوكمه‌تا به‌غدا پێگير نابيت ب مه‌زاختنا شايستێن دارايى يێن وان گرێبه‌ستێن په‌ترۆلى ئه‌وێن حوكمه‌تا هه‌رێما كوردستانێ ل گه‌ل كۆمپانيێن په‌ترۆلى بێ ئاگه‌هداريا حوكمه‌تا فيدرالى ئيمزاكرين.
ل دووڤ ده‌زگه‌هێن راگه‌هاندنێ ل عيراقێ، سه‌عه‌د حه‌ديسى ئاماژه دايه” كه‌نگى په‌ترۆلا هه‌رێمێ كه‌فته دبن كونترۆلا به‌غدا دا، وى ده‌مى حوكمه‌تا عيراقێ دێ پێگيريێ ب مه‌زاختنا شايستێن دارايى يێن هه‌موو وان گرێبه‌ستان بيت ئه‌وێن به‌غدا ل گه‌ل كۆمپانيێن په‌ترۆلى ئيمزا دكه‌ت”.
په‌يڤدارێ نڤيسينگه‌ها راگه‌هاندنا سه‌رۆك وه‌زيرێن عيراقێ گۆت ژى” ئه‌م ژوان گرێبه‌ستان دبه‌رپرسيار نينين يێن حوكمه‌تا هه‌رێما كوردستانێ ئيمزاكرين، ئه‌وا په‌يوه‌ندى ب حوكمه‌تا عيراقێ ڤه هه‌ى، ئه‌ون كو ژلايێ حوكمه‌تا به‌غدا ڤه دهێنه ئيمزاكرن، يان ژى ب ئاگه‌هداريا به‌غدا دهێنه ئيمزاكرن، به‌لێ ئه‌وێن ئه‌م پێ ئاگه‌هدار نه، چو په‌يوه‌ندى ب مه‌ڤه نينه”.
ئه‌ڤ داخۆيانيا حوكمه‌تا عيراقێ دده‌مه‌كى دايه كو به‌رى نوكه حوكمه‌تا هه‌رێما كوردستانێ رازيبوونا خوه دياركربوو كو كه‌رتێ په‌ترۆلا هه‌رێمێ ژلايێ حوكمه‌تا به‌غدا ڤه بهێته سه‌رپه‌رشتيكرن.
