بۆ جارا ئێکێ یە دێ شاندەکێ تورکیا سەرەدانا قەندیلی کەت
ئەڤرۆ: سەرجان مەحمود:
رۆژناما سەباح یا تورکیا د راپۆرتەکێ دا دیار دکەت کو پێنگاڤێن بلەز بۆ چارەکرنا پرسا کوردی دھێنە ئاڤێتن و دەولەتێ دڤێت ھەتا نەورۆزێ PKK ھەموو چەکدارێن خوە ژ ئاخا تورکیا دەرخینیت و ژ بەر ڤێ یەکێ ژی چەندین جاران شاندێ دەولەتێ سەرەدانا ئیمرالی کرینە و ل گەل عەبدوللا ئۆجەلان سەرۆکێ زیندانکری یێ PKK ھەڤدیتن کرینە و د ھەڤدیتنا شاندێ پارتیا دیموکراتی یا گەلان ل گەل ئۆجەلانی ژی ب بەرفرەھی بەحسێ ڤێ یەکێ ھاتیە کرن و ئۆجەلان ژی ژ بەر ڤێ یەکێ دیار کربوو ھەکە چو ئالۆزی روو نەدەن دێ د ناڤا ٥ مەھان دا پێنگاڤێن مەزن بۆ چارەکرنا پرسا کوردی ھێنە ئاڤێتن.
ل ئالیێ دی سری سورەیا ئۆندەر ئەندامێ پەرلەمانێ تورکیا و ئێک ژ ئەندامێ شاندێ پارتیا دیموکراتی یا گەلان بۆ رۆژناما ئەڤرۆ دیار کر کو ئەو دێ ل گەل نوونەرێن حوکمەتا تورکیا ھەڤدیتنان بکەن و سەبارەت ب چاوانیا برێڤەچوونا پرۆسا چارەسەریێ و راگرتنا شەری بئاخڤن و گۆت: (خالا جیاواز ڤێجارێ دەمێ ئەم سەرەدانا قەندیلێ بکەین ب تنێ ناچین و دێ شاندەکێ دەولەتا تورکیا ژی سەرەدانا قەندیلێ کەن و دێ سەبارەت ب چاوانا برێڤەچوونا پرۆسا ئاشتیێ و راگرتنا شەری ھەڤدیتن ھێنە کرن).
ل ئالیێ دی دەزگەھێن راگەھاندنا تورکیا دیار دکەن کو ھەفت مەە بۆ ھەلبژارتنێن پەرلەمانی ل تورکیا ماینە و حوکمەتا داوود ئوگلۆ دڤێت د بیاڤێ چارەکرنا پرسا کوردی دا ھندەک تشتان بکەت دا کو بشێت پشتەڤانیا کوردان بدەستڤە بینیت و چاڤدێرێن سیاسی دبێژن ھەکە ئەو یەک بھێتە کرن دێ ئاکپارتی بشێت پتر ژ ٥٠% دەنگدان بدەستڤە بینیت و کورد ژی ڤێجارێ دخوازن وەک پارتی پشکداریێ د ھەلبژارتنان دا بکەن.