كورد هه‌تا نه‌بن ئێك نا بن ده‌وله‌ت؟!
نه‌زیر چه‌مباهیڤى
هۆزانڤانێ مه‌زن جه‌گه‌رخوین دبێژیت كوردینۆ ئه‌گه‌ر هوون نه‌بن یه‌ك، هوون دێ هه‌ڕن ئه‌ك ب یه‌ك. ئه‌ڤجا ژ هه‌بوونا نه‌ته‌وه‌كى ئێكگرتى ل سه‌ر قه‌واره‌كى ئه‌ردێ ب سنۆر ده‌وله‌ت ئاڤا دبیت، نه‌ته‌وه دبنه ده‌وله‌ت ب رێیا ئێكبوون و به‌رخودان و شۆره‌ش و سه‌رهلدان و خزمه‌ته‌كا پر درێژ، ژبۆ وه‌رگرتنا ئازادى و سه‌ربه‌خوه‌یا نه‌ته‌وى، هه‌ر ئه‌و نه‌ته‌وه كار و خزمه‌ت و پشته‌ڤانیێ دكه‌ت بۆ ب هێزكرنا وێ ده‌وله‌تێ و دشێت ببیته خراب كارێ ئاڤابوونا ده‌وله‌تێ، ل جیهانێ پرانیا مله‌ت و نه‌ته‌وان خودان ماف و ده‌وله‌تن و ئازادن و ئازادیا خوه دپارێزن، زۆر نه‌ته‌وه هه‌نه هه‌تا نوكه ماینه بنده‌ست و نه‌گه‌هشتینه مافێن خوه، هنده‌كا ژ وان شارستانی و كه‌لتۆر و زمانێ خوه ژى ژ ده‌ست داینه، ئۆمێدا وان ئه‌وه ته‌نها جاره‌ك سه‌ربه‌خوه‌یى و ئازادیا خوه وه‌كى ته‌ڤایا نه‌ته‌وێن ئازاد ب ده‌ستبێخن، نه‌ته‌وا كورد و خاكا كوردستان پارچه‌كن ژ ئه‌ڤێ جیهانێ، مخابن نه ژ نه‌ته‌وه‌یێن تێربوویێن ئازادیێ نه، به‌لێ ژ نه‌ته‌وه‌یێن تێهنیێن ئازادیێ نه، تاما ده‌وله‌تێ مه نه‌دیتى یه, بنده‌ستین و نه ئازادین، خاك و سنۆر داگیركرینه، ئابوور و بریار و چاره‌نڤیسێ مه خه‌لكه‌ك وه‌كى وان بڤێن برێڤه دبن و كار پێ دكن و به‌رزه‌كرینه، ئه‌گه‌ر بێژین مه چ خزمه‌ت و خه‌بات و شۆره‌ش و سه‌رهلدان نه‌كرینه، ئه‌ڤه ژى یا به‌رچاڤه دبیت كێم نه‌ته‌وه و مله‌تان ل جیهانێ وه‌كى كوردان خوین ژ بۆ ئازادیێ رشتبیت، هه‌تا نوكه ژ شۆره‌ش و خه‌باتا ڤالا نه‌بوویه و دیرۆك دیده‌ڤانێ شۆره‌ش و سه‌رهلدانێن كوردانه، هه‌ر ژ شۆره‌شا میرێ سۆران و به‌درخانیان و هه‌كاریا و مه‌حموودێ نه‌مر و سه‌عیدێ پیران و شۆره‌شێن بارزان و ئه‌یلۆلا مه‌زن و گولان، سه‌رهلدانێن دێرسم و زێبار و بارزان و هه‌تا سه‌رهلدانا پیرۆزا مه‌زن، به‌رگریا ئاخا كوردستانێ ژ تیرۆرا جیهانێ (داعش), به‌رهه‌مێ خوینا شه‌هیدێن ڤان شۆره‌ش و سه‌رهلدانان هه‌رێما كوردستانا باشۆر و پارچه‌یا رۆژئاڤانه, ئه‌م ته‌ماشه‌ى چه‌رخێ بیستێ یێ سه‌ربه‌خوه‌یا مله‌ت و نه‌ته‌وان بكن، ژ هه‌مى ده‌مان پتر نه‌ته‌وا كورد ته‌په‌سه‌ر و مالۆێران و هه‌ژار و پارچه‌بوویه، ب رێیا تورككرن و عه‌ره‌بكرن و فارسكرنێ، هه‌مى جۆرێن چه‌كى و درنده‌یى ژبۆ نه‌هێلانا هه‌بوونا نه‌ته‌وا كورد یێن هاتینه ب كارئینان, سالا 1514 ئاخا كوردستان هاتیه پارچه‌كرن، پاشى په‌یداكرنا یاسا یا ره‌ش ژلایێ فارسان ڤه, سیاسه‌تا نه‌ره‌وایى یا سولتان حه‌میدێ ئوسمانى دژى كوردان, ده‌ركرنا كوردێن فه‌یلى ژ عیراقێ, ئه‌نفالكرنا هۆزا جاف و بارزانیان, ئه‌نفالا ره‌شا مه‌زن و بێ سه‌ر و شوونكرنا (182000) كوردان، كێمیا بارانكرنا حه‌له‌بچا شه‌هید و به‌هدینان ل سه‌ر پتر 663 گوندان, كاڤلكرن و تالانكرنا 4500 گوندان, كۆچا ملیۆنى سالا 1991, وه‌ك نموونه ب سه‌رێ مه كوردان هاتینه ژ به‌ركو ئه‌م نه ده‌وله‌تین و بنده‌ستین و تنێ داخوازكارێن ئازادیێ دكن و نه‌مینن بنده‌ست, وه‌كو پسیار بۆ تاكێ كورد ئه‌رێ ئه‌ڤه ل بیرا ته‌نه و هه‌ست ب وان ئێش و ئازارا دكى, ما نه فه‌ره ببن ئێك و سنۆره‌كى پیلایى ئاڤا بكن دا جاره‌كا دى ئه‌و ب سه‌رێ مه نه‌ئێن و ئه‌گه‌ران و گونه‌هێ نه ئێخینه د ئه‌ستوویێ كه‌سێ دا, تنێ دێ بێژم مه هه‌ستێ نه‌ته‌وى نه‌مایه، ئه‌رێ ئه‌م نه ژ دوژمنێن نه‌ته‌وا خوه پتر بزاڤێ دكن بۆ تێكدان و ئالۆزیكرنێ د به‌رده‌وامیدانا په‌یداكرنا ده‌وله‌تێ دا، بلا ئاریشێن ناڤخوه‌یا نافمالیا كوردى نه‌بن هاریكار بۆ شكه‌ستن و نه‌مانا هێزێ به‌رامبه‌ر دوژمنێن مه یێن ده‌رڤه، ما نه مخابن هه‌ر ده‌ما كورد گه‌هشتینه هنده‌ك ژ مافێن خوه هه‌ر ناڤخوه‌یا مالا كوردى بوویه ئه‌گه‌رێ ژ ده‌ستدانا ماف و ده‌ستكه‌فتان، نموونه زۆرن هه‌ر ژ میرنشینێن كوردى هه‌تا نها, دماوێ (27) سالان دا ئه‌ڤ میرنشینه نه‌مان, بزانین ئه‌گه‌ر چ بین و چاره ژ پارچه‌بوونێ چى یه، ما نه پێدڤى ده‌وله‌ته‌كا مه‌زن و ب هێزین و دژى پارچه‌كرنا ئاخا كوردستانێ نه, دژى ده‌وله‌تێن عه‌شیر و گوند و باژێر باژێرین… هتد نه‌شێن دیار بكه‌ین، مانه هه‌ر كه‌سێ ژمه هیڤیا وى به‌رژه‌وه‌ندیا نه‌ته‌وى یه و دژى مه‌ره‌مێن كه‌سۆكى یه، و…نا بێژین, ئه‌رێ كورد ل كیڤه بیت نه هه‌ر كورده و ل چ ئاست و رێژا ژیانێ دابیت ده‌ما دوژمنێن چاره‌نڤیس و دۆزا وى ڤیان ده‌ستكه‌فتێن نه‌ته‌وا وى قوت بكن دڤیا نه بیته پالده‌رێ هاریكار بۆ دوژمنێ ئازادى و ژیانا نه‌ته‌وا خوه ب هنده‌ك رێكا و ژبیر نه‌كه‌ت كو دوژمنان هزاران گۆرستانێن ب كۆم ب لاشێ نه‌ته‌وا وى درستكرینه, ئاشكه‌رابوونا (سه‌حرا كورد ـ نه‌سرینێ) ئه‌وێن ل ئه‌نفالا ره‌ش بووینه له‌یزۆكێن بازارێ مه‌یخانان بۆ عه‌ره‌بان دگه‌ل پتر ژ (200) كچ و ژنێن كوردان ته‌نها ل مسرێ, خوه پێناسه‌كرنا (ابو محمد) زاڤایێ كوردان ل مه‌كه‌ها سعوودیێ چاوا بوویه خزمێ كوردان ب رێیا (ده‌یكا محمد) یا ل بیابانا عه‌ره‌بى كچا به‌رمایا ئه‌نفالان به‌رچاڤترین نموونه‌نه, كوشتنا (276) كوردان ب كۆم ل به‌رچاڤێن خه‌لكێ سلێمانیێ ل 1963, كوشتن و سۆتنا (67) كوردان د ئێك شكه‌فتێ دا ل گوندێ ده‌كان ل 1969, و…. هتد كاره‌سات, هه‌مى ل بیرا مه‌بن دێ ئێك بین و بینه خودان هه‌ست و ئاڤاكه‌رێن ده‌وله‌تێ, ما نه‌یا پێدڤى یه ئه‌ڤێ ده‌لیڤێ ژ ده‌ست نه‌دن و ئه‌ڤێن ل سه‌رى هاتینه دیار كرن چه‌ند نموونه نه ژ هزاره‌هان نموونێن ده‌رده‌سه‌ریێ ب سه‌رێ نه‌ته‌وا مه هاتین, جیهانێ ژى نیاسین كورد كینه و ته‌نها داخوازا وى چاره‌نیڤسه‌كى راسته‌قینه‌یه و ئازاد و بژیت ل سه‌ر ئاخا خوه، به‌لێ مخابن هه‌تا نها وژدان مراندى یه و چاڤنقاندى یه و ریفراندۆم و كه‌ركووك و ده‌ڤه‌رێن دى و نها عه‌فرین ژى هاته سه‌ر نموونه, نه‌فره‌ت ل وژدانا جیهانێ و زلهێزان بیت هه‌ست ناكن ئه‌گه‌ر كورد بگه‌هنه مافێن خوه دێ هاریكاره‌كى ب هێز بن دگه‌ل ده‌ردوران بۆ ئاڤاكرنا ژیانێ, مه‌ره‌ما من ژ ئه‌ڤێ هه‌میێ ئه‌وه كورد ئێكگرتى و ئێكرێز و پشته‌ڤان بن بۆ ئێكودو، ئه‌گه‌ر مه بڤێت هه‌ژى ده‌وله‌تێ بن, نه بنه دارده‌ستێ خاپاندنێ و خرابكرنا مالا كوردى, یان دێ نێزیك و نه دوور بنه كوێله و هه‌میێ ژ ده‌ست دن ل مه‌یدانكا مریشك و عه‌لۆكا بێ هه‌ست و شیان و ژیان ل بن ده‌ستێن بازرگانێن فرۆتنا وژدانێ.
