به‌رهه‌مێ گازندان
محه‌مه‌د چه‌لكى
– ئه‌به‌د نه‌یا مه‌عقوله، ئه‌ڤ ره‌وشه هه‌ر بڤى ده‌ستودارى بمینیت.
– ره‌وشا چ … بخودێ بروونى هه‌ڤیركریه!
– دێ ڤێجا وه‌ره، گێولێ ته نه‌بیته سفر. ئێ مامۆ ما تۆ د گوهێ گاى داى نڤستى؟ یان هه‌ما ته دڤێت گویزێن خوه لسه‌ر دلێ من بشكێنى؟ ما ئه‌ڤه ره‌وشه ئه‌م تێدا؟
– نه بسه‌رێ ته، به‌لكو دخازم ئه‌ڤ ماى ژى ژ ده‌ستێن مه نه‌چیت.
– ما چ مایه هه‌تا ژ ده‌ستێن مه نه‌چیت؟
– گه‌له‌ك.
– كا هنده‌كا ژ وان گه‌له‌كا بێژه به‌لكو پیچه‌كێ هێرسا من دابكه‌ڤیت.
ده‌ڤێ ئه‌فه‌ندى تێك ئالیا، نزا چه‌وا خوه ژ ده‌ستێن مامێ عه‌لۆ خلاس بكه‌ت.
– ئێ ئه‌فه‌ندى ئه‌ز یێل هیڤیا به‌رسڤا جه‌نابێ هه‌وه؟
– هه‌ما ل لیستا به‌ربژێرێن مه بۆ په‌رله‌مانێ عێراقێ مێزه بكه، دێ زانى كانێ ره‌وش چه‌ندا لهه‌ڤهاتى و رێنگزه!
– تۆ ژى تێرا خوه هه‌ی ها .. نیازێن ته دگۆگراندینه!
– گۆگراندیێن چ ..
– هه‌ر چه‌نده ئه‌ڤه ژمێژه من ده‌ستێن خوه ژ هه‌وه ئه‌فه‌ندیا شویشتین، به‌لێ ئه‌ڤێ جارێ هه‌ما بجاره‌كێ ژ هه‌وه بێهیڤى بووم.
– ته ژى كه‌یسا خوه یا لمه دیتى؟
– نه كه‌یسه مامۆ، ڕاستیه.
– ما ده‌ستهه‌ڵاتا ڤى وه‌ڵاتى دده‌ستێن مه‌دایه!
– نه‌باده ده‌ستهه‌ڵاتێ .. دلێ مرۆڤى بره‌وشا وێ دسۆژیت، هه‌ما یێن رۆژێن خوه دبوورینن و لكێش و دابێشێن مه دنه‌بانن، لێ هه‌ما به‌غدا فیتیه‌ك ڤه‌دا، بچارگاڤ كه‌فتنه ڕێ!
– ئانكو ته‌ژى هه‌ست پێ كریه.
– مانێ ته به‌حسێ لیستا به‌ربژێران كر، ده‌ما من دیتى، چ نه‌مابوو داشاخێن من چنه به‌ر عه‌رشێ عه‌زیم.
– پا تۆ بۆ هه‌ر دمینى بلێڤا مه ئه‌فه‌ندیا ڤه!
– “خه‌تا كویره، ژ گایێ پیره”.
– ته ئه‌ڤه ژكیڤه ده‌رێخست!
– ئه‌فه‌ندى ستوینا ده‌ستهه‌ڵات و وه‌ڵاتانه، هه‌رده‌ما خوه‌هر بوون، هه‌رتشت دێ خوه‌هر بیت!
– ئێه .. مانێ ته لیسته دیتیه!
– لیستا چ ..
– یا گازندێن وه‌ڵاتیان ..
– كه‌نیێ من نه ئینه. مانێ من گۆته ته، ده‌ستهه‌ڵات لكێش و دابێشێن مه نه‌بانه، ده‌ما گوه لگازندان دبیت، دبێژیت:” بلا هه‌ر خوه بهه‌ڵاڤێژن”.
– پا ئه‌گه‌ر گوه نه‌ده‌ن گازندێن هه‌وه، دێ چه‌وا گوه ده‌نه مه؟
– ئه‌فه‌ندى مینا ئه‌فسه‌رێن لمه‌یدانا شه‌ڕى شكه‌ستینه، ڤێجا ژ كه‌ربادا دبنه بۆریزانێن ده‌ستهه‌ڵاتێ.
– نه ئه‌فه‌ندى بتنێ به‌لكو هه‌ر شكه‌ستیه‌ك نه‌چار دبیت، ببیته ته‌ڤشیێ به‌رێخوه.
– من باوه‌رى بڤێ گۆتنێ نینه، گازنده ئه‌گه‌ر نه‌هێن چاره‌سه‌ركرن، ڤۆلكانه‌كا په‌نگیاییه، بنه‌رمه بایه‌كى ب ناڤ چاڤێن ده‌ستهه‌ڵاتانڤه دپه‌قیت، هینگێ لیستێن كۆڕه جاش و مسته‌شارێن وه‌ڵاتفرۆش فایده ناكه‌ن، دێ وان ڕاپێچى زبلدانا دیرۆكێ كه‌ن، هه‌روه‌كو تسۆنامیا بهارا عه‌ره‌بى بسه‌رێ ده‌ستهه‌ڵاتدارێن گه‌نده‌ل و دكتاتۆر ئیناى.
2018.02.24
