بێ مننه‌ت بن
محه‌مه‌د چه‌لكى
– مامێ عه‌لۆ ته‌خێره، هۆسا كاڤڕێن* ته دبه‌ڵاڤ؟
– ما چه‌وا كاڤڕێن من دبه‌ڵاڤ نه‌بن؟
– مالا ته، وه‌سا یێ هه‌ستیار نه‌به! ته دنیا هه‌مى یا دایه پشتا خوه.
– ئه‌فه‌ندى: هه‌كه ته‌ژى پیچه‌كێ هزرا خوه كربا، ره‌وشا مه ئه‌ڤه نه‌دبوو؟
– ما كى دى ببانگێ من نڤێژێ كه‌تن!
– ڕاست دبێژى، وێ رۆژێ ئه‌ز ل دیوانا به‌رپرسه‌كى بووم، دگۆت: نه‌حه‌زێن ڤێ ئه‌زموونا مه، بلا هه‌ر بڕه‌ون، “سه دڕه‌وت، كاروان بڕیكا خوه دچت”.
– ئو ته ده‌نگێ خوه نه‌كر؟
– ما دا چ بێژم، جامێرى دار ژبنى بڕى!
– مانێ ئه‌ز هه‌ر یێ دبێژم: ته كه‌یسا خوه یا لمن گرتى!
– مامۆ مرۆڤ بۆ مرۆڤان دئاخڤت.
– یه‌عنى بدیتنا ته، به‌رپرسێن مه … نینن.
– لا حه‌یلل وه‌ڵا دێ وه‌ره شاخێن ته نه‌چن به‌ر عه‌رشێ عه‌زیم. من به‌حسێ به‌رپرسێن تۆزۆبا و بندیوار و هه‌وایى نه.
– باشبوو ته سه‌رك لێ بادا! به‌س ته نه‌گۆت: هه‌وایى چنه؟
– ئه‌وێن ژڤێ دنیایێ باركرین و هێشتا مۆچێن خوه وه‌ردگرن و لهه‌بژارتنان ده‌نگێن خوه ددن و هه‌ما ئه‌وه ناهێنه كاندیدكرن بۆ په‌رله‌مانى!
– ل حزوورا وى به‌رپرسى ته ئه‌ڤه گۆتن، یان هه‌ما ل ده‌ف من خوه دكى عه‌مێ گۆزێ؟
– مانێ من گۆته ته، به‌رپرسێن مه “دار یا ژبنى بڕى”! یێن بووینه كولندێن ده‌ر نه ڤه‌كرى!
– دیاره خوه‌ش خوه‌ش دچى دیوانا به‌رپرسان! چ دبن هنگلێن ته‌ڤه هه‌یه، ها؟
– گه‌له‌ك، به‌س نه ئه‌و تشتێن هزرا ته بۆ دچیت.
– ئه‌ڤه سه‌یرستانه* و هه‌ر تشت لێ جائیزه.
– بئه‌نیا بابێ ته كه‌م، ڕاست دبیژى. هه‌كه مرۆڤ برسى و قه‌ردار بوو، دێ هه‌ر كاره‌كى كه‌ت!
– تۆ یێ پاساوا بۆ جه‌ماعه‌تێ دئینى!
– كیش جه‌ماعه‌تێ!
– ئه‌وێن لبه‌ر ده‌رازینكا عه‌بادى سیكۆتین كرین، هه‌ر یێ داگێرانان بۆ دكه‌ن، دا به‌س مۆچێن هه‌رێمێ بهنێریت، ئه‌گه‌ر بۆ ئیكودوو داگێران كربان، 16ى چریا پێشین هه‌ر روو نه‌ددا و نوكه ئه‌م ل قۆناغه‌كا دن باینه.
– تۆ بخودێ كه‌ى برینێن من نه زۆخینه!
– ئها ژبه‌رهندێ كاڤڕێن ته دبه‌ڵاڤن!
– رجایێ دكه‌م به‌ڵا خوه ژ من ڤه‌كه، ده‌ردێ من گه‌له‌ك یێ گرانه و چ نه‌مایه كوڵاڤى ژ سه‌رى خوه بكه‌م و رێكا ماغۆتى* بگرم!
– ڤێجا ماغۆت كییه مامێ عه‌لۆ؟
– هه‌لبه‌ستڤان و ره‌وشه‌نبیره‌كێ سورى بوو، هندى هند خه‌م بۆ خوه‌شتركرنا ژینا خه‌لكى دخارن و ببو شایرێ هه‌ژاران، ئه‌ڤجا ژ لایێ ده‌ستهه‌ڵاتێڤه نه‌چاركر بۆ خوه بڕڤت!
– ڤێجا كێ هایش ته و ماغۆته چیه، هه‌یه!
– نێ ئها ئه‌ڤیه ئه‌ز پێ دهه‌رشم و ده‌ردێ ئه‌حمه‌دێ خانى یێ گرتیم و نه‌شێم …
– بسه‌رێ ته كه‌س نه‌شێت ئه‌ڤى ملله‌تى بینیته سه‌ر رێیه‌كا دروست، “بۆ ئێكودو شێره مێرن و بۆ خه‌لكى، په‌زێ لبه‌ر كێرن”.
– ژمێژه‌یه من خوه یا ژێ جوداكرى.
– له‌و ره‌وشا ته رێنگزه!
– “سه‌رێ لبه‌ر مننه‌تا بلا بچیته ناڤ زیاره‌تا”.
• سه‌یرستان: كوردستان
• محمد الماغۆت خودانێ گۆتنا: چ من بڤى وه‌ڵایتڤه گرێ ناده‌ت، ژبلى شمكا من.
2018.02.28
