بازارێ ناپاكیێ … گهرمه ل كوردستانێ!
فارس عیسا خێلهخى
ئێك ژوان گۆتنێن سهرنجامن ڕاكێشایى “ئهگهر ته دڤێت وهلاتهكێ ئاڤا بكهى، پێدڤیه دهبانجا خوه ب دهه گۆلهیان پر بكهى، نهه گۆله بۆ ناپاكێن ژخهلكێ وهلاتێ خوه، ئێك گۆله ژى بۆ دۆژمنێن دهرهكى”، ل دووڤ تێروانینا ئهوێ ئهڤ گۆتن گۆتى” ئهگهر ناپاكێن ناڤخوهیى نهبن، دووژمنێن دهرهكى ژى ههمبهر ته بوێر نابن”، ئاها ئهڤه دهردێ كوردایه ب درێژاهیا دیرۆكێ نهشیاینه مفایى ژ دهرفهتا وهربگرن بۆ ئازادیێ و ئاڤاكرنا دهولهتا كوردستانێ، چونكو ئهگهر دۆژمنێن دهرهكى ژى نهبن وێ ئارمانجێ ژناڤببن، ههما ژ كوردان ههبووینه ب ئهرزانى خوه فرۆتینه و ئهو كار ئهنجامداینه، ههر وهكو “ئهركدار وى كارى جێبهجێ بكهن”، مخابن تا نوكه ژى ئهو جۆره ناپاك و ناپاكیه بهردهوامه و ژنوو بوویه شانازى ژى.
ژبهرڤێ… شارهزایێن د وارێن ئاسایشا نهتهوهیى و نیشتمانی دا تهكهزێ دكهن، داكو ههر وهلاتهك ئاسایشا وێ بهرقهرار بیت و دوور بیت ژههر گهف و مهترسیهكێ، پێدڤیه زێدهتر ژ ئاسایشا دهرڤه، گرنگیێ ب ئاسایشا ناڤخوهیى بدهن، چارهسهریا وان ئهگهران بكهن یێن دبنه هۆكارێ لهكهداركرنا ئاستێ ناڤخوهیى، داكو دهرفهت نهڕهخسن بۆ خوه فرۆشان، وهڵاتى و مللهتى بهر ب ئاقارێن ترسناك و ئاسۆیێن نه دیارڤه ببن، هۆسا ب ساناهى و بێ ترس ئارماجێن دوژمنان جێبهجێ بكهن، واته ئهڤه وێ گۆتنێ پشتراست دكهت، ئهگهر دهستێن ناڤخوهیى نهبن، لایهنێن دهرهكى ژى ب ساناهى بوێر نابن پلانێن خوه جێبهجێ بكهن و ژههرا خوه برێژن، واته هێزا دهرهكى تێرا هندێ ناكهت دهستێوهردانێ بكهن، ئهگهر لاوازیا ناڤخوهیى و خهلكێ ناپاك نهبن.
ههلبهت خهلكێ باشوورێ كوردستانێ ژ نهچارى، پشتى ژلایێ بهغدایێ چو نیازپاكیهك ژبلى سهردابرنێ، ب مهبهستا دهمكوشتنێ و ل هیڤیا دهرفهتهكێ برهخسیت كوردان ژناڤببهن ب چو پێنگاڤهكێ نههاتنه پێش، سهرۆكێ كوردستانێ “مهسعود بارزانى” ب پشتهڤانیا پتریا خهلكێ كوردستانێ و لایهنێن سیاسى رۆژا 25 ئیلۆلا 2017 دیاركرن ژبۆ ڕاپرسیێ، سهرهرایێ دژایهتیا بهغدایێ و وهلاتێن دن ب بههانهێن جودا، ژ وانا ژبهر شهرێ داعشێ دهم گونجایه نینه و عیراقهكا ئێكگرتى مهبهسته، لێ ژبهركو “چهقوو گههشتبوو سهر ههستى” ههر وهكو كورد دبێژن، لهو خهلكێ باشوورێ كوردستانێ رژدبوون و ئهنجامدان، ب پشكداریا پترى (72%) ژخهلكێ باشوورى ب ئاماژهیا پترى (92%) ب دهنگێ “بهلێ” ژبۆ سهربهخوهیا كوردستانێ، ههموو ئالیهك مهندههۆشكرن كو كوردستانیان چو دڤێت، ئێدێ بابهتێ دهستنیشانكرنا رۆژا كهرنهڤالێ ڕاگههاندنا دهولهتێ و گۆتنا سهركێ زاڤایى، بابهتێ دهمى بوو، لێ جارهك دن ناپاكى، گرۆپهكا كێمفام و خوهفرۆشێن بنهمالا تاڵهبانى ژبۆ هندهك بهرژهوندیێن تهسك و بنهمالى، ژ رێزا مللهتى دهركهفتن بهر ب ههمبێزا دوژمنان و رژدتر ژدوژمنان زارۆكێ دهولهتێ ژبهربرن و نێزیكى 52% ژ ئاخا كوردستانێ كرنه دیارى بۆ دۆژمنان.
مخابن….عیراق یا بهر ب ههلبژارتنان نێزیك دبیت و ل كوردستانێ ژى بازارێ ناپاكیێ ل زوونا ههمبێزكرنا ناپاك و خاكفرۆشان یا گهرم دبیت، ڤێ جارێ “ماجیدات” یێن چووینه پێش، ماجیدات واته ئهو ناسناڤێ سهدام حوسێنى دانایه سهر وان ئافرهتین خزمهتا عرۆبهتێ دكهن، فێجا “ئالا تاڵهبانى” ئهنداما “سهركردایهتیا ینك”ێ ئهوا ب شایهتیا “نهجمهدین كهریمێ پارێزگارێ كهركووكێ” پێش كوردستانێ بفرۆشیت خوهفرۆتى، خوه دگهل لیستا “د.مهحموود مهشهدانى سهرۆكێ بهرێ پهرلهمانێ عیراقێ” خوه بهربژاركریه، ئهوێ ب ئاشكرایى دگۆتى چو كارێ كوردان نهمایه ل بهغدایێ بلا دهربكهن، ژ نوو ب شانازى ڤه ژى دبێژیت ب ڕاوێژ دگهل “بنهمالا تاڵهبانى” خوه بهربژاركریه، چو شهرمزاریهكه بۆ وێ بنهمالێ ژناپاكیێ تێرنابن، ژلایهكى دن “سهروه عهبدولواحید” سهرۆكا فراكسیۆنا گۆرانێ خوه دگهل لیستا سهركهفتنێ “قائمه النصر” یا حهیدهر عهبادى بهربژاركریه، كو مهبهست ژ ناڤێ “النصر” ئانكو دهربرینى ژ سهركهفتنا وان ل سهر داعش و ڕاپرسیا سهربخوهیا كوردستانێ دكهت، كو ب تێروانینا وان د ناڤبهرا داعشێ و كوردستانێ چو جوداهى نینه، لهو ب ههموو شێوازهكێ یێ خهلكێ كوردستانێ سزا دهن.
گهلۆ….ئهڤ دو ئافرهته سهرۆكێن فراكسیونێن یهنك و گۆرانێ نه ل بهغدایێ، ب ئاشكرایى دوژمنكاریا كوردستانێ دكهن، یهكێ خوه ب “ئهسهدى” و “كهركووك” ژى ب شارهكێ عیراقى بناڤكریه و یادى ژى “ڕاپرسى و سهربخوهیا كوردستانێ” ڕهت دكر و ل گهل یهكپارچهیا عیراقێیه، ئهڤجا ل داهاتوو ببن ئهندامێن دو لیستێن شۆفینیێن مهزههبى و قهومهجى، دێ چو جۆره داهێنانهكێ د ناپاكیێ دا ئهنجامدهن، ب من ئهگهر گرۆپا كێم فام ب نهێنى دگهل “قاسم سلێمانى” رێككهفتبن و ب ئاشكرایى كوردستان ڕادهستى ملیشیایێت ئیرانێ كربن، ئهڤ دو ئافرهته دێ ڕكابهریا سهر زێدهكرنێ ب ئاشكرایى ئهنجامدهن، كى دێ زێدهتر باوهشا دۆژمنان و بازارێ ناپاكیێ گهرم كهت و دهستكهفتێن مایین ژ كوردستانا باشوور ژناڤبهن.
