به‌شه‌ك ژ په‌رتووك و ده‌ستنڤیسێن خواندنگه‌ها قوبه‌هان ل به‌غدانه
ئه‌ڤرۆ نیوز ، نه‌وزاد هلۆرى:
خواندنگه‌ها قوبه‌هان كو ئێكه ژ خواندنگه‌هێن دیروكى و شارستانیێن كوردستانێ و پارێزگه‌ها دهۆك و قه‌زا ئامێدیێ ، كو ئالوگورا زانستى دناڤبه‌را وێ و زانكویا ئه‌زهه‌را مسرێ دهاته‌كرن ، و نێزیكێ 12 جوره زانستێن مینا ئه‌ندازیارى و ئاینى و فه‌لسه‌فى و دیروكى و نوژدارى … هتد تێدا دهاتنه خواندن ، پشتى كو خواندنگه‌ه هاتیه خراپكرن پشكه‌كا زور په‌رتوكێن وێ هاتنه سوتن و هنده‌ك ژى بو به‌غدا هاتنه ڤه‌گوهاستن.
جه‌مال ره‌شدی رێڤه‌به‌رێ گشتیێ په‌رتووكخانا ئامێدیێ بو ئه‌ڤرۆ نیوز گۆت: (په‌رتووكخانا ئامێدیێ ، هه‌ر چه‌نده دیروكا وێ گه‌له‌ك یا كه‌ڤن ژى نینه به‌لێ هزاران په‌رتووكێن كه‌ڤێن دیروى و شارستانى دناڤ خوه دا هه‌لگرتینه و خزمه‌ته‌كا به‌رچاڤ بو خه‌لكێ ده‌ڤه‌رێ و خواندنه‌ڤانان كریه) زێده‌تر گۆت: (ده‌هان نڤیسه‌ر و ڤه‌كوله‌ران په‌رتووكێن خوه ئیناینه په‌رتووكخانێ و بویه ئێك ژ ژێده‌رێن هه‌رى گرنگ بو خوانده‌ڤان و نڤیسه‌ران ب تایبه‌تى قوتابیان كو ب دوڤ ژێده‌ران بگه‌ریێن بو چێكرنا ڤه‌كولینێن خوه) ب ئه‌گه‌را هه‌بوونا خواندنگه‌ها قوبه‌هان هژماره‌كا زور یا نڤیسه‌ر و شاره‌زا و ره‌وشه‌نبیر و روناكبیرێن هه‌موو ده‌ڤه‌رێن كوردستانێ هه‌تا خوه ل گه‌له‌ك ژ وه‌لاتێن جیهانێ ژى سه‌ره‌دانا ئامێدیێ كرینه داكو بخوونن یان ژێده‌رێن زانستى ده‌ستخوڤه بینن و لسه‌ر ده‌ما خواندنگه‌ها ناڤبرى ئالوگوریه‌كا زور یا زانستى دناڤبه‌را قوبه‌هان و زانكویا ئه‌زهه‌ر یا مسرى دهاته‌كرن و نێزیكێ 12 جورێن زانستێن مینا ئه‌ندازیارى ، نوژدارى ، فه‌لسه‌فه ، ئاین ، دیروكى و … هتد دهاتنه خواندن ، و ده‌هان شێخ و زانا و بسپوور لێ ده‌رچوینه و باوه‌رنامه وه‌رگرتینه ، به‌لێ پشتى كو ل سالا 1919 خواندنگه‌ها قوبه‌هان هاتیه سوتن هه‌موو ده‌ستنڤیس و په‌رتووكێن وێ ژ ناڤچوون و بتنێ نێزیكێ 400 ژ وان ده‌ستنڤیس و په‌رتووكان ماینه و ئه‌و ژى ل موزه‌خانا نیشتمانیا به‌غدا دهێنه پاراستن و چوو ژ وان په‌رتوكان ل ئامێدیێ نه‌ماینه، رێڤه‌به‌رێ گشتیێ په‌رتووكخانا ئامێدیێ هوسا گوت.
ب گوره‌ى ئاخفتنێن جه‌مال ره‌شدی رێڤه‌به‌رێ گشتیێ په‌رتووكخانا ئامێدیێ وه‌زاره‌تا ره‌وشه‌نبیرى و هونه‌رى یا حوكمه‌تا هه‌رێما كوردستانێ ئاگه‌هدارێ وێ یه‌كێ یه كو ده‌ستنڤیس و په‌رتووكێن خواندنگه‌ها قوبه‌هان ل به‌غدا هه‌نه به‌لێ هه‌تا نها چوو بزاڤ بو زڤراندنا وان نه‌هاتینه هاڤێتن و گۆت ژى: (ده‌ستنڤیس و په‌رتووكێن خواندنگه‌ها قوبه‌هان مولكێ ئامێدیێ یه و پێدڤى یه بو ئامێدیێ بهێنه زڤراندن ، و بهێنه‌دانان ل په‌رتووكخانا ئامێدیێ ، و په‌رتووكخانا ئامێدیێ ل سالا 1989 هاتیه درۆستكرن و نێزیكێ 10 هزار و 500 په‌رتووك ب زمانێن كوردى و عه‌ره‌بى و ب هه‌موو بابه‌تان تێدا هه‌نه و رۆژانه خه‌لكه‌كێ زور سه‌ره‌دانێ بو دكه‌ت بو ده‌ستكه‌فتنا په‌رتووكان)
