هه‌ر كه‌سێ ب نه قانوونى پلا ئه‌فسه‌ر وه‌رگرتبيت دێ ژێ هێته ستاندن
ئه‌ڤرۆنيوز:
وه‌زاره‌تا پێشمه‌رگه هووربينيێ دپلێن ئه‌فسه‌ران دا دكه‌ت وهه‌ر كه‌سه‌كێ ب نه‌قانوونى پله وه‌رگرتبيت، دێ ژێ هێته ستاندن هه‌ڤده‌م دێ خۆله‌كا له‌شكرى يا شه‌ش هه‌يڤى هێته ڤه‌كرن وهه‌ر ئه‌فسه‌ره‌كێ پشكداريێ تێدا نه‌كه‌ت، پلا وى نامينيت وهه‌تا نوكه پلا ئه‌فسه‌ريێ ژ 200 كه‌سان يا هاتيه وه‌رگرتن.
پشتى شه‌رێ داعشێ، وه‌زاره‌تا پێشمه‌رگه ب هه‌ڤكاريا ئه‌مريكا ووه‌لاتێن هه‌ڤپه‌يمان، مژوولى رێكخستنا هێزا پێشمه‌رگه‌يه و دوى چارچۆڤه‌ى دا هووربينى دپلێن ئه‌فسه‌رێن ب سه‌ر وه‌زاره‌تێ ڤه دهێته كرن وهه‌ڤده‌م خۆلێن له‌شكرى دێ بۆ هێته ڤه‌كرن، ل دووڤ به‌رپرسێن وه‌زاره‌تا پێشمه‌رگه، ئه‌و بزاڤه بۆ نه‌هێلانا جوداهيێ يه ولادانا بزاڤێن نه‌قانوونى يه بۆ وێ چه‌ندێ ئه‌فسه‌ر وپله‌دارێن ب پله وئه‌زموون وده‌مێ قانوونى يێ خوه، پلا له‌شكرى وه‌ربگرن.
جه‌بار ياوه‌ر، ئه‌ميندارێ گشتيێ وه‌زاره‌تا پێشمه‌رگه بۆ وشه راگه‌هاند” ل وه‌زاره‌تا پێشمه‌رگه بريار هاتيه دان هه‌ر كه‌سه‌كێ پلا له‌شكرى هه‌بيت، پێدڤيه دناڤبه‌را شه‌ش هه‌يڤان هه‌تا ساله‌كێ خۆله‌كا له‌شكرى ببينيت وئه‌وێن پشكداريێ دخۆلان دا نه‌كه‌ت، دێ پلێن وان ژێ هێنه وه‌رگرتن”.
ل دووڤ پێزانينێن وشه، ل سالا بۆرى پله بلندكرنا نێزيكى هزار و500 ئه‌فسه‌ران هاته ره‌تكرن، چونكى خۆلا له‌شكرى نه‌ديتيه، جه‌بار ياوه‌ر ل دۆر وێ چه‌ندێ دبێژيت”دده‌مێ بۆرى دا مه پێرابوون وه‌رگرتينه وئه‌وێن پلێن ئه‌فسه‌ريێ هه‌بوون وپشكدارى دخۆلێ دا نه‌كريه، يان يێن هێته راگرتن ، يان ژى پلێن وان يێن ژێ هاتينه وه‌رگرتن”.
ژێده‌ره‌كى ژ وه‌زاره‌تا پێشمه‌رگه ب وشه دياركر كو هه‌تا نوكه پلا ئه‌فسه‌ريێ يا ژ 200 كه‌سان هاتيه وه‌رگرتن كو هنده‌ك ژوان پشكدارى دخۆلا له‌شكرى دا نه‌كريه وهنده‌ك ژى ب نه‌قانوونى پله پێ هاتيه دان.
شيلان جه‌عفه‌ر، سه‌رۆكا لژنا پێشمه‌رگه‌ى ل په‌رله‌مانێ كوردستانێ ئاماژه دا كو ئه‌و خه‌لێن وه‌زاره‌تا پێشمه‌رگه ژ دو ئاليان ڤه دگرنگن، يێ ئێكێ ب قانوونى كرنا پلێن ئه‌فسه‌ران ژروويێ له‌شكرى ڤه، يا دويێ نه‌هێلانا پلێن زێده ژوان ژى يێن ل مال روونشتى وپلێن بلند ژى هه‌ين وچو شاره‌زاييه‌كا له‌شكرى ژى نينه.
بلندكرنا پلێن پێشمه‌رگه‌ى ل دووڤ پلێن وان دناڤبه‌را سێ سالان بۆ چار سالانه هه‌تا دگه‌هيته شه‌ش سالان جاره‌كێ دبيت، دده‌مه‌كى دا ل سالا 2015 ب بريارا وه‌زاره‌تا دارايى، پله بلندكرنا فه‌رمانبه‌ران هاته راگرتن، به‌لێ وێ بريارێ ژ وه‌زاره‌تا پێشمه‌رگه نه‌گرت.
شيلانێ گۆت” هووربينى ل سه‌ر داخوازا په‌رله‌مانێ كوردستانێ وخواستا وه‌زاره‌تا پێشمه‌رگه‌ى بوو بۆ وێ چه‌ندێ ليستا ئه‌فسه‌ران وپلێن وان هه‌موو دشايسته بن وكه‌س ژبه‌ر ئه‌گه‌رێن حزبى وپه‌يوه‌نديێن تايبه‌ت پلا بلند وه‌رنه‌گريت”.
