ئیرانێ سێ پارێزگەهێن عێراقێ داگیر کرینە
ئەڤرۆ نیوز،زنار تۆڤی:
كه‌سایه‌تی و هێزێن سیاسی یێن عێراقێ ئیرانێ تۆمه‌تبار د‌كه‌ن ب چركرنا هه‌ولێن خوە بۆ سه‌پاندنا هه‌ژموونا خوە ب ته‌مامی بۆ سه‌ر سێ پارێزگەهێن عێراقی،ئیرانێ میلیشیاتێن خوە ل وان هەرسێ پارێزگەهان بەلاڤکرینە بۆ كۆنترۆلكرنا هەموو وارێن ژیانێ ل وان پارێزگەهان.
ئه‌و سێ پارێزگەهێن عێراقێ پێکهاتینە ژ دیاله و واست و به‌سره ده‌رگەهێن خوە ب روویێن میلیشیاتێن حه‌شدا شه‌عبی ل وان پارێزگەهان ڤەكرینە و ئه‌وان ب ته‌مامی كۆنترۆلا لایه‌نێن ته‌ناهیێ كرینه، هه‌ر كه‌س و گرووپەکێ ل وان دەڤەران ل دژی ئیرانێ بن،ب ئێكجاری دێ دوماهیێ پێ ئینن.
پێشتر محه‌مه‌د عه‌لی جه‌عفه‌ری فه‌رماندێ سوپایێ پاسدارێن ئیرانێ گوتیە،د به‌رژه‌وه‌ندیا ئیرانێ دا نه‌بوو ل دەستپێکا داعشێ دا ل عێراقێ بهێتە بنبر كرن، چونكی ده‌ركه‌فتنا تیرۆریستێن داعش بوویه ئەگەرێ هندێ کو ئیران ل زۆربه‌یا دەڤەرێن رۆژهه‌لاتا ناڤیا هه‌ژموونا خوە ب سه‌پینیت.
ده‌ركه‌فتنا هێزێن سه‌ر ب ئیران و چركرنا هه‌ولێن وان ل وان سێ پارێزگەهان،بۆ وێ مەرەمێ یە،کو ب شێوه‌کێ ئارام و ل سه‌رخوە و ب رێیا هێزێ ب ته‌مامی به‌سره و واست و دیالا داگیر بكه‌ن، ل پارێزگەها دیالا ئیرانێ د ماوێ چه‌ند سالێن بوری دا سه‌ركه‌فتی بوویە د سه‌پاندنا هه‌ژموونا خوە و ده‌ركرنا هێزێن موجاهیدی خه‌لق ل كه‌مپا ئه‌شره‌فی یێ یا سه‌ر وێ پارێزگەهی ڤە،ژ بلی ڤێ چەندێ ژی ئیرانێ ب هووری كار ل سه‌ر گوهۆرینا دیمۆگرافیا پارێزگەهێن سونی دکەت و زمانێ فارسی و كولتوورێ خوە ل وان دەڤەران بەلاڤ دکەت.
پارێزگەها واست كو هەڤسنووره ل گه‌ل میهرانا ئیرانی، هژماره‌کا ئێكجار زۆر یا هێزێن به‌در کو ئێكه ژ میلیشیاتێن سه‌ر ب ئیرانێ ڤە بەلاڤبووینە و وان حەز و ڤیان بۆ سیسته‌مێ ویلایه‌تا فیقهـی هه‌یه،ل به‌سرا ژی ل سه‌ره‌تایا هه‌شتێیان ئیرانێ پشکەک ژ نیمچه دوورگه‌یا فاو داگیركر،نوکە ژی ئەو نیمچه دوورگه‌یە بوویە بنگەهەکێ سه‌ربازی یێ میلیشیاتێن نوجه‌با كو ئێكه ژ وان میلیشیاتێن راسته‌وخۆ سه‌ر ب ئیرانێ ڤەنە و ئەو ب خوە ژی ڤێ چەندێ ئاشكرا د‌كه‌ن.
